បន្តជំរុញទំនាក់ទំនងទ្វេភាគីវៀតណាម-កម្ពុជា ឱ្យឡើងកម្រិតកម្ពស់ថ្មី

សម្តេច ហេង សំរិន ទទួលជួបលោកឯកអគ្គរដ្ឋទូត Nguyen Minh Vu អញ្ជើញចូលជួបសម្តែងការគួរសម (រូបថត៖ vnanet.vn)

ក្នុងជំនួបនោះ សម្តេច ហេង សំរិន បានអបអរសាទរចំពោះលោកឯកអគ្គរដ្ឋទូត  Nguyen Minh Vu ដែលមកបំពេញភារកិច្ចនៅព្រះរាជាណាចក្រកម្ពុជា និងបានវាយតំលៃខ្ពស់ចំពោះការអភិវឌ្ឍរបស់វៀតណាម ហើយសង្ឃឹមថាលោកឯកអគ្គរដ្ឋទូត Nguyen Minh Vu នឹងបន្តជំរុញទំនាក់ទំនងទ្វេភាគីឡើងកម្រិតកំពស់ថ្មី។

ដោយបានវាយតម្លៃខ្ពស់ចំពោះទំនាក់ទំនងប្រពៃណីល្អរវាងវៀតណាម និងកម្ពុជា និងចាត់ទុកថាជាទ្រព្យសម្បត្តិដែលមិនអាចកាត់ថ្លៃបានរបស់ប្រទេសទាំងពីរ សម្តេច ហេង សំរិន បានសម្តែងនូវជំនឿថា វៀតណាមក្រោមការដឹកនាំរបស់បក្សកុម្មុយនិស្តវៀតណាម ដែលដឹកនាំដោយលោកអគ្គលេខាបក្ស To Lam នឹងអនុវត្តការកែទម្រង់ និងបង្រួមប្រព័ន្ធរដ្ឋបាលប្រកបដោយជោគជ័យ។ ប្រធានកិត្តិយសគណបក្សប្រជាជនកម្ពុជា បានថ្លែងអំណរគុណចំពោះប្រទេសវៀតណាម ដែលតែងតែគាំទ្រ និងជួយកម្ពុជានាពេលកន្លងមក និងបច្ចុប្បន្ន រួមទាំងជំនួយចំនួន ២៥ លានដុល្លារ ដើម្បីសាងសង់អគាររដ្ឋបាលថ្មីរបស់រដ្ឋសភាកម្ពុជា។ ទន្ទឹមនឹងនោះ សម្តេច ហេង សំរិន បានអបអរសាទរចំពោះជោគជ័យនៃកិច្ចប្រជុំកំពូលនាពេលថ្មីៗនេះរវាងថ្នាក់ដឹកនាំនៃគណបក្សទាំងពីរ ប្រទេសទាំងពីរ និងរវាងគណបក្សទាំងបី (វៀតណាម កម្ពុជា ឡាវ) នៅទីក្រុងហូជីមិញ។ សម្តេច ហេង សំរិន ក៏បានផ្តាំផ្ញើសួរសុខទុក្ខជូនថ្នាក់ដឹកនាំជាន់ខ្ពស់វៀតណាម និងជូនពរឆ្នាំថ្មីប្រពៃណីជាតិខ្មែរជូនចំពោះលោកឯកអគ្គរដ្ឋទូត និងបុគ្គលិក នៃស្ថានទូតវៀតណាមប្រចាំនៅកម្ពុជា។

ចំណែកលោកឯកអគ្គរដ្ឋទូត Nguyen Minh Vu បានថ្លែងអំណរគុណចំពោះសម្តេច ហេង សំរិន ដែលបានចំណាយពេលវេលាដ៏មានតំលៃរបស់ខ្លួនដើម្បីអញ្ជើញទទួលជួបលោក ព្រមទាំងបានពាំនាំនូវការសួរសុខទុក្ខ និងជូនពរពីថ្នាក់ដឹកនាំជាន់ខ្ពស់វៀតណាមផងដែរ។

