នាវាកងឆ្មាំសមុទ្រលេខ ៨០០២ ចាប់ផ្តើមដំណើរទស្សនកិច្ច និងជួបប្រាស្រ័យជាមួយកម្លាំងការពារឆ្នេរសមុទ្រហ្វីលីពីន

អញ្ជើញជាអធិបតី និងមានប្រសាសន៍ក្នុងពិធីស្វាគមន៍ លោកឧត្តមនាវីត្រី Agapito B Bibat មេបញ្ជាការតំបន់មជ្ឈមណ្ឌល Visayas កម្លាំងការពារឆ្នេរសមុទ្រហ្វីលីពីន បានសម្តែងនូវសេចក្តីរីករាយចំពោះការស្វាគមន៍ លោកឧត្តមសេនីយ៍ត្រី Tran Quang Tuan និងគណៈប្រតិភូកងឆ្មាំសមុទ្រវៀតណាមនៅលើនាវាកងឆ្មាំសមុទ្រលេខ ៨០០២។

ប្រតិភូរបស់កងកម្លាំងទាំង២ ក្នុងពិធីស្វាគមន៍នាវាកងឆ្មាំសមុទ្រលេខ ៨០០២

លោកឧត្តមនាវីត្រី Agapito B Bibat បានសង្កត់ធ្ងន់ថា នេះជាឱកាសសម្រាប់កម្មាភិបាល និងបុគ្គលិកនៃកម្លាំងការពារឆ្នេរសមុទ្រហ្វីលីពីនផ្ញើរសារ និងរូបភាពដ៏ស្រស់ស្អាតអំពីទឹកដី និងមនុស្សហ្វីលីពីនទៅកាន់មិត្តវៀតណាមនិយាយរួម និងកម្មាភិបាល យុទ្ធជននៃកងឆ្មាំសមុទ្រវៀតណាមនិយាយដោយឡែក។ ទន្ទឹមនឹងនោះ ក៏ជាឱកាសសម្រាប់កងកម្លាំងទាំងពីរបន្តពង្រឹងទំនុកចិត្ត កសាង និងរឹតបន្តឹងថែមទៀតនូវទំនាក់ទំនងសហប្រតិបត្តិការសម្រាប់ការអភិវឌ្ឍទៅវិញទៅមក ជំរុញប្រសិទ្ធភាពនៃការសម្របសម្រួលការអនុវត្តច្បាប់នៅលើសមុទ្រ រួមចំណែករក្សាសន្តិសុខ សណ្តាប់ធ្នាប់ និងសុវត្ថិភាពនៅសមុទ្រក្នុងតំបន់។

លោកឧត្តមនាវីត្រី Agapito B Bibat ទស្សនានាវាកងឆ្មាំសមុទ្រលេខ ៨០០២

លោកឧត្តមសេនីយ៍ត្រី Tran Quang Tuan បានសម្តែងនូវក្តីសោមនស្សរីករាយ និងការចាប់អារម្មណ៍ចំពោះមនោសញ្ចេតនារបស់កម្មាភិបាល និងនាវិកនៃកម្លាំងការពារឆ្នេរសមុទ្រហ្វីលីពីន ព្រមទាំងអាជ្ញាធរ និងស្ថាប័នមុខងារនៃទីក្រុង Cebu សម្រាប់គណៈប្រតិភូ។ លោកឧត្តមសេនីយ៍ត្រី Tran Quang Tuan បានសង្កត់ធ្ងន់ថា ដំណើរទស្សនកិច្ចរបស់នាវាកងឆ្មាំសមុទ្រលេខ ៨០០២ គឺជាសកម្មភាពសហប្រតិបត្តិការដ៏សំខាន់មួយ ដើម្បីអនុវត្តអនុស្សរណៈនៃការយោគយល់គ្នា ដែលភាគីទាំងពីរបានចុះហត្ថលេខាកាលពីខែមករា ឆ្នាំ២០២៤។

បន្ទាប់ពីពិធីស្វាគមន៍ លោកឧត្តមនាវីត្រី Agapito B Bibat រួមជាមួយប្រតិភូ កម្មាភិបាល និងនាវិកនៃកម្លាំងការពារឆ្នេរសមុទ្រហ្វីលីពីន បានទៅទស្សនានាវាកងឆ្មាំសមុទ្រលេខ ៨០០២។

* នារសៀលថ្ងៃដដែល គណៈប្រតិភូកងឆ្មាំសមុទ្រវៀតណាមបានចូលជួបសម្តែងការគួរសមជាមួយអាជ្ញាធរទីក្រុង Cebu និងតំបន់មជ្ឈមណ្ឌល Visayas៕

បកប្រែដោយ Huyen Trang