លោកប្រធានរដ្ឋសភា Tran Thanh Man ទៅបំពេញទស្សនកិច្ចផ្លូវការនៅកម្ពុជា និងចូលរួម ICAPP12 និង IPTP 11
កប.អនឡាញ - នារសៀលថ្ងៃទី២១ ខែវិច្ឆិកា លោក Tran Thanh Man ប្រធានរដ្ឋសភាវៀតណាម បានដឹកនាំគណៈប្រតិភូជាន់ខ្ពស់វៀតណាមទៅបំពេញទស្សនកិច្ចជាផ្លូវការនៅព្រះរាជាណាចក្រកម្ពុជា; ចូលរួមសន្និសីទពេញអង្គលើកទី១២ នៃសន្និសីទអន្តរជាតិគណបក្សនយោបាយនៅអាស៊ី (ICAPP) និងសម័យប្រជុំពេញអង្គលើកទី១១ នៃសភាអន្តរជាតិដើម្បីភាពអត់ឱន និងសន្តិភាព (IPTP) ចាប់ពីថ្ងៃទី ២១ ដល់ថ្ងៃទី ២៤ ខែវិច្ឆិកា តបតាមការអញ្ជើញពីសម្តេចតេជោ ហ៊ុន សែន ប្រធានគណបក្សប្រជាជនកម្ពុជា សម្តេច ឃួន សុដារី ប្រធានរដ្ឋសភាកម្ពុជា និងលោក Chung Eui-yong ប្រធានគណៈកម្មាធិការអចិន្ត្រៃយ៍នៃសន្និសីទអន្តរជាតិគណបក្សនយោបាយនៅអាស៊ី (ICAPP)។
    |
 |
|
លោកប្រធានរដ្ឋសភា Tran Thanh Man |
ចូលរួមគណៈប្រតិភូរួមមាន៖ លោក Ho Duc Phoc ឧបនាយករដ្ឋមន្ត្រី; លោក Vu Hai Ha ប្រធានគណៈកម្មាធិការកិច្ចការបរទេសនៃរដ្ឋសភា; លោក Y Thanh Ha Nie Kdam ប្រធានក្រុមប្រឹក្សាជនជាតិនៃរដ្ឋសភា; លោកឧត្តមសេនីយ៍ឯក Vu Hai San អនុរដ្ឋមន្ត្រីក្រសួងការពារប្រទេស; លោកឧត្តមសេនីយ៍ឯក Tran Quoc To អនុរដ្ឋមន្ត្រីក្រសួងនគរបាល; លោក Nguyen Minh Vu អនុរដ្ឋមន្ត្រីអចិន្ត្រៃយ៍ក្រសួងការបរទេស; លោក Nguyen Huy Tang ឯកអគ្គរដ្ឋទូតវៀតណាមប្រចាំនៅកម្ពុជា។ល។
ក្នុងដំណើរទស្សនកិច្ចលើកនេះ លោកប្រធានរដ្ឋសភា Tran Thanh Man គ្រោងនឹងចូលរួមពិធីទទួលបដិសណ្ឋារកិច្ចជាផ្លូវការ និងជួបពិភាក្សាជាមួយសម្តេច ឃួន សុដារី ប្រធានរដ្ឋសភាកម្ពុជា; ជួបសវនាការ ជួបសម្តែងការគួរសម និងមានជំនួបជាមួយថ្នាក់ដឹកនាំជាន់ខ្ពស់មួយចំនួនរបស់កម្ពុជា; ទៅសួរសុខទុក្ខអតីតថ្នាក់ដឹកនាំជាន់ខ្ពស់មួយចំនួនរបស់កម្ពុជា; ទទួលជួបថ្នាក់ដឹកនាំស្ថាប័នមួយចំនួនរបស់កម្ពុជា។
ក្នុងក្របខ័ណ្ឌនៃដំណើរទស្សនកិច្ចនេះ លោកប្រធានរដ្ឋសភា Tran Thanh Man គ្រោងនឹងចូលរួមពិធីសម្ពោធអគាររដ្ឋបាលរដ្ឋសភាកម្ពុជា ដែលជាអំណោយរបស់បក្ស រដ្ឋ និងប្រជាជនវៀតណាម; ដាក់កម្រងផ្កានៅវិមានឯករាជ្យ ស្តូបមិត្តភាពកម្ពុជា-វៀតណាម និងស្តូបព្រះបរមរតនកោដ្ឋ ព្រះករុណា សម្តេចព្រះ នរោត្តម សីហនុ។
ក្នុងឱកាសនេះ លោកប្រធានរដ្ឋសភា Tran Thanh Man ក៏នឹងជួបសំណេះសំណាលជាមួយកម្មាភិបាលស្ថានទូតវៀតណាមប្រចាំនៅកម្ពុជា និងអាណិកជនវៀតណាមដែលកំពុងរស់នៅ សិក្សា និងធ្វើអាជីវកម្មនៅកម្ពុជា និងចូលរួមសកម្មភាពមួយចំនួនទៀត៕
បកប្រែដោយ Huyen Trang