ដោយវាយតំលៃខ្ពស់ចំពោះការរួមចំណែករបស់សម្តេច ហេង សំរិន ក្នុងការកសាង និងពង្រឹងទំនាក់ទំនងកិច្ចសហប្រតិបត្តិការរវាងគណបក្សទាំងពីរ រដ្ឋសភា និងរណសិរ្សមាតុភូមិ នៃប្រទេសទាំងពីរ លោកឯកអគ្គរដ្ឋទូតវៀតណាមបានអបអរសាទរចំពោះការអភិវឌ្ឍដ៏ខ្លាំងក្លារបស់កម្ពុជាលើគ្រប់វិស័យ ដោយបញ្ជាក់ពីតួនាទីដឹកនាំរបស់គណបក្សប្រជាជនកម្ពុជា និងសម្តេច ហេង សំរិន ផ្ទាល់ ក្នុងជោគជ័យទាំងនេះ។

ដោយសម្តែងនូវកិត្តិយសដែលត្រូវបានតែងតាំងជាឯកអគ្គរដ្ឋទូតវៀតណាមប្រចាំនៅកម្ពុជា លោកឯកអគ្គរដ្ឋទូត Nguyen Minh Vu បានសន្យាថានឹងខិតខំប្រឹងប្រែងជំរុញកិច្ចសហប្រតិបត្តិការលើគ្រប់វិស័យ ជាពិសេសនយោបាយ ការពារជាតិ-សន្តិសុខ សេដ្ឋកិច្ច និងការប្រាស្រ័យទាក់ទងរវាងប្រជាជន នៃប្រទេសទាំងពីរ។

លោកនាយឧត្តមសេនីយ៍ ទៀ សីហា ទទួលជួបលោកឯកអគ្គរដ្ឋទូត Nguyen Minh Vu (រូបថត៖ vnanet.vn)

នារសៀលថ្ងៃដដែល លោកឯកអគ្គរដ្ឋទូត Nguyen Minh Vu បានអញ្ជើញចូលជួបសម្តែងការគួរសមលោកនាយឧត្តមសេនីយ៍ ទៀ សីហា ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិកម្ពុជា។ ក្នុងជំនួបនោះ លោកនាយឧត្តមសេនីយ៍ ទៀ សីហា បានអបអរសាទរលោកឯកអគ្គរដ្ឋទូត Nguyen Minh Vu ដែលមកបំពេញភារកិច្ចនៅកម្ពុជា ហើយជឿជាក់ថា លោកឯកអគ្គរដ្ឋទូតនឹងទទួលបានជោគជ័យក្នុងអាណត្តិការងាររបស់ខ្លួន រួមចំណែកយ៉ាងសំខាន់ក្នុងការអភិវឌ្ឍទំនាក់ទំនង “ភាពជាអ្នកជិតខាងល្អ មិត្តភាពជាប្រពៃណី កិច្ចសហប្រតិបត្តិការលើគ្រប់វិស័យ និងស្ថិតស្ថិរយូរអង្វែង” រវាងវៀតណាម និងកម្ពុជា។

លោកឯកអគ្គរដ្ឋទូត Nguyen Minh Vu បានសម្តែងនូវកិត្តិយសដែលត្រូវបានតែងតាំងជាឯកអគ្គរដ្ឋទូតវៀតណាមប្រចាំព្រះរាជាណាចក្រកម្ពុជា ព្រមទាំងបានពាំនាំការសួរសុខទុក្ខពីសំណាក់លោកនាយឧត្តមសេនីយ៍ Phan Van Giang រដ្ឋមន្ត្រីក្រសួងការពារប្រទេសវៀតណាម ជូនចំពោះលោកនាយឧត្តមសេនីយ៍ ទៀ សីហា។ ដោយសម្តែងការចាប់អារម្មណ៍ និងវាយតម្លៃខ្ពស់ចំពោះការអភិវឌ្ឍដ៏ឆាប់រហ័សរបស់កម្ពុជា លោកឯកអគ្គរដ្ឋទូត Nguyen Minh Vu បានអបអរសាទរចំពោះសមិទ្ធិផលដ៏អស្ចារ្យលើគ្រប់វិស័យដែលប្រជាជនកម្ពុជាសម្រេចបាននាពេលថ្មីៗនេះ ក្រោមការដឹកនាំដ៏ឈ្លាសវៃរបស់គណបក្សប្រជាជនកម្ពុជា ដែលដឹកនាំដោយសម្តេចតេជោ ហ៊ុន សែន និងរាជរដ្ឋាភិបាលកម្ពុជា ដឹកនាំដោយសម្តេចធិបតី ហ៊ុន ម៉ាណែត។

