លោកនាយឧត្តមសេនីយ៍ Phan Van Giang ជួបពិភាក្សាទ្វេភាគីជាមួយរដ្ឋមន្ត្រីក្រសួងការពារជាតិឥណ្ឌូនេស៊ី

លោកនាយឧត្តមសេនីយ៍ Phan Van Giang បានអបអរសាទរ និងវាយតម្លៃខ្ពស់ចំពោះសមិទ្ធិផលសេដ្ឋកិច្ច-សង្គមដែលប្រទេសឥណ្ឌូនេស៊ីសម្រេចបាននាពេលកន្លងមក ក៏ដូចជាកិត្យានុភាពនិងតួនាទីរបស់ឥណ្ឌូនេស៊ីក្នុងឆាកអន្តរជាតិ និងតំបន់។ លោកសំដែងនូវការជឿជាក់ថា ឥណ្ឌូនេស៊ីនឹងបន្តរីកចម្រើន និងមានកិត្យានុភាពកាន់តែខ្ពស់ក្នុងឆាកអន្តរជាតិ និងអនុវត្តដោយជោគជ័យនូវ "ចក្ខុវិស័យឥណ្ឌូនេស៊ី ២០៤៥" ជាមួយនឹងគោលដៅក្លាយជាប្រទេសអភិវឌ្ឍន៍។ ទន្ទឹមនឹងនោះ លោកវាយតម្លៃខ្ពស់ចំពោះគោលនយោបាយការបរទេស និងការរួមចំណែករបស់ឥណ្ឌូនេស៊ីក្នុងការលើកកម្ពស់តួនាទីជាមជ្ឈភាព និងសាមគ្គីភាពរបស់អាស៊ាន។

លោកនាយឧត្តមសេនីយ៍ Phan Van Giang និងលោក Sjafrie Sjamsoeddin រដ្ឋមន្ត្រីក្រសួងការពារជាតិឥណ្ឌូនេស៊ី ត្រួតពលកងកិត្ដិយស

លោកនាយឧត្តមសេនីយ៍ Phan Van Giang បានអះអាងនូវការគាំទ្រចំពោះគំនិតផ្តួចផ្តើមរបស់ឥណ្ឌូនេស៊ីក្នុងក្របខ័ណ្ឌនៃកិច្ចប្រជុំរដ្ឋមន្ត្រីការពារជាតិអាស៊ាន (ADMM) និងកិច្ចប្រជុំរដ្ឋមន្ត្រីការពារជាតិអាស៊ានបូក (ADMM+) ជាពិសេសឯកសារស្តីពីទស្សនៈរបស់អាស៊ានស្តីពីឥណ្ឌូប៉ាស៊ីហ្វិក តាមទស្សនៈវិស័យការពារជាតិ គាំទ្រប្រទេសឥណ្ឌូនេស៊ីក្នុងតួនាទីជាសហប្រធាននៃក្រុមអ្នកជំនាញ ADMM+ ស្តីពីវេជ្ជសាស្ត្រយោធាជាមួយសហរដ្ឋអាមេរិកសម្រាប់ដំណាក់កាល ២០២៤ - ២០២៧។

ក្នុងជំនួបនេះ លោកនាយឧត្តមសេនីយ៍ Phan Van Giang បានសម្តែងការពេញចិត្តចំពោះលទ្ធផលនៃកិច្ចសហប្រតិបត្តិការលើវិស័យការពារជាតិទ្វេភាគី ជាពិសេសបន្ទាប់ពីដំណើរទស្សនកិច្ចជាផ្លូវការនៅវៀតណាមរបស់លោក Prabowo Subianto (បច្ចុប្បន្នជាប្រធានាធិបតីឥណ្ឌូនេស៊ី) ក្នុងឆ្នាំ ២០២២ ដែលក្នុងនោះលេចធ្លោលើវិស័យ៖ ផ្លាស់ប្តូរគណៈប្រតិភូគ្រប់ជាន់ថ្នាក់ រក្សាប្រកបដោយប្រសិទ្ធភាពនៃយន្ដការពិគ្រោះយោបល់ ការសន្ទនា និងកិច្ចសហប្រតិបត្តិការបណ្តុះបណ្តាល ព្រមទាំងកិច្ចសហប្រតិបត្តិការរវាងអង្គភាពនានា ឧស្សាហកម្មការពារជាតិ និងកិច្ចសហប្រតិបត្តិការពាណិជ្ជកម្មយោធា; សម្របសម្រួលនិងគាំទ្រគ្នាទៅវិញទៅមកនៅវេទិកា និងយន្តការពហុភាគី។

