ថ្នាក់ដឹកនាំមន្ទីរពេទ្យយោធាលេខ ១៧៥ ទៅជូនពរឆ្នាំថ្មីនៅកម្ពុជា

ក្នុងបរិយាកាសកក់ក្តៅ និងមិត្តភាព ក្នុងនាមថ្នាក់ដឹកនាំមន្ទីរពេទ្យយោធាលេខ ១៧៥ លោកឧត្តមសេនីយ៍ត្រី Tran Quoc Viet បានជូនពរឆ្នាំថ្មី ដល់ថ្នាក់ដឹកនាំ បុគ្គលិក និងក្រុមគ្រូពេទ្យនៃមន្ទីរពេទ្យព្រះកេតុមាលា។ លោកបានសង្កត់ធ្ងន់ថា ដំណើរទស្សនកិច្ចនេះគឺជាភស្តុតាងច្បាស់លាស់នៃសាមគ្គីភាព និងចំណងមិត្តភាព ភាពជិតស្និទ្ធរវាងកងទ័ពនៃប្រទេសទាំងពីរនិយាយរួម និងរវាងមន្ទីរពេទ្យទាំងពីរនិយាយដោយឡែក។

គណៈប្រតិភូមន្ទីរពេទ្យយោធាលេខ១៧៥ និងថ្នាក់ដឹកនាំមន្ទីរពេទ្យព្រះកេតុមាលា ថតរូបទុកជាអនុស្សាវរីយ៍ (រូបថត៖ មន្ទីរពេទ្យយោធាលេខ ១៧៥)

ឆ្លើយតបទៅនឹងមនោសញ្ចេតនានេះ លោកនាយឧត្តមសេនីយ៍ លី សុវណ្ណ នាយកមន្ទីរពេទ្យព្រះកេតុមាលា បានថ្លែងអំណរគុណចំពោះមនោសញ្ចេតនានៃមន្ទីរពេទ្យយោធាលេខ ១៧៥។ ជាពិសេស ថ្នាក់ដឹកនាំមន្ទីរពេទ្យព្រះកេតុមាលា បានសម្តែងនូវការដឹងគុណចំពោះការលះបង់ និងការជួយគាំទ្រដ៏មានតម្លៃរបស់កងទ័ពស្ម័គ្រចិត្តវៀតណាម ក្នុងការតស៊ូដើម្បីជួយប្រជាជនកម្ពុជាឲ្យរួចផុតពីរបបប្រល័យពូជសាសន៍ ប៉ុល ពត ក៏ដូចជាជំនួយរបស់វៀតណាមក្នុងការកសាងប្រទេសកម្ពុជាឡើងវិញនាពេលបច្ចុប្បន្ន។

ក្នុងឱកាសនេះ គណៈប្រតិភូក៏បានទៅទស្សនាមន្ទីរពេទ្យព្រះកេតុមាលា។ នៅទីនេះ គណៈប្រតិភូបានជួប និងផ្លាស់ប្តូរព័ត៌មានជាមួយគ្រូពេទ្យនៅមន្ទីរពេទ្យ តាមរយៈនោះ ក្តាប់ស្ថានភាព ជម្រុញការជួយគាំទ្រផ្នែកវេជ្ជសាស្ត្រ និងការបណ្តុះបណ្តាលធនធានមនុស្សបន្ថែមទៀតនាពេលអនាគត។

នៅថ្ងៃនេះផងដែរ គណៈប្រតិភូបានទៅជូនពរឆ្នាំថ្មីនៅបញ្ជាការដ្ឋានកងទ័ពជើងទឹក កងយោធពលខេមរភូមិន្ទ។

គណៈប្រតិភូមន្ទីរពេទ្យយោធាលេខ ១៧៥ ទៅជូនពរឆ្នាំថ្មីប្រពៃណីនៅបញ្ជាការដ្ឋានកងទ័ពជើងទឹក (រូបថត៖ មន្ទីរពេទ្យយោធាលេខ ១៧៥)

ក្នុងជំនួបនោះ លោកឧត្តមនាវីឯក វណ្ណ ប៊ុនលៀង មេបញ្ជាការរង និងជានាយសេនាធិកាកងទ័ពជើងទឹក បានថ្លែងអំណរគុណចំពោះគណៈប្រតិភូ ហើយសម្តែងជំនឿថា ទំនាក់ទំនងរវាងកងទ័ពប្រទេសទាំងពីរនឹងកាន់តែរឹងមាំដោយក្លាយជាសសរស្តម្ភដ៏សំខាន់ក្នុងការរក្សាសន្តិភាព ស្ថិរភាព និងការអភិវឌ្ឍនៅក្នុងប្រទេសនីមួយៗ និងនៅក្នុងតំបន់៕

បកប្រែដោយ Thuy Anh