ពូនជ្រំទំនាក់ទំនងអ្នកជិតខាងល្អរវាងវៀតណាមនិងកម្ពុជា

អញ្ជើញចូលរួមរួមមានអតីតអ្នកជំនាញ និងអតីតកងទ័ពស្ម័គ្រចិត្តវៀតណាមនៅកម្ពុជា រួមជាមួយនិស្សិតកម្ពុជាមួយចំនួនដែលកំពុងសិក្សានៅទីក្រុងហូជីមិញ។

ថ្លែងក្នុងពិធី លោកឧត្តមសេនីយ៍ត្រី Nguyen Van Nam ប្រធានសមាគមមិត្តភាពវៀតណាម-កម្ពុជាទីក្រុងហូជីមិញ បានសង្កត់ធ្ងន់លើទំនាក់ទំនងមិត្តភាពជាប្រពៃណី និងកិច្ចសហប្រតិបត្តិការដ៏ល្អរវាងប្រទេសទាំងពីរ ដែលត្រូវបានកសាងនិងពូនជ្រំក្នុងដំណើរការតស៊ូ រំដោះជាតិនិងកសាងប្រទេសជាតិ។

លោកឧត្តមសេនីយ៍ត្រី Nguyen Van Nam ប្រធានសមាគមមិត្តភាពវៀតណាម-កម្ពុជាទីក្រុងហូជីមិញ

សមាគមមិត្តភាពវៀតណាម-កម្ពុជាទីក្រុងហូជីមិញ បានរៀបចំសកម្មភាពជាក់ស្តែងជាច្រើនក្នុងឆ្នាំកន្លងមកដូចជា៖ រំលឹកខួបលើកទី ៤៦ នៃទិវាជ័យជម្នះក្នុងសង្គ្រាមព្រំដែនភាគនិរតី (ថ្ងៃទី៧ ខែមករា ឆ្នាំ១៩៧៩ - ថ្ងៃទី៧ ខែមករា ឆ្នាំ២០២៥) សហការរៀបចំពិធីបុណ្យចូលឆ្នាំថ្មី និងវេទិកាធុរកិច្ចវៀតណាម-កម្ពុជា ឆ្នាំ២០២៥ ដោយមានសហគ្រាសចូលរួមជាង ១២០ និងចុះហត្ថលេខាលើអនុស្សរណៈយោគយល់គ្នាជាច្រើនលើកិច្ចសហប្រតិបត្តិការសេដ្ឋកិច្ច។

សកម្មភាពផ្លាស់ប្តូរប្រជាជននិងប្រជាជនក៏ត្រូវបានជំរុញយ៉ាងខ្លាំងផងដែរ។ សមាគមបានសហការជាមួយកងពលធំលេខ ៣០២ រៀបចំគណៈប្រតិភូ និងនិស្សិតកម្ពុជាចំនួន១៥០ នាក់ ទៅទស្សនាកេរ្ដិ៍ដំណែលអង្គភាពលេខ ១២៥ ដែលជាកន្លែងបង្កើតកងកម្លាំងប្រដាប់អាវុធបដិវត្តន៍កម្ពុជាដឹកនាំដោយសម្ដេចតេជោ ហ៊ុន សែន។ សមាគមក៏បានចលនាសមាជិកធ្វើជា "ឪពុកម្តាយធម៌" សម្រាប់និស្សិតកម្ពុជាជាង ៥០នាក់ និងផ្តល់អាហារូបករណ៍ និងជួយនិស្សិតកម្ពុជាស្វែងយល់អំពីវប្បធម៌ និងប្រវត្តិសាស្ត្រវៀតណាម។

ប្រតិភូថតរូបជាអនុស្សាវរីយ៍

ក្នុងឆ្នាំ ២០២៥ ក្រុមគ្រូពេទ្យ Tam Viet និងសមាគមបានរៀបចំកម្មវិធីពិនិត្យសុខភាព ផ្ដល់ថ្នាំពេទ្យ និងអំណោយដល់ប្រជាជនក្រីក្ររាប់ពាន់នាក់នៅប្រទេសវៀតណាម កម្ពុជា និងឡាវ ដែលមានតម្លៃសរុបជិត ៧ ពាន់លានដុង។

លោកឧត្តមសេនីយ៍ត្រី Nguyen Van Nam បានអះអាងថា “ប្រជាជនទីក្រុងហូជីមិញតែងតែឱ្យតម្លៃ និងចូលរួមចំណែកយ៉ាងសកម្មចំពោះទំនាក់ទំនងមិត្តភាពជាប្រពៃណី និងកិច្ចសហប្រតិបត្តិការគ្រប់ជ្រុងជ្រោយរវាងរដ្ឋាភិបាល និងប្រជាជននៃប្រទេសទាំងពីរ”។

លោក ច័ន្ទ សូរិកាន អគ្គកុងស៊ុលកម្ពុជាប្រចាំទីក្រុងហូជីមិញ

ថ្លែងនៅក្នុងពិធីនេះ លោក ច័ន្ទ សូរិកាន អគ្គកុងស៊ុលកម្ពុជាប្រចាំទីក្រុងហូជីមិញ បានវាយតម្លៃខ្ពស់ចំពោះតួនាទីរបស់ទីក្រុងហូជីមិញក្នុងការលើកកម្ពស់ទំនាក់ទំនងអ្នកជិតខាងល្អ ដែលកំពុងអភិវឌ្ឍកាន់តែស៊ីជម្រៅ និងទូលំទូលាយជាងពេលណាៗទាំងអស់។

លោក ច័ន្ទ សូរិកាន ក៏បានបញ្ជាក់ផងដែរថា ស្ថានអគ្គកុងស៊ុលកម្ពុជាប្រចាំទីក្រុងហូជីមិញនឹងបន្តសហការយ៉ាងជិតស្និទ្ធជាមួយអង្គការ និងអាជីវកម្មរបស់វៀតណាមដើម្បីជំរុញកិច្ចសហប្រតិបត្តិការពាណិជ្ជកម្ម និងវិនិយោគ ឆ្ពោះទៅគោលដៅបង្កើនទំហំពាណិជ្ជកម្មទ្វេភាគីដល់ ២០ ពាន់លានដុល្លារអាមេរិកនាពេលឆាប់ៗ៕

បកប្រែដោយ Pham Diep