លោកឯកអគ្គរដ្ឋទូត Nguyen Minh Vu បានវាយតម្លៃខ្ពស់ចំពោះកិច្ចសហប្រតិបត្តិការលើវិស័យការពារជាតិប្រកបដោយប្រសិទ្ធភាពរវាងប្រទេសទាំងពីរ ដោយអះអាងថា នេះគឺជាសសរស្តម្ភក្នុងទំនាក់ទំនងសហប្រតិបត្តិការរវាងវៀតណាម និងកម្ពុជា។

ដោយអះអាងថា កងទ័ពនៃប្រទេសទាំងពីរតែងតែប្រកៀកស្មាគ្នា និងរួបរួមគ្នាក្នុងការតស៊ូការពារឯករាជ្យ និងសន្តិភាព នៃប្រទេសនីមួយៗ លោកឯកអគ្គរដ្ឋទូតវៀតណាមបានថ្លែងអំណរគុណចំពោះភាគីកម្ពុជាដែលតែងតែបង្កើតលក្ខខណ្ឌអំណោយផលសម្រាប់ការស្វែងរក ធ្វើមាតុភូមិនិវត្តន៍អដ្ឋិធាតុកងទ័ពស្ម័គ្រចិត្ត និងអ្នកជំនាញវៀតណាម ដែលបានពលីជីវិតនៅកម្ពុជាក្នុងសម័យសង្គ្រាម។

ក្នុងឱកាសនេះ លោកឯកអគ្គរដ្ឋទូត Nguyen Minh Vu បានចែករំលែកនូវទិសដៅការងារមួយចំនួននាពេលខាងមុខ រួមទាំងជំរុញផែនការសហប្រតិបត្តិការជាក់លាក់លើវិស័យផ្សេងៗរវាងក្រសួង និងស្ថាប័ននានា នៃប្រទេសទាំងពីរ ដោយផ្អែកលើទិសដៅដែលបានឯកភាពដោយថ្នាក់ដឹកនាំជាន់ខ្ពស់នៃប្រទេសទាំងពីរក្នុងកិច្ចប្រជុំកំពូលនៅទីក្រុងហូជីមិញ។ ជំរុញកិច្ចសហប្រតិបត្តិការរវាងក្រសួងការពារជាតិនៃប្រទេសទាំងពីរក្នុងការផ្លាស់ប្តូរគណៈប្រតិភូគ្រប់ជាន់ថ្នាក់ ការបណ្តុះបណ្តាលធនធានមនុស្ស និងអនុវត្តពិធីសារសហប្រតិបត្តិការលើវិស័យការពារជាតិ ដំណាក់កាល ២០២៥-២០២៩ និងផែនការសហប្រតិបត្តិការឆ្នាំ ២០២៥ រវាងភាគីទាំងពីរ។ ជំរុញការបញ្ចប់ការសាងសង់ហេដ្ឋារចនាសម្ព័ន្ធនៅច្រកទ្វារព្រំដែន Tan Nam (ខេត្ត Tay Ninh) ដើម្បីឲ្យភាគីទាំងពីររៀបចំពិធីសម្ពោធដាក់ឲ្យប្រើប្រាស់ជាផ្លូវការនូវច្រកទ្វារព្រំដែន Tan Nam - ម៉ឺនជ័យ ក្នុងត្រីមាសទី៣ ឆ្នាំ២០២៥នេះ ព្រមទាំងជំរុញឱ្យភាគីទាំងពីរឯកភាពគ្នាអំពីចំណុចតភ្ជាប់ផ្លូវល្បឿនលឿនភ្នំពេញ-បាវិត និងម៉ុកបៃ-ហូជីមិញ។

