ក្រុមបេសកកម្មខេត្ត Gia Lai ទៅសួរសុខទុក្ខ និងជូនពរឆ្នាំថ្មីនៅច្រកទ្វារព្រំដែនអន្តរជាតិអូរយ៉ាដាវ
កប.អនឡាញ - ក្នុងឱកាសពិធីបុណ្យចូលឆ្នាំថ្មីប្រពៃណីជាតិនៃព្រះរាជាណាចក្រកម្ពុជា នារសៀលថ្ងៃទី៩ ខែមេសា ក្រុមបេសកកម្មដឹកនាំដោយលោក Nguyen Xuan Thuong អនុប្រធានគណៈកម្មការគ្រប់គ្រងមណ្ឌលសេដ្ឋកិច្ចខេត្ត Gia Lai ប្រទេសវៀតណាម បានទៅសួរសុខទុក្ខ និងជូនពរកងកម្លាំងមានសមត្ថកិច្ចនៅច្រកទ្វារព្រំដែនអន្តរជាតិអូរយ៉ាដាវ ខេត្តរតនគិរី។
តាងនាមក្រុមបេសកកម្ម លោក Nguyen Xuan Thuong បានជូនពរដល់កងកម្លាំងមានសមត្ថកិច្ចនៅច្រកទ្វារព្រំដែនអន្តរជាតិអូរយ៉ាដាវនូវសុខភាពល្អ សុភមង្គល និងវិបុលភាពក្នុងឆ្នាំថ្មី។ នាពេលកន្លងមកនេះ កិច្ចសហការ និងការជួយគាំទ្រពីកងកម្លាំងមានសមត្ថកិច្ចនៅច្រកទ្វារព្រំដែនអន្តរជាតិអូរយ៉ាដាវ បានបង្កើតលក្ខខណ្ឌអំណោយផលសម្រាប់ការនាំចូល-នាំចេញ និងការឆ្លងដែនរបស់ធុរកិច្ច និងប្រជាជននៅសងខាងច្រកទ្វារព្រំដែន។
|
|
ក្រុមបេសកកម្មគណៈកម្មការគ្រប់គ្រងមណ្ឌលសេដ្ឋកិច្ចខេត្ត Gia Lai ជូនអំណោយដល់កងកម្លាំងមានសមត្ថកិច្ចនៅច្រកទ្វារព្រំដែនអន្តរជាតិអូរយ៉ាដាវ (រូបថត៖ baogialai.com.vn) |
លោក Nguyen Xuan Thuong បានសង្ឃឹមថា នាពេលខាងមុខ ភាគីទាំងពីរនឹងបន្តបង្កើនកិច្ចសហការ និងអនុវត្តយ៉ាងល្អនូវខ្លឹមសារនៃកិច្ចសហប្រតិបត្តិការដែលចុះហត្ថលេខារវាងខេត្តទាំងពីរ បង្កើនការផ្លាស់ប្តូរព័ត៌មានដើម្បីការគ្រប់គ្រងតំបន់ព្រំដែនប្រកបដោយប្រសិទ្ធភាព។
ក្នុងកិច្ចជំនួបនេះ លោក ស៊ីម លីន ប្រធានច្រកទ្វារអន្តរជាតិអូយ៉ាដាវ បានសម្តែងនូវក្តីរីករាយចំពោះដំណើរទៅជូនពរឆ្នាំថ្មីរបស់ក្រុមបេសកកម្ម។ លោក ស៊ីម លីន ក៏មានបំណងផងដែរថា ច្រកទ្វារព្រំដែនទាំងពីរបន្តកិច្ចសហប្រតិបត្តិការ និងជួយគាំទ្រគ្នាទៅវិញទៅមកក្នុងការគ្រប់គ្រង ក៏ដូចជាបង្កើតលក្ខខណ្ឌអំណោយផលសម្រាប់ប្រជាពលរដ្ឋ និងធុរកិច្ចនៅច្រកទ្វារព្រំដែនទាំងពីរក្នុងសកម្មភាពផលិតកម្ម និងអាជីវកម្ម៕
បកប្រែដោយ Thuy Anh