ពង្រឹងកិច្ចសហប្រតិបត្តិការរវាងមូលដ្ឋានបារាំង និងវៀតណាម

ក្នុងបរិបទដែលប្រទេសទាំងពីរដំឡើងទំនាក់ទំនងទៅជាភាពជាដៃគូយុទ្ធសាស្ត្រលើគ្រប់ជ្រុងជ្រោយកាលពីឆ្នាំមុន ដំណើរទស្សនកិច្ចការងាររបស់លោកឯកអគ្គរដ្ឋទូត Dinh Toan Thang នៅខេត្ត Hérault ប្រទេសបារាំងមានគោលបំណងពង្រឹងទំនាក់ទំនងទ្វេភាគី និងបង្កើតសក្កានុពលសហប្រតិបត្តិការ និងអភិវឌ្ឍន៍លើវិស័យជាច្រើន នាពេលខាងមុខ។

លោកឯកអគ្គរដ្ឋទូត Dinh Toan Thang ធ្វើការជាមួយ លោក François Xavier Lauch អភិបាលខេត្ត Hérault  (រូបថត៖ vnanet.vn)

ក្នុងជំនួបធ្វើការជាមួយ លោក François Xavier Lauch អភិបាលខេត្ត Hérault លោកឯកអគ្គរដ្ឋទូត Dinh Toan Thang បានថ្លែងអំណរគុណចំពោះថ្នាក់ដឹកនាំមូលដ្ឋានដែលបានយកចិត្តទុកដាក់ចំពោះសហគមន៍វៀតណាមនៅទីនេះ។ លោកឯកអគ្គរដ្ឋទូតបានអះអាងថា វត្តមានរបស់សហគមន៍វៀតណាមនៅតំបន់ភាគខាងត្បូងនៃប្រទេសបារាំងមិនត្រឹមតែរួមចំណែកអភិវឌ្ឍន៍សេដ្ឋកិច្ចក្នុងតំបន់ប៉ុណ្ណោះទេ ថែមទាំងដើរតួនាទីសំខាន់ក្នុងកិច្ចសហប្រតិបត្តិការទ្វេភាគីលើវិស័យជាច្រើន។

រីឯខ្លួនវិញ លោក François Xavier Lauch បានសម្តែងនូវសេចក្តីរីករាយក្នុងការទទួលស្វាគមន៍លោកឯកអគ្គរដ្ឋទូត Dinh Toan Thang និងវាយតំលៃខ្ពស់ចំពោះទំនាក់ទំនងមិត្តភាពរវាងវៀតណាម និងបារាំង។

លោក François Xavier Lauch បានមានប្រសាសន៍ថា សក្ដានុពល នៃកិច្ចសហប្រតិបត្តិការរវាងបារាំង និងវៀតណាមគឺធំធេងណាស់ មិនត្រឹមតែដោយសារទំនាក់ទំនងជាប្រវត្តិសាស្ត្រប៉ុណ្ណោះទេ ថែមទាំងដោយសារតែប្រទេសទាំងពីរមានសេដ្ឋកិច្ចយ៉ាងស្វាហាប់ និងប្រឈមមុខនឹងបញ្ហាប្រឈមរួមគ្នា។ បារាំង និងវៀតណាមត្រូវបន្តជំរុញដំណើរទស្សនកិច្ចថ្នាក់ជាន់ខ្ពស់ និងពង្រឹងទំនាក់ទំនងរវាងធុរកិច្ច និងបុគ្គល ដើម្បីបង្កើតមូលដ្ឋានគ្រឹះប្រកបដោយនិរន្តរភាពសម្រាប់កិច្ចសហប្រតិបត្តិការរយៈពេលវែង។

នៅទីក្រុង Béziers លោកឯកអគ្គរដ្ឋទូត Dinh Toan Thang បានជួបជាមួយ លោក Robert Ménard អភិបាលក្រុង និងជាប្រធានសហគមន៍បណ្តា​ទីក្រុង Béziers Méditerranée ផងដែរ។ Béziers គឺជាទីក្រុងចំណាស់ជាងគេមួយនៅក្នុងប្រទេសបារាំង ហើយត្រូវបានគេចាត់ទុកថាជា "រដ្ឋធានីស្រាទំពាំងបាយជូរ" នៃតំបន់។ ក្នុងជំនួបនេះ លោកអភិបាលក្រុង Robert Ménard បានសម្តែងនូវបំណងចង់ពង្រឹងកិច្ចសហប្រតិបត្តិការក្នុងវិស័យទេសចរណ៍ និងទាក់ទាញនិស្សិតវៀតណាមកាន់តែច្រើនមកសិក្សានៅគ្រឹះស្ថានអប់រំរបស់ទីក្រុង។

លោកឯកអគ្គរដ្ឋទូត Dinh Toan Thang ធ្វើការជាមួយ Béziers លោក Robert Ménard អភិបាលក្រុង

នៅទីក្រុងឆ្នេរសមុទ្រ Valras-Plage លោកឯកអគ្គរដ្ឋទូត Dinh Toan Thang បានជួបពិភាក្សាការងារជាមួយអភិបាលក្រុង Daniel Ballester ក្នុងនោះ ភាគីទាំងពីរបានផ្តោតសំខាន់លើការពិភាក្សាអំពីកិច្ចសហប្រតិបត្តិការក្នុងការស្រាវជ្រាវ និងចែករំលែកបទពិសោធន៍លើបញ្ហាសំណឹកនៅតំបន់ឆ្នេរសមុទ្រ ការជ្រាបចូទឹកប្រៃ និងការប្រែប្រួលអាកាសធាតុ។

លោកឯកអគ្គរដ្ឋទូត Dinh Toan Thang ធ្វើការជាមួយសម្ព័ន្ធក្រុមហ៊ុន Barba

លោកឯកអគ្គរដ្ឋទូត Dinh Toan Thang ធ្វើការជាមួយសាកលវិទ្យាល័យ IUT Béziers

ក្នុងដំណើរទស្សនកិច្ចការងារនៅខេត្ត Hérault លោកឯកអគ្គរដ្ឋទូត Dinh Toan Thang និងគណៈប្រតិភូមានសកម្មភាពជាច្រើន រួមទាំងជួបជាមួយធុរកិច្ចក្នុងស្រុក ទស្សនារោងចក្រកែច្នៃត្រីធូណារបស់សម្ព័ន្ធក្រុមហ៊ុន Barba  ផ្លាស់ប្តូរជាមួយសាស្ត្រាចារ្យ និងនិស្សិតនៃសាកលវិទ្យាល័យ IUT Béziers និងជួបជាមួយសហគមន៍វៀតណាមនៅភាគខាងត្បូងប្រទេសបារាំង។

បកប្រែដោយ Duy Hoan