ពិធីទទួលបដិសណ្ឋារកិច្ចស្វាគមន៍ លោក To Lam អគ្គលេខាបក្សកុម្មុយនីស្តវៀតណាម អញ្ជើញមកបំពេញទស្សនកិច្ចផ្លូវរដ្ឋនៅកម្ពុជា

សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា បានអញ្ជើញជាព្រះរាជតំណាងដ៏ខ្ពង់ខ្ពស់បំផុត របស់ព្រះករុណាព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ទទួលបដិសណ្ឋារកិច្ចស្វាគមន៍ផ្លូវរដ្ឋជូន លោក To Lam អគ្គលេខាបក្សកុម្មុយនីស្តវៀតណាម

លោក To Lam អគ្គលេខាបក្ស និងសម្តេចអគ្គមហាសេនាបតីតេជោ ហ៊ុន សែន  ប្រធានគណបក្សប្រជាជនកម្ពុជា អញ្ជើញត្រួតពលកងកិត្តិយស

ពិធីទទួលបដិសណ្ឋារកិច្ចស្វាគមន៍ លោក To Lam អគ្គលេខាបក្សកុម្មុយនីស្តវៀតណាម អញ្ជើញមកបំពេញទស្សនកិច្ចផ្លូវរដ្ឋនៅកម្ពុជាត្រូវបានធ្វើឡើងនៅព្រះបរមរាជវាំង

ក្នុងរយៈពេលថ្មីៗនេះ ទំនាក់ទំនងវៀតណាម-កម្ពុជា ទទួលបានលទ្ធផលវិជ្ជមាន និងជាក់ស្តែង។ ទំនុកចិត្តនយោបាយរវាងប្រទេសទាំងពីរត្រូវបានពង្រឹង ដែលបង្កើតជាមូលដ្ឋានរឹងមាំសម្រាប់កិច្ចសហប្រតិបត្តិការរួមក្នុងវិស័យផ្សេងៗ។ ថ្នាក់ដឹកនាំនៃប្រទេសទាំងពីរតែងតែបំពេញទស្សនកិច្ច និងជួបពិភាក្សាគ្នា ដែលរួមចំណែកដល់ការពង្រឹងទំនុកចិត្តនយោបាយ និងលើកដំណោះស្រាយដើម្បីជំនះការលំបាកបញ្ហាឧបសគ្គក្នុងកិច្ចសហប្រតិបត្តិការ បង្កើនប្រសិទ្ធភាពនៃកិច្ចសហប្រតិបត្តិការទ្វេភាគី។

កិច្ចសហប្រតិបត្តិការការពារជាតិសន្តិសុខមានភាពជិតស្និទ្ធដែលជាសសរស្តម្ភដ៏រឹងមាំមួយនៅក្នុងទំនាក់ទំនងរវាងប្រទេសទាំងពីរ។ កិច្ចសហប្រតិបត្តិការសេដ្ឋកិច្ច ពាណិជ្ជកម្ម និងវិនិយោគ មានការអភិវឌ្ឍគួរឱ្យកត់សម្គាល់។ តាមរយៈសកម្មភាពអប់រំ ការផ្លាស់ប្តូរវប្បធម៌ និងការចងសម្ព័ន្ធមេត្រីភាពវាងមូលដ្ឋាននានា ការយល់ដឹង និងចំណងមិត្តភាពជិតស្និទ្ធរវាងប្រជាជននៃប្រទេសទាំងពីរ ជាពិសេសយុវជនជំនាន់ក្រោយ ត្រូវបានពង្រឹងកាន់តែខ្លាំងឡើង ដែលក្លាយជាមូលដ្ឋានគ្រឹះដ៏រឹងមាំសម្រាប់ចំណង​មិត្តភាពរវាងវៀតណាម និងកម្ពុជា...

ដំណើរបំពេញទស្សនកិច្ចផ្លូវរដ្ឋរបស់លោក To Lam អគ្គលេខាបក្ស និងគណៈប្រតិភូជាន់ខ្ពស់វៀតណាមនៅព្រះរាជាណាចក្រកម្ពុជា មានសារៈសំខាន់ និងអត្ថន័យនយោបាយពិសេស ដែលបង្ហាញពីសារដ៏រឹងមាំរបស់បក្ស និងរដ្ឋវៀតណាម ក៏ដូចជារបស់លោក To Lam  អគ្គលេខាបក្សផ្ទាល់ ដែលតែងតែឱ្យតម្លៃ និងផ្តល់អាទិភាពដល់ការអភិវឌ្ឍ និងពូនជ្រំទំនាក់ទំនងភាពជាអ្នកជិតខាងល្អ មិត្តភាពជាប្រពៃណី កិច្ចសហប្រតិបត្តិការលើគ្រប់ជ្រុងជ្រោយ និងស្ថិរភាពយូរអង្វែងរវាងប្រទេសទាំងពីរ៕

បកប្រែដោយ Duy Hoan