បញ្ជាការដ្ឋានកងទ័ពការពារព្រំដែនវៀតណាមជួបពិភាក្សាជាមួយបញ្ជាការដ្ឋានកងទ័ពជើងទឹកកម្ពុជា

ទិដ្ឋភាពទូទៅនៃកិច្ចប្រជុំ (រូបថត៖ bienphong.com.vn)

ថ្លែងក្នុងកិច្ចប្រជុំ លោកឧត្តមសេនីយ៍ត្រី Hoang Huu Chien អះអាងថា នាពេលកន្លងមក កងទ័ពការពារព្រំដែនវៀតណាម និងកម្លាំងគ្រប់គ្រង និងការពារព្រំដែនរបស់កម្ពុជា បានអនុវត្តប្រកបដោយប្រសិទ្ធភាពនូវកិច្ចសហប្រតិបត្ដិការការពារព្រំដែន រក្សាការផ្លាស់ប្តូរគណៈប្រតិភូគ្រប់លំដាប់ថ្នាក់ សកម្មភាពល្បាតទ្វេភាគី សហការគ្នាក្នុងការគ្រប់គ្រង និងការពារព្រំដែន; ការគ្រប់គ្រងនិងត្រួតពិនិត្យនៅតាមច្រកទ្វារព្រំដែន។ ភាគីទាំងពីរសហការក្នុងការប្រយុទ្ធប្រឆាំងនឹងឧក្រិដ្ឋកម្មឆ្លងដែន ជាពិសេសឧក្រិដ្ឋកម្មគ្រឿងញៀន និងការជួញដូរមនុស្ស ហើយរៀបចំលំហាត់ហ្វឹកហ្វឺនរួមជាច្រើនដើម្បីប្រយុទ្ធប្រឆាំង និងទប់ស្កាត់ឧក្រិដ្ឋកម្មឆ្លងដែន សង្គ្រោះគ្រោះមហន្ដរាយនៅតាមតំបន់ព្រំដែន រួមចំណែកលើកកម្ពស់ប្រសិទ្ធភាពក្នុងការសម្របសម្រួល និងដោះស្រាយស្ថានការណ៍កើតឡើងនៅ​តំបន់ព្រំដែន។

គណៈប្រតិភូបញ្ជាការដ្ឋានកងទ័ពការពារព្រំដែនវៀតណាមក្នុងកិច្ចប្រជុំ (រូបថត៖ bienphong.com.vn)

គណៈប្រតិភូបញ្ជាការដ្ឋានកងទ័ពជើងទឹកកម្ពុជាក្នុងកិច្ចប្រជុំ (រូបថត៖ bienphong.com.vn)

នៅក្នុងកិច្ចប្រជុំនេះ ភាគីទាំងពីរបានពិភាក្សាលើខ្លឹមសារមួយចំនួនដែលទាក់ទងនឹងការសហការរក្សាសន្តិសុខ សណ្តាប់ធ្នាប់នៅតំបន់ដែនទឹកប្រវត្តិសាស្ត្ររវាងវៀតណាមនិងកម្ពុជា និងទិសដៅសហប្រតិបត្តិការរវាងកងកម្លាំងទាំងពីរនាពេលខាងមុខ។ អាស្រ័យហេតុនេះ ភាគីទាំងពីរបានឯកភាពអនុវត្តកិច្ចសហប្រតិបត្តិការលើខ្លឹមសារជាច្រើនដូចជា សហការអនុវត្តយ៉ាងម៉ឺងម៉ាត់ និងមានប្រសិទ្ធភាពនូវកិច្ចព្រមព្រៀងស្តីពីតំបន់ដែនទឹកប្រវត្តិសាស្ត្ររវាងវៀតណាម និងកម្ពុជាដែលបានចុះហត្ថលេខានៅថ្ងៃទី ៧ ខែកក្កដា ឆ្នាំ១៩៨២ និងទស្សនៈរួមរវាងថ្នាក់ដឹកនាំជាន់ខ្ពស់នៃប្រទេសទាំងពីរ និងកងទ័ពទាំងពីរអំពីតំបន់ដែនទឹកប្រវត្តិសាស្ត្រ និងតំបន់ដែនទឹកជាប់គ្នារវាងប្រទេសទាំងពីរ សហការធានាសន្តិសុខ សុវត្ថិភាព និងបង្កលក្ខណៈងាយស្រួលសម្រាប់ប្រជានេសាទនៃភាគីទាំងពីរ ធ្វើនេសាទក្នុងតំបន់ដែនទឹកប្រវត្តិសាស្ត្រនៃប្រទេសទាំងពីរ ស្របតាមបទប្បញ្ញត្តិនៃមាត្រា​ ៣ កិច្ចព្រមព្រៀងស្តីពីតំបន់ដែនទឹកប្រវត្តិសាស្ត្រវៀតណាម-កម្ពុជា ដែលចុះហត្ថលេខាកាលពីថ្ងៃទី៧ ខែកក្កដា ឆ្នាំ ១៩៨២។

ទិដ្ឋភាពនៃការប្រគល់កំណត់ហេតុនៅកិច្ចប្រជុំ

ភាគីទាំងពីរបង្កើនការសហការក្នុងការឃោសនា និងចលនាប្រជាជននៃប្រទេសទាំងពីរឱ្យអនុវត្តគោរពច្បាប់នៃប្រទេសនីមួយៗ និងបទប្បញ្ញត្តិពាក់ព័ន្ធស្តីពីការនេសាទខុសច្បាប់  គ្មានរបាយការណ៍និងគ្មានការអនុញ្ញាត (IUU)  ក៏ដូចជាវិធានការការពារបរិស្ថាន រួមគ្នាអភិរក្ស និងធ្វើនេសាទប្រកបដោយនិរន្តរភាព បង្កើនការផ្លាស់ប្តូរព័ត៌មាន និងសម្របសម្រួលដើម្បីទប់ស្កាត់ ប្រយុទ្ធប្រឆាំងនឹងឧក្រិដ្ឋកម្មឆ្លងដែនគ្រប់ប្រភេទ...

នៅចុងបញ្ចប់នៃកិច្ចប្រជុំ លោកឧត្តមសេនីយ៍ត្រី Hoang Huu Chien និងលោកឧត្តមនាវីឯក ទៀ សុខា បានចុះហត្ថលេខាលើកំណត់ហេតុនៃកិច្ចប្រជុំរវាងបញ្ជាការដ្ឋានកងទ័ពការពារព្រំដែននៃក្រសួងការពារប្រទេសវៀតណាម និងបញ្ជាការដ្ឋានកងទ័ពជើងទឹកនៃកងយោធពលខេមរភូមិន្ទ៕

បកប្រែដោយ Pham Diep