អាណិកជនវៀតណាមនៅឯបរទេសបានបរិច្ចាគថវិកាចំនួន ១០.៥ ពាន់លានដុងដល់មូលនិធិវ៉ាក់សាំងការពារ Covid-19
កប.អនឡាញ - នាថ្ងៃទី ២៩ ខែកក្កដា អនុរដ្ឋមន្រ្តីក្រសួងការបរទេសវៀតណាម ប្រធានគណៈកម្មាធិការរដ្ឋទទួលបន្ទុកអាណិកជនវៀតណាមនៅឯបរទេស លោក Pham Quang Hieu បានផ្ញើសារថ្លែងអំណរគុណដល់អាណិកជនវៀតណាមនៅឯបរទេស ដែលបានរួមដំណើរ ចែករំលែក និងគាំទ្រប្រទេសក្នុងការបង្ការ និងប្រយុទ្ធប្រឆាំងនឹងជំងឺរាតត្បាត Covid-19។
ចាប់តាំងពីមានការផ្ទុះឡើងនូវរលកទី ៤ នៃជំងឺរាតត្បាត Covid-19 នៅប្រទេសវៀតណាម ទោះបីជាជីវភាពរស់នៅរបស់អាណិកជនវៀតណាមនៅឯបរទេសនៅតែជួបការលំបាកជាច្រើនក៏ដោយ ក៏ពួកគេបានជួយគាំទ្រចំពោះការបង្ការ និងប្រយុទ្ធប្រឆាំងនឹងជំងឺរាតត្បាត Covid-19 នៅក្នុងប្រទេសតាមរយៈទម្រង់ជាច្រើន។
ចាប់ពីថ្ងៃទី ៥ ខែមិថុនា ឆ្នាំ ២០២១ ដល់បច្ចុប្បន្ន ចំនួនថវិកាដែលបានបរិច្ចាគសម្រាប់ការបង្ការ និងប្រយុទ្ធប្រឆាំងនឹងជំងឺរាតត្បាត Covid-19 និងមូលនិធិវ៉ាក់សាំងការពារ Covid-19 ដោយសហគមន៍អាណិកជនវៀតណាមនៅឯបរទេសបានកើនដល់ ១០.៥ ពាន់លានដុង។
លើសពីនេះ សមាគមអាណិកជនវៀតណាមជិត ៣០ នៅប្រទេសបារាំង អាមេរិក កាណាដា ... បានបើកយុទ្ធនាការ “ពួតដៃដើម្បីវៀតណាម” និង “វ៉ាក់សាំងការពារ Covid-19 ចំនួន ១០,០០០ ដូសជូនវៀតណាម” នៅជុំវិញពិភពលោក ដើម្បីជួយគាំទ្រប្រជាជនវៀតណាមក្នុងប្រទេសទប់ទល់នឹងជំងឺរាតត្បាត Covid-19៕
បកប្រែដោយ Huyen Trang