បន្តថែរក្សា និងពូនជ្រុំទំនាក់ទំនងវៀតណាម-កម្ពុជា ឱ្យកាន់តែរីកចម្រើន និងរឹងមាំថែមទៀត

នេះជាព្រឹត្តិការណ៍ដ៏សំខាន់ ក្នុងបំណងពង្រឹងបន្ថែមទៀតនូវទំនាក់ទំនងអ្នកជិតខាងល្អ មិត្តភាពជាប្រពៃណី កិច្ចសហប្រតិបត្តិការគ្រប់ជ្រុងជ្រោយ និរន្តរភាពយូរអង្វែងរវាងបក្សទាំងពីរ រដ្ឋទាំងពីរ និងប្រជាជននៃប្រទេសទាំងពីរ វៀតណាម-កម្ពុជាក្នុងស្ថានភាពថ្មី។

ជំនួបជាន់ខ្ពស់រវាងការិយាល័យនយោបាយនៃបក្សកុម្មុយនិស្តវៀតណាម និងគណៈអចិន្ត្រៃយ៍ នៃគណៈកម្មាធិការកណ្តាលគណបក្សប្រជាជនកម្ពុជា (រូបថត៖ vnanet.vn)

នៅក្នុងជំនួប លោកអគ្គលេខាបក្ស To Lam និងសម្ដេចតេជោ ហ៊ុន សែន ប្រធានគណបក្សប្រជាជនកម្ពុជា បានជម្រាបជូនគ្នាទៅវិញទៅមកអំពីស្ថានភាពរបស់បក្សនីមួយៗ និងប្រទេសនីមួយៗ ព្រមទាំងពិភាក្សាអំពីស្ថានភាពពិភពលោក តំបន់ និងខ្លឹមសារមួយចំនួនដែលភាគីទាំងពីរមានការយកចិត្តទុកដាក់ដូចគ្នា។ ភាគីទាំងពីរបានវាយតម្លៃចំពោះលទ្ធផលនៃកិច្ចសហប្រតិបត្តិការរវាងភាគីទាំងពីរនាពេលកន្លងមក ហើយឯកភាពលើទិសដៅសហប្រតិបត្តិការនាពេលខាងមុខ។

លោក To Lam អគ្គលេខាគណៈកម្មាធិការមជ្ឈិមបក្សកុម្មុយនិស្តវៀតណាមនៅក្នុងជំនួប (រូបថត៖ vnanet.vn)

មេដឹកនាំទាំងពីរបានឯកភាពគ្នាបន្តពង្រឹងថែមទៀតនូវទំនាក់ទំនងនយោបាយដើម្បីតម្រង់ទិសទំនាក់ទំនងរួមរវាងបក្សទាំងពីរ ប្រទេសទាំងពីរ អភិវឌ្ឍន៍ទំនាក់ទំនងដ៏ល្អប្រសើររវាងថ្នាក់ដឹកនាំនៃភាគីទាំងពីរ អនុវត្តប្រកបដោយប្រសិទ្ធភាពនូវកិច្ចព្រមព្រៀងជាន់ខ្ពស់រវាងបក្សទាំងពីរ និងប្រទេសទាំងពីរ; ពង្រឹងកិច្ចសហប្រតិបត្តិការលើវិស័យការពារជាតិ សន្តិសុខ ជំរុញកិច្ចសហប្រតិបត្តិការសេដ្ឋកិច្ច ពាណិជ្ជកម្ម វប្បធម៌ អប់រំ និងទេសចរណ៍ ឲ្យសក្តិសមនឹងសក្ដានុពល និងប្រៀបខ្លាំងរបស់ប្រទេសនីមួយៗ។ ទន្ទឹមនឹងនោះ ពង្រឹងកិច្ចសហប្រតិបត្តិការប្រកបដោយប្រសិទ្ធភាព និងជាក់ស្តែងរវាងស្ថាប័ននានារបស់បក្ស រដ្ឋសភា ក្រសួង ស្ថាប័នរបស់រដ្ឋាភិបាល រណសិរ្សមាតុភូមិ អង្គការមហាជន និងមូលដ្ឋាននានារបស់ប្រទេសទាំងពីរ។

សម្ដេចតេជោ ហ៊ុន សែន ប្រធានគណបក្សប្រជាជនកម្ពុជា ប្រធានព្រឹទ្ធសភាកម្ពុជានៅក្នុងជំនួប (រូបថត៖ vnanet.vn)

ក្នុងជំនួបនេះផងដែរ លោក Pham Minh Chinh នាយករដ្ឋមន្រ្តីវៀតណាម និងសម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានឯកភាពនឹងការវាយតម្លៃ និងទិសដៅសំខាន់ៗរបស់លោកអគ្គលេខាបក្ស To Lam និងសម្ដេចតេជោ ហ៊ុន សែន ប្រធានគណបក្សប្រជាជនកម្ពុជា ស្តីពីទំនាក់ទំនងគ្រប់ជ្រុងជ្រោយ និងស៊ីជម្រៅរវាងបក្សទាំងពីរ និងប្រទេសទាំងពីរ។ នាយករដ្ឋមន្ត្រីទាំងពីរបានឯកភាពលើខ្លឹមសារសំខាន់មួយចំនួនដែលត្រូវអនុវត្តក្នុងពេលឆាប់ៗនេះ ជាពិសេសការអនុវត្តគំនិតផ្ដួចផ្ដើមអំពីការតភ្ជាប់សេដ្ឋកិច្ចនៃប្រទេសទាំងពីរវៀតណាមនិងកម្ពុជា ក៏ដូចជាសេដ្ឋកិច្ចទាំងបីរបស់វៀតណាម កម្ពុជា និងឡាវផងដែរ៕

បកប្រែដោយ Thanh Cong