បន្តជំរុញទំនាក់ទំនង វៀតណាម-ឡាវ អភិវឌ្ឍដោយឥតឈប់ឈរ

នៅក្នុងកិច្ចពិភាក្សា លោក Bui Thanh Son ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេសវៀតណាមបានជឿជាក់ថា ដំណើរទស្សនកិច្ចនេះនឹងសម្រេចបានលទ្ធផលសំខាន់ជាច្រើន បើកជាផ្លូវការដំណាក់កាលថ្មីនៃកិច្ចសហប្រតិបត្តិការរវាងក្រសួងការបរទេសវៀតណាម និងគណៈទាក់ទងបរទេសនៃគណៈកម្មាធិការមជ្ឈិមឡាវ រួមចំណែកបន្តជំរុញទំនាក់ទំនងរវាងប្រទេសទាំងពីរអភិវឌ្ឍដោយឥតឈប់ឈរ ព្រមទាំងអបអរសាទរចំពោះសមិទ្ធផលសំខាន់ៗដែលប្រទេសឡាវសម្រេចបានក្នុងរយៈពេលកន្លងមក។

លោក Bui Thanh Son ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេសវៀតណាម និងលោក Bounleua Phandanouvong ប្រធានស្តីទីគណៈទាក់ទងបរទេសនៃគណៈកម្មាធិការមជ្ឈិមឡាវ (រូបថត៖ baoquocte.vn)

លោក Bounleua Phandanouvong ប្រធានស្តីទីគណៈទាក់ទងបរទេសនៃគណៈកម្មាធិការមជ្ឈិមឡាវ បានសង្កត់ធ្ងន់ថា នេះគឺជាដំណើរទស្សនកិច្ចផ្លូវការនៅឯបរទេសលើកដំបូងក្នុងមុខតំណែងថ្មីរបស់លោក ដែលធ្វើឡើងភ្លាមៗបន្ទាប់ពីសកម្មភាពកិច្ចការបរទេសសំខាន់ៗរបស់ប្រទេសទាំងពីរក្នុងរយៈពេលកន្លងមក ដោយបានអះអាងនូវគោលនយោបាយដ៏ខ្ជាប់ខ្ជួន យកចិត្តទុកដាក់យ៉ាងខ្លាំងជានិច្ច និងផ្តល់អាទិភាពខ្ពស់បំផុតចំពោះទំនាក់ទំនងពិសេសវៀតណាម-ឡាវ។

ទិដ្ឋភាពនៃកិច្ចពិភាក្សា (រូបថត៖ baoquocte.vn)

ភាគីទាំងពីរបានវាយតម្លៃខ្ពស់ចំពោះកិច្ចសហប្រតិបត្តិការ និងការសម្របសម្រួលយ៉ាងជិតស្និទ្ធរវាងគណៈទាក់ទងបរទេសនៃគណៈកម្មាធិការមជ្ឈិមទាំងពីរក្នុងរយៈពេលកន្លងមក។ ភាគីទាំងពីរបានឯកភាពថា នាពេលខាងមុខ ក្រសួងការបរទេសវៀតណាម និងគណៈទាក់ទងបរទេសនៃគណៈកម្មាធិការមជ្ឈិមឡាវ ប្តេជ្ញាអនុវត្តប្រកបដោយប្រសិទ្ធភាពនូវខ្លឹមសារនៃកិច្ចព្រមព្រៀងថ្នាក់ជាន់ខ្ពស់រវាងបក្សទាំងពីរ និងប្រទេសទាំងពីរ។ ភាគីទាំងពីរបានឯកភាពសម្របសម្រួលក្នុងការកសាងកិច្ចព្រមព្រៀងសហប្រតិបត្តិការរវាងក្រសួងការបរទេសវៀតណាម និងគណៈទាក់ទងបរទេសនៃគណៈកម្មាធិការមជ្ឈិមឡាវសម្រាប់ ដំណាក់កាល ២០២៦-២០៣០។

* នារសៀលថ្ងៃដដែល នៅទីស្នាក់ការក្រសួងការបរទេស លោក Bui Thanh Son ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេស បានជួបសន្ទនាតាមទូរស័ព្ទជាមួយលោក Johann Wadephul រដ្ឋមន្ត្រីការបរទេសនៃសាធារណរដ្ឋសហព័ន្ធអាល្លឺម៉ង់។ ភាគីទាំងពីរបានសង្កត់ធ្ងន់លើភាពចាំបាច់ក្នុងការលើកកម្ពស់ទំនាក់ទំនងទ្វេភាគីឱ្យបានឆាប់ ជំរុញការពង្រីកទីផ្សារទៅវិញទៅមក ឆាប់បញ្ចប់ការផ្តល់សច្ចាប័នលើកិច្ចព្រមព្រៀងគាំពារការវិនិយោគវៀតណាម-សហភាពអឺរ៉ុប។ ភាគីទាំងពីរបានឯកភាពជំរុញកិច្ចសហប្រតិបត្តិការវិទ្យាសាស្ត្រ និងបច្ចេកវិទ្យាក្លាយជាសសរស្តម្ភថ្មីក្នុងកិច្ចសហប្រតិបត្តិការទ្វេភាគី ជាពិសេសក្នុងវិស័យថាមពលស្អាត បច្ចេកវិទ្យាណាណូ បច្ចេកវិទ្យាកង់ទិច semiconductor និងការធ្វើបរិវត្តកម្មឌីជីថល ជំរុញកិច្ចសហប្រតិបត្តិការលើវិស័យអប់រំ និងបណ្តុះបណ្តាលវិជ្ជាជីវៈ។

អំពីបញ្ហាតំបន់ និងអន្តរជាតិមួយចំនួនដែលភាគីទាំងពីរមានការយកចិត្តទុកដាក់ដូចគ្នា រួមទាំងបញ្ហាសមុទ្រខាងកើត ភាគីទាំងពីរបានឯកភាពជំរុញការដោះស្រាយជម្លោះ និងវិវាទដោយសន្តិវិធី តាមរយៈការសន្ទនា ស្របតាមច្បាប់អន្តរជាតិ និងធម្មនុញ្ញអង្គការសហប្រជាជាតិ៕

បកប្រែដោយ Huyen Trang