វៀតណាម-កម្ពុជាពង្រឹងពាណិជ្ជកម្ម បង្កើតឱកាសសហប្រតិបត្តិការអាជីវកម្ម

កម្មវិធីនេះគឺជាសកម្មភាពមួយក្នុងចំណោមសកម្មភាពជំរុញពាណិជ្ជកម្មវៀតណាម-កម្ពុជា ដើម្បីពង្រីកទីផ្សារ ទាញយកសក្តានុពលសេដ្ឋកិច្ច និងពង្រឹងទំនាក់ទំនងអ្នកជិតខាងល្អ។ នេះជាជំហានដ៏សំខាន់មួយ ដើម្បីជំរុញកិច្ចសហប្រតិបត្តិការសេដ្ឋកិច្ចវៀតណាម-កម្ពុជា ឲ្យអភិវឌ្ឍប្រកបដោយចីរភាព និងតភ្ជាប់យុទ្ធសាស្ត្រ។

ក្នុងសុន្ទរកថាបើក លោក ស៊ាង ថៃ រដ្ឋលេខាធិការក្រសួងពាណិជ្ជកម្មកម្ពុជា បានវាយតម្លៃខ្ពស់ចំពោះវត្តមានរបស់ធុរកិច្ចវៀតណាមនៅកម្ពុជា ហើយឲ្យដឹងថា ផលិតផលវៀតណាមជាច្រើនមានលក្ខណៈសមរម្យសម្រាប់តម្រូវការជាក់ស្តែងនៃទីផ្សារកម្ពុជា។ លោកក៏បានបញ្ជាក់ពីបំណងចង់មានសកម្មភាពតភ្ជាប់ស្រដៀងជាច្រើនបន្ថែមទៀត។ តាមការគ្រោងទុក នៅខែធ្នូ ឆ្នាំ២០២៥ ពិព័រណ៍ផ្សារណាត់ទំនិញវៀតណាមទ្រង់ទ្រាយធំនឹងធ្វើឡើងនៅរាជធានីភ្នំពេញ ដោយមានការរួមដំណើរពីក្រសួងឧស្សាហកម្ម និងពាណិជ្ជកម្មវៀតណាម ដើម្បីបើកឱកាសធ្វើអាជីវកម្មកាន់តែច្រើននៅកម្ពុជាសម្រាប់ធុរកិច្ចនៃភាគីទាំងពីរ។

ប្រតិភូចូលរួមកម្មវិធី​ (រូបថត៖ vov.vn)

តំណាងប្រទេសវៀតណាម លោក Bui Quang Hung នាយករងនៃនាយកដ្ឋានជំរុញពាណិជ្ជកម្ម បានសង្កត់ធ្ងន់លើដំណោះស្រាយជាច្រើនដូចជា៖ ការរៀបចំពិព័រណ៍ផ្សារណាត់ទំនិញវៀតណាមនៅរាជធានីភ្នំពេញ និងខេត្តធំៗនៃកម្ពុជា ការបង្កើតមូលដ្ឋានទិន្នន័យអនឡាញតភ្ជាប់អាជីវកម្មនៃប្រទេសទាំងពីរ។ល។

លោក Bui Quang Hung ក៏បានស្នើឲ្យក្រសួងពាណិជ្ជកម្មកម្ពុជាបង្កើតលក្ខណៈងាយសម្រួលសម្រាប់សកម្មភាពជំរុញពាណិជ្ជកម្មរវាងវៀតណាម និងកម្ពុជា ផ្តល់ព័ត៌មានដោយទាន់ពេលវេលាអំពីគោលនយោបាយស្ដីពីការនាំចូល និងជួយគាំទ្រការតភ្ជាប់ធុរកិច្ចវៀតណាមជាមួយសមាគម ប្រព័ន្ធចែកចាយ និងអ្នកនាំចូលធំៗរបស់កម្ពុជា។ 

កម្មវិធីនៅទីក្រុងភ្នំពេញមិនត្រឹមតែជួយធុរកិច្ចនៃប្រទេសទាំងពីរទទួលបានព័ត៌មានអំពីទីផ្សារប៉ុណ្ណោះទេ ថែមទាំងបង្កើតទំនាក់ទំនងសហប្រតិបត្តិការប្រកបដោយយូរអង្វែង និងនិរន្តរភាពផងដែរ។ ដោយមានការរួមដំណើរពីស្ថាប័នគ្រប់គ្រង សមាគម និងសហគមន៍ធុរកិច្ច ពាណិជ្ជកម្មទ្វេភាគីរវាងវៀតណាមនិងកម្ពុជា នឹងបន្តរីកចម្រើន រួមចំណែកនាំមកនូវផលប្រយោជន៍ជាក់ស្តែងដល់ធុរកិច្ច និងប្រជាជននៃប្រទេសទាំងពីរ៕

បកប្រែដោយ Thuy Anh