ក្នុងបរិបទដែលពិភពលោកកំពុងប្រឈមមុខនឹងបញ្ហាជាច្រើន ពីការធ្លាក់ចុះនៃកំណើនរហូតដល់ការប្រែប្រួលអាកាសធាតុ អនុសាសន៍ពីរបាយការណ៍ចំនួនពីរ "វៀតណាមឆ្នាំ ២០៤៥ - កំណើនបៃតង៖ ផ្លូវឆ្ពោះទៅអនាគតដែលមានចំណូលខ្ពស់" និង "វៀតណាមឆ្នាំ ២០៤៥ - កំណើនបៃតង៖ ផ្លូវទៅកាន់អនាគតប្រកបដោយចីរភាព" ដែលរៀបចំដោយធនាគារពិភពលោក (WB) កាលពីថ្ងៃទី ២២ ឧសភានៅរដ្ឋធានីហាណូយ គឺជាការរំលឹកយ៉ាងខ្លាំងអំពីរាល់គោលនយោបាយដ៏ចាំបាច់របស់វៀតណាមដែលត្រូវការអនុវត្តនាពេលខាងមុខ។
    |
 |
|
របាយការណ៍នេះគូសបញ្ជាក់ថា ការវិនិយោគលើការសម្របខ្លួនទៅនឹងអាកាសធាតុគឺជាគន្លឹះក្នុងការកាត់បន្ថយហានិភ័យពីគ្រោះអាកាសធាតុចំពោះវិស័យកសិកម្ម អាជីវកម្ម និងហេដ្ឋារចនាសម្ព័ន្ធផលិតកម្មនៅក្នុងប្រទេសវៀតណាម (រូបថត៖ vietnamplus.vn) |
ត្រូវតែកសាងក្បាលម៉ាស៊ីនសេវាសាធារណៈឲ្យមានប្រសិទ្ធភាព
របាយការណ៍ “វៀតណាមឆ្នាំ២០៤៥ - របកគំហើញ៖ ស្ថាប័នសម្រាប់អនាគតដែលមានប្រាក់ចំណូលខ្ពស់” បានបញ្ជាក់ថា ដើម្បីរក្សាបាននូវអត្រាកំណើនខ្ពស់ដើម្បីសម្រេចបាននូវគោលដៅដែលបានកំណត់ វៀតណាមត្រូវពង្រឹងប្រព័ន្ធច្បាប់ និងបរិយាកាសច្បាប់ ទន្ទឹមនឹងការលើកកំពស់ប្រសិទ្ធភាពនៃការវិនិយោគសាធារណៈទាំងទំហំ និងគុណភាព។ បទពិសោធន៍អន្តរជាតិបង្ហាញថា ប្រទេសដែលបានយកឈ្នះលើអន្ទាក់ចំណូលមធ្យម និងបានឡើងឋានៈជាចំណូលខ្ពស់សុទ្ធតែពឹងផ្អែកលើការកែលម្អគុណភាពស្ថាប័នជាបន្តបន្ទាប់។
លោកស្រី Mariam J. Sherman នាយកធនាគារពិភពលោកប្រចាំប្រទេសវៀតណាម កម្ពុជា និងឡាវ មានប្រសាសន៍ថា “ដំណើរឆ្ពោះទៅគោលដៅក្លាយជាប្រទេសមានប្រាក់ចំណូលខ្ពស់នៅឆ្នាំ ២០៤៥ បានបង្ហាញពីតួនាទីសំខាន់របស់ស្ថាប័នក្នុងការធានានូវកំណើនប្រកបដោយនិរន្តរភាព។ រាល់ការខិតខំប្រឹងប្រែងកំណែទម្រង់នាពេលថ្មីៗនេះ បង្ហាញពីការប្តេជ្ញាចិត្តយ៉ាងខ្លាំងរបស់វៀតណាម ប៉ុន្តែដើម្បីសម្រេចបាននូវគោលដៅនេះ វៀតណាមត្រូវអនុវត្តការកែទម្រង់យ៉ាងខ្លាំងក្លាបន្ថែមទៀត ដែលជា “ការជំរុញស្ថាប័នឈានមុខគេ” ដើម្បីពង្រីកសក្តានុពលពេញលេញនៃវិស័យឯកជន ដើម្បីជំរុញកំណើន និងបង្កើតការងារប្រកបដោយគុណភាពសម្រាប់ប្រជាជនរបស់ខ្លួន។
របាយការណ៍នេះបានគូសបញ្ជាក់ថា កំណែទម្រង់មួយចំនួននឹងមានសារៈសំខាន់ចំពោះដំណាក់កាលបន្ទាប់នៃការអភិវឌ្ឍរបស់វៀតណាម។ ការវិនិយោគសាធារណៈចាំបាច់ត្រូវគ្រប់គ្រងឱ្យកាន់តែមានប្រសិទ្ធភាព ចាប់ពីការជ្រើសរើសគម្រោង ការអនុវត្តរហូតដល់ការត្រួតពិនិត្យ។
