កងកម្លាំងទ័ពជើងអាកាស វៀតណាម-អូស្ត្រាលី ពង្រឹងកិច្ចសហប្រតិបត្តិការ

លោកនាយឧត្តមសេនីយ៍ Nguyen Tan Cuong បានទទួលស្គាល់លទ្ធផលប្រកបដោយប្រសិទ្ធភាព និងជាក់ស្តែងនៃកិច្ចសហប្រតិបត្តិការលើវិស័យការពារជាតិរវាងប្រទេសទាំងពីរក្នុងរយៈពេលកន្លងមក  ដោយឈរលើមូលដ្ឋាននៃអនុស្សរណៈយោគយល់គ្នាឆ្នាំ ២០១០ ស្តីពីកិច្ចសហប្រតិបត្តិការលើវិស័យការពារជាតិ និងសេចក្តីថ្លែងការណ៍ទស្សនៈវិស័យរួមស្តីពីការជំរុញកិច្ចសហប្រតិបត្តិការលើវិស័យការពារជាតិឆ្នាំ ២០១៨ ជាពិសេសលើវិស័យ៖ ការផ្លាស់ប្តូរគណៈប្រតិភូ ការសន្ទនា និងការពិគ្រោះយោបល់ ការបណ្តុះបណ្តាល ការរក្សាសន្តិភាពរបស់អង្គការសហប្រជាជាតិ ការផ្លាស់ប្តូរបទពិសោធន៍រវាងអង្គភាពទ័ព ការជម្នះពុះពារលើផលវិបាកដោយសារសង្គ្រាម កិច្ចសហប្រតិបត្តិការពហុភាគីលើវិស័យការពារជាតិ ជាពិសេសក្នុងក្របខ័ណ្ឌនៃកិច្ចប្រជុំរដ្ឋមន្ត្រីការពារជាតិអាស៊ានបូក (ADMM+)។

លោកនាយឧត្តមសេនីយ៍ Nguyen Tan Cuong ផ្តល់វត្ថុអនុស្សាវរីយ៍ជូនលោកឧត្តមសេនីយ៍ទោ Stephen Chappell

លោកឧត្តមសេនីយ៍ទោ Stephen Chappell បានសម្តែងការរំលែកទុក្ខចំពោះការបាត់បង់អាយុជីវិត និងទ្រព្យសម្បត្តិដែលបណ្តាលមកពីព្យុះនាពេលថ្មីៗនេះនៅប្រទេសវៀតណាម។ លោកឧត្តមសេនីយ៍ទោ Stephen Chappell បានជម្រាបជូនលោកនាយឧត្តមសេនីយ៍ Nguyen Tan Cuong អំពីលទ្ធផលវិជ្ជមាននៃកិច្ចសន្ទនាជាមួយលោកឧត្តមសេនីយ៍ត្រី Vu Hong Son មេបញ្ជាការប្រភេទទ័ពការពារដែនអាកាស-ទ័ពជើងអាកាសវៀតណាម។ លោកឧត្តមសេនីយ៍ទោ Stephen Chappell បានសង្កត់ធ្ងន់ថា លទ្ធផលនៃកិច្ចចរចាបានបង្កើតលក្ខខណ្ឌអំណោយផលសម្រាប់កងកម្លាំងទាំងពីរ ជំរុញកិច្ចសហប្រតិបត្តិការបន្ថែមទៀតនាពេលខាងមុខ ព្រមទាំងស្នើថា នាពេលខាងមុខអូស្ត្រាលី និងវៀតណាមបន្តពង្រឹងកិច្ចសហប្រតិបត្តិការលើវិស័យការពារជាតិ ដោយផ្តោតលើការបណ្តុះបណ្តាល ជំនួយមនុស្សធម៌ និងសង្គ្រោះគ្រោះមហន្ត ពេទ្យយោធា និងជួយសង្គ្រោះ។

លោកនាយឧត្តមសេនីយ៍ Nguyen Tan Cuong រួមជាមួយលោកឧត្តមសេនីយ៍ទោ Stephen Chappell និងប្រតិភូនៅក្នុងជំនួប

លោកនាយឧត្តមសេនីយ៍ Nguyen Tan Cuong បានសម្តែងការពេញចិត្តចំពោះលទ្ធផលនៃកិច្ចចរចា និងសម្រែងនូវសេចក្តីសោមនស្សរីករាយដែលឃើញកិច្ចសហប្រតិបត្តិការលើវិស័យទ័ពជើងអាកាសសម្រេចបានលទ្ធផលគួរឱ្យកត់សម្គាល់ និងមានសក្តានុពលជាច្រើនសម្រាប់ការអភិវឌ្ឍបន្ថែមទៀត។ លោកនាយឧត្តមសេនីយ៍ Nguyen Tan Cuong បានឲ្យដឹងថា នាពេលខាងមុខ ដោយឈរលើការដឹកនាំរបស់ថ្នាក់ដឹកនាំជាន់ខ្ពស់នៃប្រទេសទាំងពីរ ក្រសួងការពារជាតិទាំងពីរ កងទ័ពប្រជាជនវៀតណាម និងកងកម្លាំងការពារជាតិអូស្ត្រាលីនឹងបន្តជំរុញកិច្ចសហប្រតិបត្តិការរវាងអង្គភាពទ័ព ដោយឈរលើមូលដ្ឋានសមស្របនឹងតម្រូវការ សមត្ថភាព ផលប្រយោជន៍របស់ភាគីនិមួយៗ និងស្ថានភាពជាក់ស្តែង រួមចំណែកបង្កើនការយល់ដឹង និងទំនុកចិត្តគ្នាទៅវិញទៅមករវាងកងទ័ពនៃប្រទេសទាំងពីរ។ លោកនាយឧត្តមសេនីយ៍ Nguyen Tan Cuong បានអះអាងថា ក្រសួងការពារប្រទេសវៀតណាមគាំទ្រ និងស្នើឲ្យកម្លាំងកងទ័ពជើងអាកាសនៃប្រទេសទាំងពីរបង្កើនការផ្លាស់ប្តូរគណៈប្រតិភូគ្រប់លំដាប់ថ្នាក់ ជំរុញកិច្ចសហប្រតិបត្តិការបណ្តុះបណ្តាល និងចែករំលែកបទពិសោធន៍វិជ្ជាជីវៈ ហើយសង្ឃឹមថា ថ្នាក់ដឹកនាំក្រសួងការពារជាតិ កម្លាំងការពារជាតិ និងទ័ពជើងអាកាសអូស្ត្រាលី រួមជាមួយសហគ្រាសការពារជាតិអូស្ត្រាលីនឹងបន្តយកចិត្តទុកដាក់ និងគាំទ្រវៀតណាមក្នុងការតាំងពិព័រណ៍ការពារជាតិអន្តរជាតិនាពេលខាងមុខ៕

បកប្រែដោយ Huyen Trang