អបអរសាទរខួបលើកទី៥០ នៃទិវារំដោះភាគខាងត្បូង និងបង្រួបបង្រួមជាតិ នៅរាជធានីភ្នំពេញ

ក្នុងពិធីនេះមានការចូលរួមពីអាណិកជនវៀតណាមយ៉ាងច្រើនកុះករ លោក ស៊ឹម ជី ប្រធានសមាគមខ្មែរ-វៀតណាម បានសង្កត់ធ្ងន់ថា ព្រឹត្តិការណ៍ដ៏ពិសិដ្ឋនៃថ្ងៃ ៣០ មេសា ១៩៧៥ នឹងស្ថិតស្ថិរក្នុងដួងចិត្តប្រជាជនវៀតណាមគ្រប់រូបជារៀងរហូត។ ក្នុងនោះ អាណិជនវៀតណាមនៅកម្ពុជា គឺជាសហគមន៍មួយដែលបានរួមចំណែកជាវិជ្ជមានដល់ជ័យជំនះដ៏ធំធេងនេះ ដោយសារពួកគេបានការពារកម្មាភិបាលបដិវត្តន៍ និងកម្លាំងស្នូលនៃបដិវត្តន៍ភាគខាងត្បូងវៀតណាម ហើយ​និងចូលរួមដោយផ្ទាល់ក្នុងការតស៊ូប្រយុទ្ធរំដោះភាគខាងត្បូង និងបង្រួបបង្រួមជាតិ។

ទិដ្ឋភាពនៃពិធី (រូបថត៖ vov.vn)

លោក ស៊ឹម ជី ប្រធានសមាគមខ្មែរ-វៀតណាម មានប្រសាសន៍ក្នុងពិធី (រូបថត៖ vov.vn)

បច្ចុប្បន្ននេះ សហគមន៍វៀតណាមនៅកម្ពុជាតែងតែត្រូវបានបក្ស រដ្ឋវៀតណាមចាត់ទុកជាផ្នែកមួយមិនអាចកាត់ផ្តាច់បានរបស់វៀតណាម ដោយតែងតែយកចិត្តទុកដាក់ និងជួយគាំទ្រលើគ្រប់ទិដ្ឋភាពទាំងអស់។ ទោះបីជាធ្វើការនិងរស់នៅឆ្ងាយពីប្រទេសកំណើតក៏ដោយ ក៏សហគមន៍វៀតណាមនៅកម្ពុជាតែងតែចងចាំ និងបង្ហាញស្មារតីស្រឡាញ់ជាតិមាតុភូមិ ជាពិសេសប្រពៃណីដ៏រុងរឿងរបស់ជនជាតិវៀតណាមក្នុងដំណើរការកសាង និងការពារមាតុភូមិ។

ការសម្តែង​មួយ​ក្នុងពិធី (រូបថត៖ vov.vn)

មានប្រសាសន៍ក្នុងពិធិ លោក Nguyen Minh Vu ឯកអគ្គរដ្ឋទូតវៀតណាមប្រចាំនៅកម្ពុជា បានសង្កត់ធ្ងន់ថា៖ ការប្រារព្ធខួបទិវា ៣០ មេសា ក៏ជាឱកាសដើម្បីយើងសម្តែងការ​ដឹងគុណចំពោះការគាំទ្រដ៏ធំធេងរបស់មិត្តភក្តិអន្តរជាតិ រួមទាំងប្រជាជនកម្ពុជាក្នុងបុព្វហេតុរំដោះភាគខាងត្បូង និងបង្រួបបង្រួមជាតិ។

លោក Nguyen Minh Vu ឯកអគ្គរដ្ឋទូត បានមានប្រសាសន៍ថា៖ “ប្រជាជនកម្ពុជាបានចែករំលែកការលំបាក រួមសុខរួមទុក្ខ” ក្នុងការតស៊ូប្រយុទ្ធដ៏យូរអង្វែងរបស់ប្រជាជនវៀតណាម។ រាល់ការជួយគាំទ្រ និងការលះបង់ដ៏ធំធេងរបស់ប្រជាជនកម្ពុជាបានជួយកងទ័ព និងប្រជាជនវៀតណាមសម្រេចបានជ័យជំនះជាប្រវត្តិសាស្ត្រនៅថ្ងៃទី ៣០ ខែមេសា ដែលជាមូលដ្ឋានសម្រាប់វៀតណាមបង្រួបបង្រួមជាតិ និងបោះជំហានយ៉ាងរឹងមាំនៅលើមាគ៌ាអភិវឌ្ឍន៍។

លោក Nguyen Minh Vu ឯកអគ្គរដ្ឋទូត មានប្រសាសន៍ក្នុងពិធី (រូបថត៖ vov.vn)

លោក Nguyen Minh Vu ឯកអគ្គរដ្ឋទូត បានបញ្ជាក់ថា កងទ័ព និងប្រជាជនវៀតណាម រួមទាំងការរួមចំណែកយ៉ាងសំខាន់របស់សហគមន៍អាណិកជនវៀតណាមនៅកម្ពុជា ក៏បានលះបង់សាច់ស្រស់ឈាមស្រស់ជួយកម្ពុជាក្នុងបុព្វហេតុរំដោះជាតិ ជាពិសេសក្នុងការផ្តួលរំលំរបបប្រល័យពូជសាសន៍ ប៉ុល ពត។ ទាំងនេះជាមនោសញ្ចេតនាដ៏មានតម្លៃបំផុតរបស់ប្រទេសទាំងពីរ ជនជាតិទាំងពីរ និងប្រជាជននៃប្រទេសទាំងពីរ។

លោក Nguyen Minh Vu ឯកអគ្គរដ្ឋទូត បានសម្តែងនូវក្តីសោមនស្សរីករាយចំពោះការដែលសម្តេចតេជោ ហ៊ុន សែន ប្រធានព្រឹទ្ធសភា ប្រធានគណបក្សប្រជាជនកម្ពុជា  នឹងដឹកនាំគណៈប្រតិភូជាន់ខ្ពស់កម្ពុជាអញ្ជើញចូលរួមពិធីរំលឹកខួបលើកទី ៥០ នៃទិវារំដោះភាគខាងត្បូង និងបង្រួបបង្រួមជាតិ ក៏ដូចជាការចូលរួមរបស់កងទ័ពកម្ពុជាក្នុងពិធីដង្ហែក្បួន​ព្យុហយាត្រានៅទីក្រុងហូជីមិញ ដែលបង្ហាញចំណងសាមគ្គីភាព មិត្តភាពជាប្រពៃណីរបស់ប្រទេសទាំងពីរ ក៏ដូចជាការយកចិត្តទុកដាក់ពិសេសរបស់ថ្នាក់ដឹកនាំ កងទ័ព និងប្រជាជនកម្ពុជា ក្នុងឱកាសពិធីបុណ្យដ៏សំខាន់របស់ប្រជាជនវៀតណាម៕

បកប្រែដោយ Duy Hoan