រួមដៃគ្នាថែរក្សាចំណងមិត្តភាព និងសាមគ្គីភាពរវាងប្រទេសជិតខាងទាំងពីរ

ថ្នាក់ដឹកនាំក្រសួងការពារជាតិ អាជ្ញាធរមូលដ្ឋាន និងប្រជាជនចិន ទទួលស្វាគមន៍យ៉ាងកក់ក្តៅចំពោះ លោកនាយឧត្តមសេនីយ៍ Phan Van Giang និងគណៈប្រតិភូជាន់ខ្ពស់ក្រសួងការពារប្រទេសវៀតណាម

នាព្រឹកថ្ងៃទី ១៦ មេសា នៅច្រកទ្វារព្រំដែនអន្តរជាតិ Huu Nghi (ខេត្ដ Lang Son វៀតណាម) លោកនាយឧត្តមសេនីយ៍ Phan Van Giang សមាជិកការិយាល័យនយោបាយ អនុលេខាគណៈកម្មាធិការបក្សយោធាមជ្ឈិម រដ្ឋមន្ត្រីក្រសួងការពារប្រទេស និងគណៈប្រតិភូជាន់ខ្ពស់ក្រសួងការពារប្រទេសវៀតណាម បានធ្វើពិធីគោរពបង្គោលព្រំដែន លាបពណ៌បង្គោល​លេខលេខ ១១១៦ និងចាប់ផ្ដើមចូលរួមរាល់សកម្មភាពក្នុងក្របខ័ណ្ឌនៃជំនួបប្រាស្រ័យមិត្ដភាពការពារជាតិព្រំដែនវៀតណាម - ចិនលើកទី ៩។

បន្ទាប់មក ក្នុងសំឡេងតន្ត្រីដែលពោរពេញទៅដោយមិត្តភាពវៀតណាម-ចិន និងការស្វាគមន៍របស់ប្រជាពលរដ្ឋនៅសងខាងច្រកទ្វារព្រំដែនអន្តរជាតិ Huu Nghi និងច្រកទ្វារព្រំដែន Youyi Guan នោះ លោកឧត្តមសេនីយ៍ឯក Dong Jun រដ្ឋមន្ត្រីក្រសួងការពារជាតិចិន បានទទួលស្វាគមន៍យ៉ាងកក់ក្តៅចំពោះលោក Phan Van Giang រដ្ឋមន្ត្រីក្រសួងការពារប្រទេស​វៀតណាម និងគណៈប្រតិភូក្រសួងការពារប្រទេសវៀតណាម។

ក្នុងក្របខ័ណ្ឌនៃជំនួបប្រាស្រ័យមិត្ដភាពការពារជាតិព្រំដែនវៀតណាម-ចិនលើកទី៩ នេះ រដ្ឋមន្ត្រីទាំងពីរមានសកម្មភាពរួមជាច្រើននៅតំបន់ច្រកទ្វារព្រំដែន Youyi Guan ដូចជា៖ ទស្សនាតំបន់ទេសចរណ៍ច្រកទ្វារព្រំដែន Youyi Guan កងអនុសេនាធំការពារព្រំដែននៃច្រកទ្វារព្រំដែន Youyi Guan និងតំបន់ច្រកទ្វារព្រំដែនឆ្លាតវៃ។

លោកនាយឧត្តមសេនីយ៍ Phan Van Giang និងលោកឧត្តមសេនីយ៍ឯក Dong Jun

អញ្ជើញទៅទស្សនាកងអនុសេនាធំការពារព្រំដែននៃច្រកទ្វារព្រំដែន Youyi Guan លោកនាយឧត្តមសេនីយ៍ Phan Van Giang និងលោកឧត្តមសេនីយ៍ឯក Dong Jun បានដាំដើមឈើអនុស្សាវរីយ៍ក្នុងបរិវេណអង្គភាព ដែលមានអត្ថន័យរក្សា និងពូនជ្រំចំណងមិត្តភាពរវាងកងទ័ពនិងប្រជាជននៃប្រទេសទាំងពីរ។

