អ្នកបោះឆ្នោតវៀតណាមជាង ៧៨ លាននាក់ អនុវត្តសិទ្ធិ និងកាតព្វកិច្ចពលរដ្ឋនៅទិវាបុណ្យរបស់ប្រទេសជាតិ

យោងតាមរបាយការណ៍ពីខេត្ត និងក្រុងទាំង ៣៤ នៅទូទាំងប្រទេសមានអ្នកបោះឆ្នោតសរុបចំនួន ៧៨,៩២៨,៦៤៧ នាក់បានបោះឆ្នោតនៅការិយាល័យបោះឆ្នោតចំនួន ៧២,១៩៥។

សម្របខ្លួនជាមួយបរិយាកាសបោះឆ្នោតទូទាំងប្រទេស នៅព្រឹកថ្ងៃទី ១៥ ខែមីនា លោក To Lam អគ្គលេខាបក្ស; លោក Tran Cam Tu លេខាប្រចាំការនៃគណៈលេខាមជ្ឈិមបក្ស និងអ្នកបោះឆ្នោតនៅក្នុងតំបន់លំនៅដ្ឋាន  បានទៅអនុវត្តសិទ្ធិពលរដ្ឋនៅការិយាល័យបោះឆ្នោតលេខ ២ អង្គភាពបោះឆ្នោតលេខ ១ សង្កាត់ Ba Dinh ទីក្រុងហាណូយ។

លោក To Lam អគ្គលេខាបក្ស បោះឆ្នោតជ្រើសរើសសមាជិករដ្ឋសភានីតិកាលទី ១៦ និងសមាជិកក្រុមប្រឹក្សាប្រជាជនគ្រប់លំដាប់ថ្នាក់សម្រាប់អាណត្តិ  ២០២៦-២០៣១

បន្ទាប់ពីបោះឆ្នោត លោក To Lam អគ្គលេខាបក្ស បានអញ្ជើញមានប្រសាសន៍ថា៖  “ការបោះឆ្នោតលើកនេះធ្វើឡើងបន្ទាប់ពីយើងបានរៀបចំមហាសន្និបាតតំណាងទូទាំងប្រទេសលើកទី ១៤ របស់បក្សប្រកបដោយជោគជ័យ។  គោលនយោបាយ គោលការណ៍ និងទិសដៅទាំងអស់សម្រាប់ការអភិវឌ្ឍប្រទេសជាតិក្នុងអាណត្តិនេះ ក៏ដូចជាចក្ខុវិស័យសម្រាប់រយៈពេលអនាគត ត្រូវបានណែនាំ ផ្សព្វផ្សាយ និងទទួលបានការគាំទ្រយ៉ាងខ្លាំងពីប្រជាជន កម្មាភិបាល និងបក្ខជន។ ដូច្នេះ ការបោះឆ្នោតសមាជិករដ្ឋសភា និងសមាជិកក្រុមប្រឹក្សាប្រជាជនគ្រប់លំដាប់ថ្នាក់លើកនេះ បានប្រារព្ធឡើងបន្ទាប់ពីបានជ្រួតជ្រាបបណ្តាបញ្ហាជាមូលដ្ឋានបំផុតនៃគោលការណ៍ គោលនយោបាយ របស់បក្ស និងរដ្ឋ និងរបស់គ្រប់កម្រិត និងមូលដ្ឋាន ហើយត្រូវបានប្រជាជនស្រុះចិត្តគំនិតគាំទ្រ ដោយចាត់ទុកថា នេះជាទិវាបុណ្យរបស់ប្រទេសជាតិ ដើម្បីបង្ហាញពីសិទ្ធិសេរីភាព និងសិទ្ធិជាម្ចាស់របស់ខ្លួនដោយផ្ទាល់ ដើម្បីជ្រើសរើសបុគ្គលដែលមានកិត្យានុភាព និងភាពជឿជាក់គ្រប់គ្រាន់ ដើម្បីបំពេញភារកិច្ចរួមរបស់ប្រទេសជាតិ ក៏ដូចជានៅមូលដ្ឋាននានា”។

លោក Luong Cuong ប្រធានរដ្ឋ បោះឆ្នោតនៅការិយាល័យបោះឆ្នោតលេខ ២៦ សង្កាត់ Hoan Kiem ទីក្រុងហាណូយ

នាព្រឹកថ្ងៃដដែល លោក Luong Cuong ប្រធានរដ្ឋ បានអញ្ជើញទៅបោះឆ្នោតនៅការិយាល័យបោះឆ្នោតលេខ ២៦ សង្កាត់ Hoan Kiem ទីក្រុងហាណូយ; លោក Pham Minh Chinh នាយករដ្ឋមន្ត្រី អញ្ជើញទៅបោះឆ្នោតនៅការិយាល័យបោះឆ្នោតលេខ ២១ សង្កាត់ Tay Ho ទីក្រុងហាណូយ; និងលោក Tran Thanh Man ប្រធានរដ្ឋសភា អញ្ជើញទៅបោះឆ្នោតនៅការិយាល័យបោះឆ្នោតលេខ ១៤ ទីក្រុងហូជីមិញ។

លោក Pham Minh Chinh នាយករដ្ឋមន្ត្រី បោះឆ្នោតនៅការិយាល័យបោះឆ្នោតលេខ ២១ សង្កាត់ Tay Ho ទីក្រុងហាណូយ

លោក Tran Thanh Man ប្រធានរដ្ឋសភា បោះឆ្នោតនៅការិយាល័យបោះឆ្នោតលេខ ១៤ ទីក្រុងហូជីមិញ

ក្នុងពេលជាមួយគ្នានេះ នៅតាមការិយាល័យបោះឆ្នោតទូទាំងប្រទេស អ្នកបោះឆ្នោតយ៉ាងច្រើនកុះករបានមកអនុវត្តសិទ្ធិ និងកាតព្វកិច្ចរបស់ខ្លួន ដោយជ្រើសរើសតំណាងដើម្បីបញ្ចេញមតិរបស់អ្នកបោះឆ្នោត និងប្រជាជន៕

បកប្រែដោយ Thanh Cong