លោកនាយឧត្តមសេនីយ៍ Phan Van Giang ជួបពិភាក្សាទ្វេភាគីជាមួយលោក Sjafrie Sjamsoeddin រដ្ឋមន្ត្រីក្រសួងការពារជាតិឥណ្ឌូនេស៊ី

លោក Sjafrie Sjamsoeddin រដ្ឋមន្ត្រីក្រសួងការពារជាតិឥណ្ឌូនេស៊ី បានសម្តែងក្តីរីករាយដែលបានជួបលោកនាយឧត្តមសេនីយ៍ Phan Van Giang ព្រមទាំងលោកវាយតំលៃខ្ពស់ចំពោះកិច្ចសហប្រតិបត្តិការលើវិស័យការពារជាតិវៀតណាម - ឥណ្ឌូនេស៊ីក្នុងរយៈពេលកន្លងនេះ។ លោក Sjafrie Sjamsoeddin បានថ្លែងអំណរគុណវៀតណាម ដែលបានបញ្ជូននាវាកងទ័ពជើងទឹកទៅចូលរួមលំហាត់សមយុទ្ធកងទ័ពជើងទឹកពហុភាគី Komodo ២០២៥ នៅប្រទេសឥណ្ឌូនេស៊ី រួមចំណែកដល់ជោគជ័យរួមនៃសមយុទ្ធនេះ។ ព្រមទាំងលោកស្នើឱ្យក្រសួងការពារជាតិនៃប្រទេសទាំងពីរសិក្សាពង្រីកកិច្ចសហប្រតិបត្តិការលើវិស័យមានសក្តានុពល។

ភាគីទាំងពីរសង្ឃឹមថានឹងបន្តសហប្រតិបត្តិការជាក់លាក់ក្នុងក្របខ័ណ្ឌនៃទំនាក់ទំនងភាពជាដៃគូយុទ្ធសាស្ត្រគ្រប់ជ្រុងជ្រោយ ដែលថ្នាក់ដឹកនាំជាន់ខ្ពស់នៃប្រទេសទាំងពីរបានកំណត់ក្នុងដំណើរទស្សនកិច្ចលើកនេះ គឺផ្តោតលើវិស័យដូចជា ការផ្លាស់ប្តូរគណៈប្រតិភូគ្រប់លំដាប់ថ្នាក់ ជាពិសេសគណៈប្រតិភូជាន់ខ្ពស់; រក្សាប្រកបដោយប្រសិទ្ធភាពនៃយន្តការសន្ទនាគោលនយោបាយការពារជាតិ; ការផ្លាស់ប្តូរព័ត៌មាននិងស្ថានភាព; ពង្រឹងកិច្ចសហប្រតិបត្តិការរវាងអង្គភាពនានា និងកិច្ចសហប្រតិបត្តិការរវាងកងកម្លាំងអនុវត្តច្បាប់នៅសមុទ្រ, ការបណ្តុះបណ្តាលធនធានមនុស្ស និងកិច្ចសហប្រតិបត្តិការលើវិស័យការពារជាតិ...

លោកនាយឧត្តមសេនីយ៍ Phan Van Giang លោក Sjafrie Sjamsoeddin រដ្ឋមន្ត្រីក្រសួងការពារជាតិឥណ្ឌូនេស៊ី និងគណៈប្រតិភូទាំងពីរ

លើសពីនេះ លោកនាយឧត្តមសេនីយ៍ Phan Van Giang សង្ឃឹមថា កងកម្លាំងអនុវត្តច្បាប់ដែនសមុទ្រនៃប្រទេសទាំងពីរនឹងបង្កើនកិច្ចសហប្រតិបត្តិការ និងចែករំលែកព័ត៌មាននិងស្ថានភាព ព្រមទាំងសម្របសម្រួលឆ្លើយតបប្រកបដោយប្រសិទ្ធភាពចំពោះបញ្ហាដែលកើតឡើងបន្ថែមនៅសមុទ្រ បន្តសម្របសម្រួលដោះស្រាយករណីអ្នកនេសាទមកពីប្រទេសនីមួយៗរំលោភលើដែនទឹករបស់គ្នាទៅវិញទៅមក។ កងទ័ពជើងទឹកទាំងពីរនឹងឆាប់បញ្ចប់ការចរចា  និងចុះហត្ថលេខាលើកិច្ចព្រមព្រៀងស្តីពីការល្បាតរួមគ្នា និងបង្កើតបណ្តាញទំនាក់ទំនង៕

បកប្រែដោយ Pham Diep