លោក Tran Thanh Man ប្រធានរដ្ឋសភាវៀតណាម ទទួលជួបជាមួយសម្ដេចតេជោ ហ៊ុន សែន ប្រធានគណបក្សប្រជាជនកម្ពុជា និងជាប្រធានព្រឹទ្ធសភាកម្ពុជា

តាងនាមថ្នាក់ដឹកនាំបក្ស រដ្ឋ និងប្រជាជនវៀតណាម លោក Tran Thanh Man ប្រធានរដ្ឋសភាវៀតណាម បានថ្លែងអំណរគុណយ៉ាងជ្រាលជ្រៅចំពោះព្រះមហាក្សត្រ គណបក្សប្រជាជនកម្ពុជា ព្រឹទ្ធសភា រដ្ឋសភា រាជរដ្ឋាភិបាលកម្ពុជា និងស្ថាប័នជាច្រើនរបស់កម្ពុជាដែលបានផ្ញើសាររំលែកទុក្ខយ៉ាងក្រៀមក្រំបំផុតសម្រាប់បក្ស រដ្ឋ និងប្រជាជនវៀតណាមចំពោះមរណភាពរបស់លោកអគ្គលេខាបក្ស Nguyen Phu Trong និងបានបញ្ជូនគណៈប្រតិភូជាន់ខ្ពស់ដឹកនាំដោយសម្ដេចតេជោ ហ៊ុន សែន មកចូលរួមពិធីគោរពវិញ្ញាណក្ខន្ធ។

លោក Tran Thanh Man អះអាងថា នេះជាការលើកទឹកចិត្តដ៏ធំធេងសម្រាប់បក្ស រដ្ឋ និងប្រជាជនវៀតណាម ហើយទន្ទឹមនឹងនោះបង្ហាញពីមនោសញ្ចេតនាពិសេសរបស់សម្ដេចតេជោ ហ៊ុន សែន ចំពោះលោកអគ្គលេខាបក្ស Nguyen Phu Trong និងក្រុមគ្រួសារ។

លោក Tran Thanh Man ប្រធានរដ្ឋសភាវៀតណាម និងសម្ដេចតេជោ ហ៊ុន សែន ប្រធានគណបក្សប្រជាជនកម្ពុជា និងជាប្រធានព្រឹទ្ធសភាកម្ពុជា (រូបថត៖ vnanet.vn)

លោក Tran Thanh Man បានវាយតំលៃខ្ពស់ចំពោះតួនាទីរបស់សម្ដេចតេជោ ហ៊ុន សែន ក្នុងការរក្សា និងពង្រីកទំនាក់ទំនងរវាងប្រទេសទាំងពីរនាពេលថ្មីៗនេះ ក៏ដូចជាគំនិតផ្ដួចផ្ដើមសម្រាប់កិច្ចសហប្រតិបត្តិការនាពេលខាងមុខ ដើម្បីទំនាក់ទំនងវៀតណាម-កម្ពុជាកាន់តែអភិវឌ្ឍន៍ឥតឈប់ឈរ។ លោកប្រធានរដ្ឋសភាវៀតណាម សំដែងការជឿជាក់យ៉ាងមុតមាំថា ថ្នាក់ដឹកនាំជំនាន់ថ្មី ក្រោមការដឹកនាំរបស់សម្តេចតេជោ ហ៊ុន សែន និងមេដឹកនាំកម្ពុជាជើងចាស់ នឹងចូលរួមចំណែកយ៉ាងធំធេងចែមទៀតក្នុងការអភិវឌ្ឍន៍របស់កម្ពុជា និងបន្តលើកកម្ពស់ទំនាក់ទំនងមិត្តភាពជាប្រពៃណី និងសាមគ្គីភាពជាមួយវៀតណាមឱ្យឈានដល់កម្រិតថ្មី។

ទិដ្ឋភាពនៃជំនួប ​(រូបថត៖ vnanet.vn)

សម្ដេចតេជោ ហ៊ុន សែន បានបង្ហាញអារម្មណ៍រំជួលចិត្ដខ្លាំងដែលបានចូលរួមពិធីគោរពវិញ្ញាណក្ខន្ធលោកអគ្គលេខាបក្ស Nguyen Phu Trong ព្រមទាំងផ្ញើសាររំលែកទុក្ខដ៏ក្រៀមក្រំបំផុតរបស់គណបក្សប្រជាជនកម្ពុជា ព្រះមហាក្សត្រ ព្រឹទ្ធសភា រដ្ឋសភា និងប្រជាជនកម្ពុជាសម្រាប់បក្ស រដ្ឋ និងប្រជាជនវៀតណាម។ ដោយចែករំលែកនូវអនុស្សាវរីយ៍ដ៏ជ្រាលជ្រៅជាមួយលោកអគ្គលេខាបក្ស Nguyen Phu Trong កន្លងទៅ សម្ដេចតេជោ ហ៊ុន សែន បានសង្កត់ធ្ងន់ថា អស់រយៈពេលជាងមួយទស្សវត្សរ៍ក្នុងតំណែងជាអគ្គលេខាបក្សកុម្មុយនិស្តវៀតណាម លោក Nguyen Phu Trong បានមានការរួមចំណែកយ៉ាងសំខាន់ក្នុងការអភិវឌ្ឍន៍ទំនាក់ទំនងវៀតណាម-កម្ពុជា និងជាមេដឹកនាំដែលបានលះបង់ពេញមួយជីវិតដើម្បីសេចក្តីសុខរបស់ប្រជាជន និងពូនជ្រំចំណងសាមគ្គីភាព និងមិត្តភាព ដើម្បីការអភិវឌ្ឍន៍រួមនៃប្រទេសទាំងបីវៀតណាម-ឡាវ-កម្ពុជា៕

បកប្រែដោយ Thanh Cong