ពង្រឹងកិច្ចសហប្រតិបត្តិការរវាងវៀតណាម និងកម្ពុជានៅអង្គការសហប្រជាជាតិ
កប.អនឡាញ - នាពេលថ្មីៗនេះ លោក Dang Hoang Giang ឯកអគ្គរដ្ឋទូត ប្រធានស្ថានបេសកកម្មអចិន្ត្រៃយ៍វៀតណាមប្រចាំនៅអង្គការសហប្រជាជាតិ (ទីក្រុងញូវយ៉ក សហរដ្ឋអាមេរិក) បានទទួលជួបលោក កែវ ឈា ឯកអគ្គរាជទូតវិសាមញ្ញ និងពេញសមត្ថភាព និងជាតំណាងអចិន្ត្រៃយ៍ នៃព្រះរាជាណាចក្រកម្ពុជាប្រចាំអង្គការសហប្រជាជាតិ បន្ទាប់ពីលោក កែវ ឈា ជូនសារតាំងដល់ លោក Antonio Guterres អគ្គលេខាធិការ ក្នុងឱកាសចាប់ផ្តើមអាណត្តិបេសកកម្មនៅទីក្រុងញូវយ៉ក។
លោក Dang Hoang Giang បានសម្តែងនូវជំនឿជាក់ថា ជាមួយនឹងបទពិសោធន៍ដ៏សម្បូរបែបក្នុងកិច្ចការបរទេស ជាពិសេសក្នុងតួនាទីជាឯកអគ្គរដ្ឋទូតកម្ពុជាប្រចាំនៅសហរដ្ឋអាមេរិក លោក កែវ ឈា នឹងដឹកនាំស្ថានបេសកកម្មអចិន្ត្រៃយ៍កម្ពុជាប្រចាំអង្គការសហប្រជាជាតិ ឲ្យសម្រេចបានជោគជ័យជាច្រើន ចូលរួមចំណែកលើកកម្ពស់តួនាទីអន្តរជាតិរបស់ព្រះរាជាណាចក្រកម្ពុជា ក៏ដូចជាការរួមចំណែកពង្រឹងសាមគ្គីភាព និងតួនាទីរបស់អាស៊ាននៅអង្គការសហប្រជាជាតិ។
    |
 |
|
លោក Dang Hoang Giang ទទួលជួបលោក កែវ ឈា (រូបថត៖ baoquocte.vn) |
លោក កែវ ឈា បានបញ្ជាក់អំពីបំណងចង់ជំរុញទំនាក់ទំនងទ្វេភាគីរវាងកម្ពុជា និងវៀតណាម និងកិច្ចសហការរវាងស្ថានបេសកកម្មទាំងពីរនៅអង្គការសហប្រជាជាតិ ក៏ដូចជាក្នុងក្របខ័ណ្ឌនៃគណៈកម្មាធិការអាស៊ាននៅទីក្រុងញូវយ៉ក។
ក្នុងឱកាសនេះ លោកឯកអគ្គរាជទូតកម្ពុជា ក៏បានអបអរសាទរចំពោះប្រទេសវៀតណាមដែលត្រូវបានជ្រើសរើសជាសមាជិកនៃគណៈកម្មការអង្គការសហប្រជាជាតិ ស្តីពីច្បាប់ពាណិជ្ជកម្មអន្តរជាតិ (UNCITRAL) សម្រាប់អាណត្តិ ២០២៥-២០៣១។
ក្នុងបរិយាកាសស្និទ្ធស្នាលនៃជំនួបនេះ ឯកអគ្គរដ្ឋទូតទាំងពីរបានឯកភាពពង្រឹងកិច្ចសហប្រតិបត្តិការ និងគាំទ្រគ្នាទៅវិញទៅមកលើបញ្ហាដែលមានការយកចិត្តទុកដាក់ដូចគ្នា រួមចំណែកជម្រុញទំនាក់ទំនងមិត្តភាពវៀតណាម-កម្ពុជា “អ្នកជិតខាងល្អមិត្តភាពជាប្រពៃណី កិច្ចសហប្រតិបត្តិការលើគ្រប់ជ្រុងជ្រោយ ស្ថិតស្ថិរជាយូរអង្វែង ឆ្ពោះទៅអនាគត”៕
បកប្រែដោយ Thuy Anh