អង្គការសហប្រជាជាតិប្រារព្ធបុណ្យវិសាខបូជាអន្តរជាតិ
កប.អនឡាញ - នាថ្ងៃទី២ ខែកក្កដា អង្គការសហប្រជាជាតិ បានប្រារព្វបុណ្យវិសាខបូជាអន្តរជាតិ តាមប្រព័ន្ធវីដេអូ ដោយមានការចូលរួមពីប្រធានមហាសន្និបាតអង្គការសហប្រជាជាតិ អគ្គលេខាធិការអង្គការសហប្រជាជាតិ និងរដ្ឋមន្ដ្រីការបរទេសស្រីលង្កា។ ឯកអគ្គរដ្ឋទូត និងតំណាងស្ថានបេសកកម្មអចិន្រ្តៃយ៍នៃបណ្តាប្រទេសជាសមាជិកអង្គការសហប្រជាជាតិបានអញ្ជើញចូលរួម និងថ្លែងសុន្ទរកថានៅក្នុងពិធីនេះ។
|
|
អង្គការសហប្រជាជាតិប្រារព្ធបុណ្យវិសាខបូជាអន្តរជាតិ (រូបថត៖ vovworld.vn) |
ថ្លែងមតិនៅក្នុងពិធីនេះ អគ្គលេខាធិការអង្គការសហប្រជាជាតិ លោក Antonio Guterres បានអះអាងនូវគុណតម្លៃដ៏ថ្លៃថ្លានៃសារនានារបស់ព្រះពុទ្ធស្ដីពីសាមគ្គីភាព ការបម្រើ ជាពិសេសក្នុងបរិបទដែលពិភពលោកកំពុងប្រឈមមុខនឹងជំងឺរាតត្បាត COVID – 19 ។
អញ្ជើញថ្លែងក្នុងពិធីនេះ លោកឯកអគ្គរដ្ឋទូត Dang Dinh Quy ប្រធានស្ថានបេសកកម្មអចិន្ត្រៃយ៍វៀតណាមប្រចាំនៅអង្គការសហប្រជាជាតិបានអះអាងនូវគុណតម្លៃនៃព្រះធម៌ក្នុងបរិបទដែលពិភពលោកកំពុងប្រឈមមុខនឹងបញ្ហាប្រឈមជាច្រើននាបច្ចុប្បន្ន ដូចជាជម្លោះ ការប្រែប្រួលអាកាសធាតុ និងជំងឺរាតត្បាត COVID – 19 ជាដើម។
លោក Dang Dinh Quy ក៏បានសង្កត់ធ្ងន់ទៅលើស្មារតីទទួលខុសត្រូវរួមដើម្បីពិភពលោកមួយគ្មានការឈឺចាប់ ដោយលើកកំពស់ក្ដីមេត្តាករុណាដើម្បីទប់ស្កាត់អំពើហឹង្សា ភាពតានតឹង ហើយជំរុញកិច្ចសហប្រតិបត្តិការដើម្បីផលប្រយោជន៍រួមរបស់មនុស្សជាតិទាំងមូលផងដែរ៕
បកប្រែដោយ Duy Hoan