ស្នងការដ្ឋាននគរបាលខេត្តមណ្ឌលគិរីអញ្ជើញមកសួរសុខទុក្ខ និងជូនពរឆ្នាំថ្មីដល់បញ្ជាការដ្ឋានកងទ័ពការពារព្រំដែនខេត្ត DaK Lak

តាងនាមថ្នាក់ដឹកនាំស្នងការដ្ឋាននគរបាលខេត្តមណ្ឌលគិរី លោកឧត្តមសេនីយ៍ត្រី ទៀងសៅរ័ត្ន បានជូនពរឆ្នាំថ្មីដល់កម្មាភិបាល យុទ្ធជននៃបញ្ជាការដ្ឋានកងទ័ពការពារព្រំដែនខេត្ត Dak Lak។  ព្រមទាំងលោកបានថ្លែងអំណរគុណចំពោះការយកចិត្តទុកដាក់ និងការជួយគាំទ្រពីបញ្ជាការដ្ឋានកងទ័ពការពារព្រំដែនខេត្ត Dak Lak  ចំពោះស្នងការដ្ឋាននគរបាលខេត្តមណ្ឌលគិរីនាពេលកន្លងមក ក៏ដូចជាក្នុងកិច្ចសហការការពារគ្រប់គ្រងព្រំដែន និងការថែទាំសុខភាពសម្រាប់កងកម្លាំងការពារព្រំដែនខេត្តមណ្ឌលគិរី។

ស្នងការដ្ឋាននគរបាលខេត្តមណ្ឌលគិរីអញ្ជើញមកសួរសុខទុក្ខ និងជូនពរឆ្នាំថ្មីដល់បញ្ជាការដ្ឋានកងទ័ពការពារព្រំដែនខេត្ត DaK Lak (រូប​ថត៖ bienphong.com.vn)

លោកឧត្តមសេនីយ៍ត្រី ទៀងសៅរ័ត្ន រំពឹងថាក្នុងរយៈពេលខាងមុខនេះ ភាគីទាំងពីរនឹងបន្តរក្សាចំណងសាមគ្គីភាព មិត្តភាព និងកិច្ចសហប្រតិបត្តិការក្នុងការគ្រប់គ្រងការពារព្រំដែន ការផ្លាស់ប្តូរព័ត៌មាន និងការប្រយុទ្ធប្រឆាំងនឹងឧក្រិដ្ឋកម្មគ្រប់ប្រភេទនៅតាមតំបន់ព្រំដែន។

តាងនាមកម្មាភិបាល និងយុទ្ធជននៃកងទ័ពការពារព្រំដែនខេត្ត Dak Lak  លោកវរសេនីយ៍ឯក Pham Huu Chien ប្រធាននយោបាយនៃកងទ័ពការពារព្រំដែនខេត្ត Dak Lak  បានថ្លែងអំណរគុណចំពោះការយកចិត្តទុកដាក់ និងមនោសញ្ចេតនាល្អដែលស្នងការដ្ឋាននគរបាលខេត្តមណ្ឌលគិរីបានផ្តល់ចំពោះកងទ័ពការពារព្រំដែនខេត្ត Dak Lak ។ លោកវរសេនីយ៍ឯក Pham Huu Chien សង្ឃឹមថា ក្នុងរយៈពេលខាងមុខនេះ ស្នងការដ្ឋាននគរបាលខេត្តមណ្ឌលគិរីនឹងបន្តសហការយ៉ាងជិតស្និទ្ធជាមួយកម្លាំងការពារព្រំដែនខេត្ត Dak Lak  ដើម្បីបំពេញឲ្យបានល្អនូវការគ្រប់គ្រងនិងការពារព្រំដែនរួមរវាងប្រទេសទាំងពីរ ហើយកសាងព្រំដែនមានសន្តិភាព មិត្តភាព កិច្ចសហប្រតិបត្តិការ និងការអភិវឌ្ឍន៍៕

បកប្រែដោយ Duy Hoan