លើសពីនេះ ការកែលម្អក្របខ័ណ្ឌច្បាប់ និងបទប្បញ្ញត្តិ នឹងជួយធ្វើឱ្យបរិយាកាសអាជីវកម្មកាន់តែមានតម្លាភាព ស្ថិរភាព និងអាចព្យាករណ៍បាន។ អភិបាលកិច្ចមូលដ្ឋានក៏ចាំបាច់ត្រូវកែលម្អតាមរយៈការធ្វើវិមជ្ឈការ ការបង្កើនគណនេយ្យភាព និងការសម្របសម្រួលឱ្យកាន់តែប្រសើរឡើងរវាងខេត្ត និងក្រុង។
មេដឹកនាំ WB បានផ្តល់អនុសាសន៍ថា "ដើម្បីក្លាយជាប្រទេសដែលមានប្រាក់ចំណូលខ្ពស់ វៀតណាមក៏ចាំបាច់ត្រូវតែកសាងសេវាកម្មសាធារណៈប្រកបដោយប្រសិទ្ធភាព និងគណនេយ្យភាពដែលមានទំហំសមស្រប"។
ផ្តោតលើការប្រែប្រួលអាកាសធាតុ
ស្របជាមួយនឹងកំណែទម្រង់ស្ថាប័ន របាយការណ៍ទីពីរ “វៀតណាម ២០៤៥ - កំណើនបៃតង៖ ផ្លូវឆ្ពោះទៅរកអនាគតប្រកបដោយចីរភាព” ក៏បានចង្អុលបង្ហាញផងដែរថា ការវិនិយោគលើការសម្របខ្លួនទៅនឹងអាកាសធាតុ គឺជាគន្លឹះក្នុងការកាត់បន្ថយហានិភ័យនៃការប្រែប្រួលអាកាសធាតុចំពោះវិស័យកសិកម្ម អាជីវកម្ម និងហេដ្ឋារចនាសម្ព័ន្ធផលិតកម្មនៅក្នុងប្រទេសវៀតណាម។
រាល់សេណារីយ៉ូបង្ហាញថា ប្រសិនបើកម្រិតទឹកសមុទ្រកើនឡើងពី ៧៥ ទៅ ១០០ សង់ទីម៉ែត្រនោះ នឹងធ្វើឱ្យជិតពាក់កណ្តាលនៃទំហំផ្ទៃដីនៅតាមសណ្ដទន្លេមេគង្គអាចលិចនៅពាក់កណ្តាលសតវត្សនេះ។ ការស្ទង់មតិឆ្នាំ ២០២៤ របស់ WB ក៏បានបង្ហាញឃើញថា ប្រហែលចំនួន ៧៥% នៃអាជីវកម្មនៅក្នុង ២ វិស័យនាំចេញសំខាន់ៗរបស់វៀតណាម គឺសម្លៀកបំពាក់ និងគ្រឿងអេឡិចត្រូនិក ក៏កំពុងប្រតិបត្តិការនៅក្នុងតំបន់ដែលរងផលប៉ះពាល់ជាប្រចាំដោយសីតុណ្ហភាពខ្ពស់ ដោយនាំឱ្យកម្មករ ១.៣ លាននាក់ស្ថិតនៅក្នុងក្រុមដែលងាយរងគ្រោះ។
ហើយបើគ្មានវិធានការសម្របខ្លួនទាន់ពេលវេលា ផលប៉ះពាល់នៃការប្រែប្រួលអាកាសធាតុអាចបណ្តាលឱ្យសេដ្ឋកិច្ចវៀតណាមបាត់បង់រហូតដល់ ១២.៥% នៃផលិតផលក្នុងស្រុកសរុបនៅឆ្នាំ ២០៥០ បើប្រៀបធៀបទៅនឹងសេណារីយ៉ូមូលដ្ឋាន ដែលគំរាមកំហែងយ៉ាងធ្ងន់ធ្ងរដល់សមត្ថភាពក្នុងការសម្រេចគោលដៅប្រាក់ចំណូលខ្ពស់នៅឆ្នាំ ២០៤៥។
ទាក់ទិននឹងបញ្ហានេះ លោកស្រី Sherman បានផ្តល់អនុសាសន៍ថា វៀតណាមអាចចាត់វិធានការជាច្រើនភ្លាមៗនាពេលនេះ ដើម្បីការពារដីធ្លី សហគមន៍ និងហេដ្ឋារចនាសម្ព័ន្ធពីគ្រោះមហន្តរាយដែលបណ្តាលមកពីការប្រែប្រួលអាកាសធាតុ។
យោងតាមលោកស្រី Sherman ប្រការដែលមានសារៈសំខាន់ក្នុងការអភិវឌ្ឍយន្តការ និងគោលនយោបាយសមស្របដើម្បីលើកទឹកចិត្តដល់អាជីវកម្ម និងប្រជាជនឱ្យសម្របខ្លួនយ៉ាងសកម្ម ខណៈពេលដែលរួមបញ្ចូលការគ្រប់គ្រងហានិភ័យអាកាសធាតុទៅក្នុងគ្រប់វិស័យនៃសេដ្ឋកិច្ច។
