ប្រធានអគ្គសេនាធិការ និងជាអនុរដ្ឋមន្ត្រីក្រសួងការពារប្រទេសវៀតណាម ជួបពិភាក្សាការងារជាមួយអគ្គមេបញ្ជាការនៃកងយោធពលខេមរភូមិន្ទ

នៅក្នុងជំនួបពិភាក្សានោះ លោកនាយឧត្តមសេនីយ៍ វង្ស ពិសេន បានអះអាងថា ដំណើរទស្សនកិច្ចរបស់ គណៈប្រតិភូវៀតណាមបានរួមចំណែកធ្វើឱ្យទំនាក់ទំនងកិច្ចសហប្រតិបត្តិការមិត្តភាពរវាងកងទ័ពទាំងពីរកាន់តែស៊ីជម្រៅ ព្រមទាំងវាយតំលៃខ្ពស់ចំពោះការ គាំទ្រប្រកបដោយប្រសិទ្ធភាពរបស់កងទ័ពក៏ដូចជារបស់បក្ស រដ្ឋ វៀតណាមចំពោះកម្ពុជាផងដែរ។ លោកអគ្គមេបញ្ជាការនៃកងយោធពលខេមរភូមិន្ទបានសង្កត់ធ្ងន់ថា ប្រការនេះត្រូវបានឆ្លុះបញ្ចាំងតាមរយៈការរួមចំណែកយ៉ាងសកម្មរបស់គណៈប្រតិភូ វៀតណាមចំពោះជោគជ័យនៃកិច្ចប្រជុំ ACDFM-19 នាពេលថ្មីនេះ ការផ្លាស់ប្តូរទស្សនកិច្ចទ្វេភាគីប្រចាំឆ្នាំ ការខ័ណ្ឌសីមា និងបោះបង្គោលព្រំដែនរវាងប្រទេសទាំងពីរ និងការសម្របសម្រួលដើម្បីប្រយុទ្ធប្រឆាំង នឹងឧក្រិដ្ឋកម្មឆ្លងដែនមិនថាក្នុងអំឡុងពេលនៃការរីករាលដាលនៃជំងឺកូវីដ-១៩ ក្តី។

លោកឧត្តមសេនីយ៍ឯក Nguyen Tan Cuong ប្រធានអគ្គសេនាធិការ និងជាអនុរដ្ឋមន្ត្រីក្រសួងការពារប្រទេសវៀតណាម ជួបពិភាក្សាទ្វេភាគីជាមួយនាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ

រីឯភាគីវៀតណាម លោកឧត្តមសេនីយ៍ឯក Nguyen Tan Cuong បានអបអរសាទរចំពោះ លោកនាយឧត្តមសេនីយ៍ វង្ស ពិសេន ដែលបានដឹកនាំ ដោយជោគជ័យនូវកិច្ចប្រជុំ ACDFM លើកទី១៩ ហើយបានអះអាងពីការប្តេជ្ញាចិត្ត របស់វៀតណាម ក្នុងការគាំទ្រជួយដល់ប្រទេសកម្ពុជាក្នុងឆ្នាំដែលធ្វើជាម្ចាស់ផ្ទះព្រឹត្តិការណ៍អាស៊ានសំខាន់ៗជាច្រើន។

លោកឧត្តមសេនីយ៍ឯក  Nguyen Tan Cuong បានចាត់ទុកថា កិច្ចប្រជុំ ACDFM នឹងរួមចំណែកពង្រឹងទំនាក់ទំនង “អ្នកជិតខាងល្អ មិត្តភាពជាប្រពៃណី កិច្ចសហប្រតិបត្តិការលើគ្រប់ ជ្រុងជ្រោយ និងនិរន្តរភាពយូរអង្វែង” រវាងប្រទេសទាំងពីរជាពិសេសក្នុងគ្រាដែលវៀតណាម និងកម្ពុជាត្រៀមរៀបចំខួបលើកទី៥៥ នៃការបង្កើតទំនាក់ទំនងការទូត (២៤ មិថុនា ១៩៦៧ - ២៤ មិថុនា ២០២២)។

លោកឧត្តមសេនីយ៍ឯក Nguyen Tan Cuong ចូលជួបសម្តែងការគួរសមសម្តេចពិជ័យសេនា ទៀ បាញ់ ឧបនាយករដ្ឋមន្រ្តី និងជារដ្ឋមន្ត្រីក្រសួងការពារជាតិកម្ពុជា

គណៈប្រតិភូយោធាវៀតណាមចូលដាក់កម្រងផ្កានៅស្តូបមិត្តភាពកម្ពុជា-វៀតណាម

គួរឱ្យរំលឹកដែរថា នាថ្ងៃដដែលក្នុងក្របខ័ណ្ឌនៃដំណើរទស្សនកិច្ចមិត្តភាពជាផ្លូវការនៅព្រះរាជាណាចក្រកម្ពុជា លោកឧត្តមសេនីយ៍ឯក Nguyen Tan Cuong បានចូលជួបសម្តែងការគួរសមសម្តេច ពិជ័យសេនា ទៀ បាញ់ ឧបនាយករដ្ឋមន្រ្តី និងជារដ្ឋមន្ត្រីក្រសួងការពារជាតិកម្ពុជា ព្រមទាំងដឹកនាំគណៈប្រតិភូយោធាវៀតណាមចូលដាក់កម្រងផ្កានៅស្តូបមិត្តភាពកម្ពុជា-វៀតណាម ដើម្បីរំលឹកដល់វីរៈជន និងយុទ្ធជនពលីដែលបានបាត់បង់ជីវិតដើម្បីឯករាជ្យ និងសេរីភាព សន្តិភាពរបស់ប្រជាជនទាំងពីរ៕

បកប្រែដោយ Minh Trung