មិត្តហ្វូនទទួលបានគ្រឿងឥស្សរិយយសពលកម្មថ្នាក់ទីពីរ

លោកនាយឧត្តមសេនីយ៍ Phan Van Giang អបអរសាទរចំពោះសមិទ្ធផលរបស់មិត្តហ្វូន

តាងនាមបក្ស រដ្ឋ គណៈកម្មាធិការបក្សយោធាមជ្ឈិម ក្រសួងការពារប្រទេសវៀតណាម លោកនាយឧត្តមសេនីយ៍ Phan Van Giang បានកោតសរសើរ និងអបអរសាទរយ៉ាងកក់ក្តៅចំពោះសមិទ្ធិផលដែលមិត្តហ្វូនសម្រេចបាននាពេលថ្មីៗនេះ។ ដើម្បីបន្តនូវលទ្ធផលដែលសម្រេចបាន និងរួមចំណែកកាន់តែធំក្នុងការអភិវឌ្ឍរួមនៃទំនាក់ទំនងវៀតណាម-កម្ពុជា លោកនាយឧត្តមសេនីយ៍ Phan Van Giang បានស្នើឱ្យក្រុមហ៊ុនមិត្តហ្វូនបន្តយល់យ៉ាងស៊ីជម្រៅនូវគោលការណ៍ និងទស្សនៈរបស់បក្ស រដ្ឋ និងកងទ័ពស្តីពីសមាហរណកម្មអន្តរជាតិ និងកិច្ចការបរទេសការពារជាតិ។ ពង្រឹង និងលើកកម្ពស់ជំហរ និងតួនាទីរបស់ខ្លួនជានិមិត្តរូបនៃកិច្ចសហប្រតិបត្តិការប្រកបដោយជោគជ័យ និងជាស្ពានតភ្ជាប់ដ៏សំខាន់ក្នុងកិច្ចសហប្រតិបត្តិការមិត្តភាពដ៏ល្អរវាងប្រទេសទាំងពីរ និងកងទ័ពនៃប្រទេសទាំងពីរវៀតណាម និងកម្ពុជា។ បុគ្គលម្នាក់ៗក្នុងគណៈនាយក កម្មាភិបាល បុគ្គលិក និងនិយោជិតវៀតណាមត្រូវយល់ដឹងយ៉ាងស៊ីជម្រៅអំពីតួនាទី និងការទទួលខុសត្រូវរបស់ខ្លួនក្នុងការថែរក្សា និងពង្រឹងរូបភាពប្រទេស និងកងទ័ពលោកអ៊ំហូក្នុងដួងចិត្តប្រជាជនកម្ពុជា។

លោកនាយឧត្តមសេនីយ៍បានស្នើឱ្យក្រុមហ៊ុនមិត្តហ្វូនពិនិត្យឱ្យបានទៀងទាត់នូវយុទ្ធសាស្ត្រអាជីវកម្មរបស់ខ្លួន ដើម្បីសម្របខ្លួនទៅនឹងស្ថានភាពថ្មីឱ្យបានឆាប់រហ័ស ត្រួសត្រាយផ្លូវក្នុងការធ្វើបរិវត្តកម្មឌីជីថលនៅកម្ពុជា ចូលរួមយ៉ាងសកម្មក្នុងការផ្តល់ផលិតផលបរិវត្តកម្មឌីជីថល និងផលិតផលបច្ចេកវិទ្យាព័ត៌មានដល់សភា រាជរដ្ឋាភិបាល ក្រសួង ស្ថានប័ន និងមូលដ្ឋាននានាក្នុងប្រទេសកម្ពុជា រួមចំណែកក្នុងការលើកកម្ពស់ និងអនុវត្តយុទ្ធសាស្ត្របរិវត្តកម្មឌីជីថលរបស់រាជរដ្ឋាភិបាលកម្ពុជា។ បន្តអនុវត្តកម្មវិធីសន្តិសុខសង្គម រួមវិភាគទានដល់សហគមន៍ ជាពិសេសសហគមន៍វៀតណាមនៅកម្ពុជា ផ្សព្វផ្សាយតម្លៃវប្បធម៌ដ៏ល្អរបស់ធុរកិច្ចវៀតណាមនៅកម្ពុជា បង្កើតការបំផុសគំនិតសម្រាប់ធុរកិច្ចវៀតណាមផ្សេងទៀតមកបណ្តាក់ទុននៅកម្ពុជា។ ទន្ទឹមនឹងនោះ គោរពច្បាប់ ថែរក្សា និងពង្រឹងជំនឿទុកចិត្តរបស់រដ្ឋ រាជរដ្ឋាភិបាល និងប្រជាជនកម្ពុជា។ ជានិច្ចកាលយកចិត្តទុកដាក់រក្សាស្មារតីសាមគ្គីភាពរវាងកម្មាភិបាល និងនិយោជិតវៀតណាម និងកម្ពុជា និងថែរក្សាជីវភាពរស់នៅរបស់កម្មាភិបាល និងនិយោជិត។ លើកកម្ពស់កម្លាំងផ្ទៃក្នុង ដើម្បីមិត្តហ្វូនតែងតែរក្សានូវសន្ទុះអភិវឌ្ឍន៍ ការច្នៃប្រឌិត។

ទទួលការផ្ទេរសិទ្ធិពីប្រធានរដ្ឋនៃសាធារណរដ្ឋសង្គមនិយមវៀតណាម លោកនាយឧត្តមសេនីយ៍ Phan Van Giang ប្រគល់គ្រឿងឥស្សរិយយសពលកម្មថ្នាក់ទី២ ជូនក្រុមហ៊ុនមិត្តហ្វូន

លោកនាយឧត្តមសេនីយ៍ Phan Van Giang បានអះអាងថា បក្ស រដ្ឋ គណៈកម្មាធិការបក្សយោធាមជ្ឈិម ក្រសួងការពារប្រទេសវៀតណាមជានិច្ចកាលបង្កើតលក្ខខណ្ឌអំណោយផលសម្រាប់ក្រុមហ៊ុនមិត្តហ្វូន ដើម្បីសម្រេចបានជោគជ័យនូវគោលដៅវិនិយោគ និងអាជីវកម្ម និងបំពេញទំនួលខុសត្រូវសង្គមចំពោះកម្ពុជា។ លោកជឿជាក់ថា ក្រុមមិត្តហ្វូន តែងតែរួបរួមគ្នា មានភាពច្នៃប្រឌិត និងរីកចម្រើនកាន់តែខ្លាំង ដែលសក្តិសមជានិមិត្តរូប និងជាគំរូនៃកិច្ចសហប្រតិបត្តិការសេដ្ឋកិច្ច ការពារជាតិ រវាងវៀតណាម និងកម្ពុជា។

បកប្រែដោយ Duy Hoan