យោងតាមការគណនារបស់របាយការណ៍ ការវិនិយោគបន្សាំអាចកាត់បន្ថយការខាតបង់សេដ្ឋកិច្ចយ៉ាងសំខាន់ ដោយជួយបង្រួមការបាត់បង់ GDP ដោយសារការប្រែប្រួលអាកាសធាតុពី ១២.៥% ទៅ ៦.៧% នៅឆ្នាំ ២០៥០។
លើសពីនេះ របាយការណ៍ក៏បានលើកឡើងពីកាលានុវត្តភាពដែលមានស្រាប់សម្រាប់វៀតណាម ក្នុងការកាត់បន្ថយការបំភាយកាបូន ឆ្ពោះទៅគោលដៅនៃការបំភាយឧស្ម័នសូន្យសុទ្ធត្រឹមឆ្នាំ ២០៥០ ដូចការប្តេជ្ញាចិត្តដោយរដ្ឋាភិបាល។
ជាពិសេស វិស័យឯកជនត្រូវបានគេកំណត់ថាជាកត្តាស្នូល ហើយរបាយការណ៍នេះផ្តួចផ្តើមនូវជំហានជាក់លាក់ដើម្បីលើកកម្ពស់ការផ្លាស់ប្តូរថាមពល ដោយទាញយកអត្ថប្រយោជន៍ពីបច្ចេកវិទ្យាថាមពលកកើតឡើងវិញ ជាមួយនឹងការចំណាយប្រកួតប្រជែងកាន់តែខ្លាំងឡើង ដើម្បីបង្កើនប្រសិទ្ធភាពថាមពលក្នុងវិស័យឧស្សាហកម្ម។ ប្រសិនបើអនុវត្តប្រកបដោយប្រសិទ្ធភាព ដំណើរការនេះនឹងបើកសន្ទុះថ្មីសម្រាប់ការច្នៃប្រឌិត កំណើន និងការបង្កើតការងារ។
របាយការណ៍នេះក៏បានលើកឡើងពីតម្រូវការសម្រាប់វៀតណាម ក្នុងការទាញយកសក្តានុពលសេដ្ឋកិច្ចសមុទ្ររបស់ខ្លួនដើម្បីជំរុញអនាគតបៃតង និងសម្របខ្លួនឱ្យកាន់តែប្រសើរឡើងចំពោះការប្រែប្រួលអាកាសធាតុ។ ដោយមានប្រជាជនប្រហែល ៣០% រស់នៅតាមឆ្នេរសមុទ្រប្រវែងជាង ៣,២៦០ គីឡូម៉ែត្រ និងជិតពាក់កណ្តាលនៃប្រជាជន ១០០ លាននាក់របស់វៀតណាម ពឹងផ្អែកលើប្រព័ន្ធអេកូឡូស៊ីសមុទ្រសម្រាប់ការចិញ្ចឹមជីវិតរបស់ពួកគេ ការអភិវឌ្ឍប្រកបដោយចីរភាពនៃសេដ្ឋកិច្ចសមុទ្រគឺជាតម្រូវការបន្ទាន់។
វិស័យសេដ្ឋកិច្ចសមុទ្រក៏មានសក្តានុពលខ្លាំងក្នុងការរួមចំណែកកាត់បន្ថយការបំភាយឧស្ម័នផ្ទះកញ្ចក់ផងដែរ។ ការពង្រីកថាមពលកកើតឡើងវិញ ជាពិសេសថាមពលខ្យល់នៅឯនាយសមុទ្រ ដែលមានសក្តានុពលរហូតដល់ ៤៧៥ GW រួមជាមួយនឹងថាមពលរលក នឹងក្លាយជាឱកាសដ៏សំខាន់សម្រាប់វៀតណាមក្នុងការកាត់បន្ថយការពឹងផ្អែកលើឥន្ធនៈហ្វូស៊ីលបន្តិចម្តងៗ។
លើសពីនេះ ការស្ដារព្រៃលិចទឹកប្រៃ ការការពារស្មៅសមុទ្រ និងថ្មប៉ប្រះទឹកផ្កាថ្ម ក៏ដើរតួយ៉ាងសំខាន់ផងដែរ។ ប្រព័ន្ធអេកូឡូស៊ីទាំងនេះមិនត្រឹមតែបង្កើនភាពធន់នៃតំបន់ឆ្នេរទៅនឹងផលប៉ះពាល់នៃការប្រែប្រួលអាកាសធាតុប៉ុណ្ណោះទេ វាថែមទាំងរួមចំណែកយ៉ាងសំខាន់ដល់គោលដៅនៃការកាត់បន្ថយការបំភាយឧស្ម័ន ដោយសារសមត្ថភាពក្នុងការស្រូបយក និងរក្សាទុកកាបូន៕
បកប្រែដោយ Minh Trung