leftcenterrightdel
លោក Tran Cam Tu សមាជិកការិយាល័យនយោបាយ លេខាប្រចាំការនៃគណៈលេខាមជ្ឈិមបក្ស ទទួលជួបលោក Bounleua Phandanouvong ប្រធានស្តីទីគណៈទាក់ទងការបរទេស នៃគណៈកម្មាធិការមជ្ឈិមបក្សប្រជាជនបដិវត្តន៍ឡាវ (រូបថត៖ vnanet.vn)

ក្នុងជំនួបនេះ លោក Tran Cam Tu បានអះអាងថា វៀតណាមជានិច្ចកាលផ្តល់អាទិភាពខ្ពស់បំផុតចំពោះការពង្រឹង និងពង្រីកចំណងសាមគ្គីភាពពិសេស និងកិច្ចសហប្រតិបត្តិការលើគ្រប់វិស័យជាមួយឡាវ ហើយជានិច្ចកាលប្រកៀកស្មា និងគាំទ្រយ៉ាងខ្លាំងក្លាចំពោះការកសាង ការផ្លាស់ប្តូរ និងការអភិវឌ្ឍរបស់ឡាវ។ លោក Tran Cam Tu បានសម្តែងក្តីសប្បាយរីករាយចំពោះការអភិវឌ្ឍទំនាក់ទំនងវៀតណាម-ឡាវនាពេលកន្លងមកនេះ ព្រមទាំងសង្កត់ធ្ងន់ថា ភាគីទាំងពីរបានខិតខំប្រឹងប្រែងយ៉ាងខ្លាំងដើម្បីអនុវត្តកិច្ចព្រមព្រៀងកម្រិតខ្ពស់ និងផែនការសហប្រតិបត្តិការលើគ្រប់បណ្តាញ និងគ្រប់វិស័យសហប្រតិបត្តិការ ប៉ុន្តែក៏ត្រូវតែមានភាពសកម្មបន្ថែមទៀតដើម្បីសម្រេចបាននូវការរំពឹងទុក និងកម្រិតនៃទំនាក់ទំនងរវាងបក្សទាំងពីរ និងប្រទេសទាំងពីរ។

leftcenterrightdel
ទិដ្ឋភាពនៃជំនួប (រូបថត៖ vnanet.vn)

លោក Tran Cam Tu បានវាយតម្លៃខ្ពស់ចំពោះតួនាទីសំខាន់របស់គណៈទាក់ទងការបរទេស នៃគណៈកម្មាធិការមជ្ឈិមបក្សប្រជាជនបដិវត្តន៍ឡាវនាពេលកន្លងមកនេះ ដែលបានសម្របសម្រួលយ៉ាងជិតស្និទ្ធជាមួយក្រសួងការបរទេស និងស្ថាប័នពាក់ព័ន្ធរបស់វៀតណាម ដើម្បីអនុវត្តប្រកបដោយប្រសិទ្ធភាពនូវកិច្ចព្រមព្រៀងកម្រិតខ្ពស់រវាងបក្សទាំងពីរ និងរៀបចំល្អចំពោះសកម្មភាពកម្រិតខ្ពស់សំខាន់ៗ។ លោកបានស្នើឱ្យស្ថាប័នទាក់ទងការបរទេសនៃភាគីទាំងពីរបន្តលើកកម្ពស់ប្រពៃណីនៃទំនាក់ទំនងល្អ បង្កើនការផ្លាស់ប្តូរព័ត៌មាន និងសម្របសម្រួលយ៉ាងជិតស្និទ្ធដើម្បីអនុវត្តភារកិច្ចដែលត្រូវបានប្រគល់ជូនដោយជោគជ័យ រួមចំណែកយ៉ាងសំខាន់ក្នុងការពង្រឹង និងពង្រីកចំណងសាមគ្គីភាពពិសេស និងកិច្ចសហប្រតិបត្តិការលើគ្រប់វិស័យរវាងបក្សទាំងពីរ និងប្រទេសទាំងពីរ។

លោក Bounleua Phandanouvong បានបញ្ជាក់ថា ទោះជាស្ថិតក្នុងកាលៈទេសៈណាក៏ដោយ គណៈទាក់ទងការបរទេសមជ្ឈិមបក្សប្រជាជនបដិវត្តន៍ឡាវនឹងខិតខំបំពេញភារកិច្ចដែលបក្សទាំងពីរបានប្រគល់ជូន និងអនុវត្តប្រកបដោយប្រសិទ្ធភាពនូវកិច្ចព្រមព្រៀងរវាងថ្នាក់ដឹកនាំជាន់ខ្ពស់នៃបក្សទាំងពីរ និងប្រទេសទាំងពីរ។

នាថ្ងៃដដែល លោក Bounleua Phandanouvong  ប្រធានស្តីទីគណៈទាក់ទងការបរទេស នៃគណៈកម្មាធិការមជ្ឈិមបក្សប្រជាជនបដិវត្តន៍ឡាវ បានបំពេញទស្សនកិច្ចនៅវិទ្យាស្ថាននយោបាយជាតិហូជីមិញ៕

បកប្រែដោយ Duy Hoan