អញ្ជើញទៅទស្សនាច្រកទ្វារព្រំដែនឆ្លាតវៃនៅច្រកទ្វារព្រំដែន Youyi Guan រដ្ឋមន្ត្រីទាំងពីរបានស្តាប់ការឧទ្ទេសនាមលម្អិតអំពីគំរូច្រកទ្វារព្រំដែនឆ្លាតវៃ។ ខេត្ត Lang Son និងតំបន់ស្វយ័ត Zhuang ខេត្ដ Guangxi បានចុះហត្ថលេខាលើកិច្ចព្រមព្រៀងក្របខណ្ឌស្តីពីការជំរុញការ​សាងសង់សាកល្បងនៃច្រកទ្វារព្រំដែនឆ្លាតវៃនៅថ្ងៃទី ២៦ ខែមិថុនា ឆ្នាំ ២០២៣។ ប្រការនេះ សំដៅអនុវត្ដតាមការយល់ឃើញរួមដែលសម្រេចបានរវាងថ្នាក់ដឹកនាំនៃបក្សទាំងពីរ និងរដ្ឋទាំងពីរវៀតណាមនិងចិន រួមចំណែកជំរុញកិច្ចសហប្រតិបត្តិការសេដ្ឋកិច្ច និងពាណិជ្ជកម្មរវាងភាគីទាំងពីរឲ្យកាន់តែស៊ីជម្រៅថែមទៀត។

លោកនាយឧត្តមសេនីយ៍ Phan Van Giang និងគណៈប្រតិភូជាន់ខ្ពស់ក្រសួងការពារប្រទេសវៀតណាម​ ធ្វើពិធីគោរពបង្គោលព្រំដែន លាបពណ៌បង្គោលលេខលេខ ១១១៦

រដ្ឋមន្ត្រីទាំងពីរបានស្ដាប់កងនាវានៃកងទ័ពជើងទឹកនៃប្រទេសទាំងពីរដែលរាយការណ៍តាមប្រព័ន្ធវីដេអូស្តីពីការត្រៀមរៀបចំសម្រាប់​ការល្បាតរួមគ្នា និងទទួលការបញ្ជាទៅបំពេញភារកិច្ចពីរដ្ឋមន្ត្រីទាំងពីរ។ នេះជាលើកដំបូងដែលសកម្មភាពនេះត្រូវបានបញ្ចូលក្នុងកម្មវិធីជួបប្រាស្រ័យមិត្តភាពការពារជាតិព្រំដែនវៀតណាម-ចិន នេះមិនត្រឹមតែធ្វើឲ្យស៊ីជម្រៅថែមទៀតនូវរាល់សកម្មភាពប៉ុណ្ណោះទេ ថែមទាំងរួមចំណែកពង្រឹងកិច្ចសហប្រតិបត្តិការរវាងកងទ័ពជើងទឹកវៀតណាម និងកងទ័ពជើងទឹកចិន។

លោកនាយឧត្តមសេនីយ៍ Phan Van Giang និងលោកឧត្តមសេនីយ៍ឯក Dong Jun ថតរូបជាមួយកម្មាភិបាលនិងយុទ្ធជននៃប៉ុស្ដិ៍ការពារព្រំដែននៃច្រកទ្វារព្រំដែនអន្តរជាតិ Huu Nghi

បន្តសកម្មភាពក្នុងកម្មវិធីជួបប្រាស្រ័យមិត្ដភាពនៅប្រទេសចិន លោកនាយឧត្តមសេនីយ៍ Phan Van Giang និងលោកឧត្តមសេនីយ៍ឯក Dong Jun បានអញ្ជើញទៅទស្សនាសាលាបឋមសិក្សាលេខ ៤ នៅទីក្រុង Pingxiang។ ក្នុងឱកាសនេះដែរ លោកនាយឧត្តមសេនីយ៍ Phan Van Giang និងលោកឧត្តមសេនីយ៍ឯក Dong Jun បានជូនអំណោយដល់គ្រូបង្រៀន និងសិស្សានុសិស្សនៃសាលា។

ក្នុងក្របខ័ណ្ឌនៃជំនួបប្រាស្រ័យមិត្តភាពការពារជាតិព្រំដែនវៀតណាម-ចិនលើកទី៩ នាយប់ថ្ងៃដដែល នៅទីក្រុង Lang Son វៀតណាម បានប្រព្រឹត្តទៅកម្មវិធី  “កន្សែងពណ៌ផ្កាឈូកមិត្តភាពរវាងកុមារនៅតំបន់ព្រំដែនខេត្ត Lang Son (វៀតណាម) និងខេត្ដ Guangxi (ចិន)”។

គួររំលឹកថា នារសៀលថ្ងៃទី ១៦ ខែមេសា គណៈប្រតិភូកុមារចិនបានទៅទស្សនាសារមន្ទីរខេត្ត Lang Son និងចូលរួមសាកល្បងធ្វើសេរ៉ាមិច និងតុបតែងដួនវៀតណាម៕

បកប្រែដោយ Pham Diep