លោកនាយឧត្តមសេនីយ៍ ទៀ សីហា បានថ្លែងអំណរគុណភាគីវៀតណាមដែលបានទទួលស្វាគមន៍យ៉ាងកក់ក្តៅចំពោះគណៈប្រតិភូកម្ពុជា និងបានវាយតម្លៃខ្ពស់ចំពោះកិច្ចប្រជុំកំពូលរវាងគណបក្សទាំងពីរ និងគណបក្សទាំងបីនៅទីក្រុងហូជីមិញក្នុងខែកុម្ភៈ ឆ្នាំ២០២៥ ហើយបង្ហាញសេចក្តីរីករាយដែលបានឃើញការអភិវឌ្ឍយ៉ាងឆាប់រហ័សរបស់វៀតណាម ក្នុងនោះសន្តិសុខ និងសណ្តាប់ធ្នាប់សង្គម ត្រូវបានធានា ជីវភាពរស់នៅរបស់ប្រជាជនត្រូវបានកែលម្អ។ ជាមួយគ្នានេះ លោកនាយឧត្តមសេនីយ៍ ទៀ សីហា បានសម្តែងនូវក្តីរីករាយចំពោះទំនាក់ទំនងដ៏ជិតស្និទ្ធរវាងក្រសួងការពារជាតិនៃប្រទេសទាំងពីរ។

ដោយអះអាងថា ភាគីទាំងពីរបានផ្លាស់ប្តូរគណៈប្រតិភូគ្រប់លំដាប់​ថ្នាក់ជាប្រចាំ និងរៀបចំកិច្ចប្រជុំទ្វេភាគី និងត្រីភាគីជាមួយឡាវនៅវេទិកាតំបន់ និងអន្តរជាតិ ដើម្បីបង្ហាញពីសាមគ្គីភាព និងមិត្តភាពរវាងកម្ពុជា-វៀតណាម និងកម្ពុជា-ឡាវ-វៀតណាម លោកនាយឧត្តមសេនីយ៍ ទៀ សីហា បានថ្លែងអំណរគុណវៀតណាមចំពោះការគាំទ្រក្នុងការបណ្តុះបណ្តាលធនធានមនុស្សសម្រាប់ក្រសួងការពារជាតិកម្ពុជា និងសម្តែងនូវការគាំទ្រភាគីទាំងពីរជំរុញការឯកភាពគ្នាលើចំណុចតភ្ជាប់រវាងផ្លូវល្បឿនលឿនទីក្រុងហូជីមិញ-ម៉ុកបៃ និងបាវិត-ភ្នំពេញ។ ជាមួយគ្នានេះ ផ្តល់ព័ត៌មានអំពីផែនការរបស់កម្ពុជាក្នុងការសាងសង់ផ្លូវល្បឿនលឿនបាវិត-កំពង់ធំ រួមចំណែកលើកកម្ពស់វិស័យទេសចរណ៍ និងការប្រាស្រ័យទាក់ទងប្រជាជននៃប្រទេសទាំងពីរ។

លោកនាយឧត្តមសេនីយ៍ ទៀ សីហា បានសង្កត់ធ្ងន់ថា ទំនាក់ទំនងសហប្រតិបត្តិការរវាងប្រទេសទាំងពីរនឹងអភិវឌ្ឍជានិច្ច ហើយបញ្ហានានានឹងត្រូវបានដោះស្រាយ ដើម្បីការអភិវឌ្ឍរួមនៃប្រទេសទាំងពីរវៀតណាម និងកម្ពុជា៕

បកប្រែដោយ Duy Hoan