វៀតណាមជម្រុញទំនាក់ទំនងសហប្រតិបត្តិការលើវិស័យជាច្រើនជាមួយបណ្តាប្រទេស GCC និងប្រទេសប៊ូតាន
កប.អនឡាញ - ក្នុងក្របខ័ណ្ឌនៃកិច្ចប្រជុំកំពូលពិភពលោកលើកទីពីរស្តីពីការអភិវឌ្ឍសង្គម នៅទីក្រុងដូហា ប្រទេសកាតា លោកស្រី Nguyen Minh Hang អនុរដ្ឋមន្ត្រីក្រសួងការបរទេសវៀតណាម បានជួបជាមួយលោក Jasem Mohamed Albudaiwi អគ្គលេខាធិការក្រុមប្រឹក្សាសហប្រតិបត្តិការឈូងសមុទ្រ (GCC) លោក D.N. Dhungyel រដ្ឋមន្ត្រីក្រសួងការបរទេស និងពាណិជ្ជកម្មនៃប្រទេសប៊ូតាន លោក Ahmed bin Mohammed Al-Sayed រដ្ឋលេខាធិការទទួលបន្ទុកពាណិជ្ជកម្មក្រៅប្រទេសនៃប្រទេសកាតា លោក Tariq Alhamad អនុរដ្ឋមន្ត្រីទទួលបន្ទុកទំនាក់ទំនងអន្តរជាតិ ក្រសួងធនធានមនុស្ស និងអភិវឌ្ឍន៍សង្គមនៃប្រទេសអារ៉ាប៊ីសាអូឌីត។
ដោយមានក្ដីរីករាយដែលបានជួបជាមួយលោក Jasem Mohamed Albudaiwi អគ្គលេខាធិការ GCC លោកស្រី Nguyen Minh Hang បានអះអាងថា វៀតណាមយកចិត្តទុកដាក់យ៉ាងខ្លាំងចំពោះទំនាក់ទំនងសហប្រតិបត្តិការលើវិស័យជាច្រើនជាមួយបណ្ដាប្រទេស GCC ហើយស្នើឱ្យភាគីទាំងឡាយបង្កើនការផ្លាស់ប្តូរ ជំរុញការចរចាលើកិច្ចព្រមព្រៀងពាណិជ្ជកម្មសេរីវៀតណាម-GCC (FTA) ពង្រីកកិច្ចសហប្រតិបត្តិការក្នុងវិស័យថាមពល ឧស្សាហកម្មហាឡាល់ ជំនួបប្រាស្រ័យរវាងប្រជាជន និងប្រជាជនជាដើម។
    |
 |
|
លោកស្រី Nguyen Minh Hang និងលោក Jasem Mohamed Albudaiwi អគ្គលេខាធិការ GCC |
លោក Jasem Mohamed Albudaiwi បានបញ្ជាក់ពីការគាំទ្រការជំរុញការចរចាលើ FTA វៀតណាម-GCC និងការពង្រីកកិច្ចសហប្រតិបត្តិការរវាងវៀតណាម ជាមួយលេខាធិការដ្ឋាន និងបណ្ដាប្រទេស GCC រួមទាំងការអនុវត្តកិច្ចព្រមព្រៀងសហប្រតិបត្តិការរវាងក្រសួងការបរទេសវៀតណាម និងលេខាធិការដ្ឋាន GCC ឱ្យបានឆាប់។
នៅក្នុងកិច្ចប្រជុំជាមួយលោកស្រី Nguyen Minh Hang លោក D.N. Dhungyel រដ្ឋមន្ត្រីក្រសួងការបរទេស និងពាណិជ្ជកម្មនៃប្រទេសប៊ូតាន បានអះអាងថា ប៊ូតានយកចិត្តទុកដាក់យ៉ាងខ្លាំងចំពោះទំនាក់ទំនងជាមួយវៀតណាម ហើយចាត់ទុកថា ប្រទេសទាំងពីរនៅតែមានឱកាសច្រើនសម្រាប់កិច្ចសហប្រតិបត្តិការ។ លោកបានឯកភាពពង្រឹងទំនាក់ទំនងទ្វេភាគីនាពេលខាងមុខ ដោយផ្តោតលើវិស័យសក្តានុពលមួយចំនួនដូចជា ទេសចរណ៍ វិនិយោគ ការតភ្ជាប់ធុរកិច្ច...
ក្នុងកិច្ចពិភាក្សាជាមួយលោក Ahmed bin Mohammed Al-Sayed រដ្ឋលេខាធិការទទួលបន្ទុកពាណិជ្ជកម្មក្រៅប្រទេសនៃប្រទេសកាតា លោកស្រី Nguyen Minh Hang បានស្នើឱ្យភាគីទាំងពីរជំរុញការចរចាលើកិច្ចព្រមព្រៀងពាណិជ្ជកម្មសេរីវៀតណាម-GCC យ៉ាងឆាប់ៗ ពង្រឹងកិច្ចសហប្រតិបត្តិការក្នុងវិស័យវិនិយោគ ពាណិជ្ជកម្ម ឧស្សាហកម្មហាឡាល់ ការតភ្ជាប់ធុរកិច្ច... ភាគីទាំងពីរក៏បានឯកភាពគ្នាជំរុញការរៀបចំកិច្ចប្រជុំលើកទី៣ នៃគណៈកម្មាធិការចម្រុះវៀតណាម-កាតានៅក្នុងត្រីមាសទីមួយនៃឆ្នាំ២០២៦ខាងមុខ។
នៅក្នុងកិច្ចប្រជុំជាមួយលោក Tariq Alhamad អនុរដ្ឋមន្ត្រីទទួលបន្ទុកទំនាក់ទំនងអន្តរជាតិ ក្រសួងធនធានមនុស្ស និងអភិវឌ្ឍន៍សង្គមនៃប្រទេសអារ៉ាប៊ីសាអូឌីត លោកស្រី Nguyen Minh Hang បានសង្កត់ធ្ងន់លើសារៈសំខាន់នៃការជម្រុញទំនាក់ទំនងទ្វេភាគីរវាងប្រទេសទាំងពីរឡើងក្របខ័ណ្ឌសហប្រតិបត្តិការថ្មីមួយ ដើម្បីរួមចំណែកដល់ការអនុវត្តការប្តេជ្ញាចិត្តរបស់ថ្នាក់ដឹកនាំជាន់ខ្ពស់នៃប្រទេសទាំងពីរ។ លោក Tariq Alhamad បានស្នើឱ្យភាគីទាំងពីរបន្តសហការ និងចរចាយ៉ាងសកម្មឆ្ពោះទៅរកការចុះហត្ថលេខាលើកិច្ចព្រមព្រៀងសហប្រតិបត្តិការនានានៅពេលខាងមុខ រួមទាំងកិច្ចព្រមព្រៀងស្តីពីការជ្រើសរើសពលករវៀតណាមឱ្យទៅធ្វើការនៅអារ៉ាប៊ីសាអូឌីត៕
បកប្រែដោយ Thuy Anh