ថ្នាក់ដឹកនាំនាយទាហានវ័យក្មេងនៃកងទ័ពវៀតណាម និងកម្ពុជា រួមចំណែកពូនជ្រំចំណងមិត្តភាពរវាងប្រទេសទាំងពីរ

នេះជាសកម្មភាព សំដៅបង្កើនកិច្ចពិភាក្សា និងអប់រំអំពីប្រវត្តិសាស្ត្រ អត្ថន័យ និងសារៈសំខាន់នៃទំនាក់ទំនងសាមគ្គីភាព និងមិត្តភាពរវាងវៀតណាម និងកម្ពុជាជូនដល់នាយទាហាននៃប្រទេសទាំងពីរ ជាពិសេសការទទួលខុសត្រូវរបស់ថ្នាក់ដឹកនាំនាយទាហានវ័យក្មេងជំនាន់ក្រោយក្នុងស្ថានភាពបច្ចុប្បន្ន។

ទិដ្ឋភាពនៃកិច្ចពិភាក្សា (រូបថត៖ vov.vn)

នៅឯកិច្ចពិភាក្សានេះ ភាគីទាំងពីរបានឯកភាពថា នាពេលខាងមុខ ចាំបាច់ត្រូវជំរុញសកម្មភាពផ្លាស់ប្ដូរបទពិសោធន៍  ធ្វើឲ្យកិច្ចពិភាក្សារវាងថ្នាក់ដឹកនាំនាយទាហានវ័យក្មេងរបស់កងទ័ពនៃប្រទេសទាំងពីរឱ្យកាន់តែស៊ីជម្រៅ និងមានប្រសិទ្ធភាព។ អាស្រ័យហេតុនេះ ពង្រឹងជំនឿទុកចិត្តជាយុទ្ធសាស្ត្រ ប្រុងប្រយ័ត្នចំពោះការញុះញង់ និងការបំបែកបំបាក់ទំនាក់ទំនងរវាងប្រទេសទាំងពីរដោយកម្លាំងអរិភាព ព្រមទាំងរួមដៃគ្នាកសាងខ្សែព្រំដែនប្រកបដោយសន្តិភាព មិត្តភាព ស្ថិរភាព កិច្ចសហប្រតិបត្តិការនិងអភិវឌ្ឍន៍។ រួមចំណែកធ្វើឲ្យប្រសើរថែមទៀតនូវការយោគយល់គ្នា ការជឿទុកចិត្ដខាងនយោបាយលើទំនាក់ទំនង “អ្នកជិតខាងល្អ មិត្តភាពជាប្រពៃណី កិច្ចសហប្រតិបត្តិការគ្រប់ជ្រុងជ្រោយ និរន្តរភាពយូរអង្វែង” រវាងវៀតណាម និងកម្ពុជា។

ថ្នាក់ដឹកនាំនាយទាហានវ័យក្មេងនៃកងទ័ពវៀតណាមនិងកម្ពុជាថតរូបជុំគ្នា (រូបថត៖ vov.vn)

គួររំលឹកថា មុននោះ គណៈប្រតិភូថ្នាក់ដឹកនាំនាយទាហានវ័យក្មេងនៃកងទ័ពប្រជាជនវៀតណាម បានចូលជួបសម្តែងការគួរសមជាមួយ លោកនាយឧត្តមសេនីយ៍ ម៉ៅ សុផាន់ អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងទ័ពជើងគោក។

ក្នុងជំនួបនេះ លោកនាយឧត្តមសេនីយ៍ ម៉ៅ សុផាន់ បានស្វាគមន៍យ៉ាងកក់ក្តៅចំពោះគណៈប្រតិភូថ្នាក់ដឹកនាំនាយទាហានវ័យក្មេងនៃកងទ័ពប្រជាជនវៀតណាមដែលមកចូលរួមកិច្ចពិភាក្សា និងសំណេះសំណាលថ្នាក់ដឹកនាំនាយទាហានវ័យក្មេងរបស់កងទ័ពនៃប្រទេសទាំងពីរ ហើយចាត់ទុកថានេះជាសកម្មភាពចាំបាច់សម្រាប់ថ្នាក់ដឹកនាំនាយទហានជំនាន់ក្រោយលើកកម្ពស់តួនាទីសំខាន់ក្នុងការថែរក្សា និងពង្រីកទំនាក់ទំនងវៀតណាម-កម្ពុជា និងទំនាក់ទំនងរវាងកងទ័ពនៃប្រទេសទាំងពីរ។

ក្នុងក្របខ័ណ្ឌនៃកិច្ចពិភាក្សា និងសំណេះសំណាលថ្នាក់ដឹកនាំនាយទាហានវ័យក្មេងលើកទី ២ រវាងកងទ័ពនៃប្រទេសទាំងពីរចាប់ពីថ្ងៃទី ៥ ដល់ថ្ងៃទី ១១ ឧសភា នៅកម្ពុជា ភាគីទាំងពីរបានរៀបចំសកម្មភាពជាច្រើនដ៏មានអត្ថន័យ រួមចំណែករឹតបន្ដឹងចំណងសាមគ្គីភាព និងមិត្តភាពរវាងនាយទាហានវ័យក្មេងនៃប្រទេសទាំងពីរ។ ក្នុងនោះ គណៈប្រតិភូថ្នាក់ដឹកនាំនាយទាហានវ័យក្មេងនៃកងទ័ពប្រជាជន​វៀតណាមក៏បានអញ្ជើញទៅទស្សនកិច្ចនៅអង្គភាពមួយចំនួនរបស់កងយោធពលខេមរភូមិន្ទដូចជា បញ្ជាការដ្ឋានកងពលតូចលេខ៧០ និងបញ្ជាការដ្ឋានយោធភូមិភាគទី៣ និងបញ្ជាការដ្ឋានកងពលតូចអន្តរាគមន៍លេខ១ នៃបញ្ជាការដ្ឋានកងទ័ពជើងគោក។ល៕

បកប្រែដោយ Pham Diep