លោក Pham Minh Chinh នាយករដ្ឋមន្ត្រីវៀតណាម ទទួលជួបឯកអគ្គរដ្ឋទូតកូរ៉េខាងត្បូង

លោក Pham Minh Chinh នាយករដ្ឋមន្ត្រីវៀតណាម ទទួលជួបឯកអគ្គរដ្ឋទូតកូរ៉េខាងត្បូង (រូបថត៖ VGP)

លោកនាយករដ្ឋមន្ត្រី បានវាយតម្លៃខ្ពស់ចំពោះកិច្ចខិតខំប្រឹងប្រែង និងការរួមចំណែកវិជ្ជមានរបស់លោកឯកអគ្គរដ្ឋទូតកូរ៉េខាងត្បូង ក្នុងការសម្របសម្រួល និងលើកកម្ពស់ការអភិវឌ្ឍទំនាក់ទំនងទ្វេភាគីប្រកបដោយប្រសិទ្ធភាព និងជាក់ស្តែងលើវិស័យជាច្រើន។ លោកនាយករដ្ឋមន្ត្រី បានសម្តែងការរីករាយដែលទំនាក់ទំនងវៀតណាម-កូរ៉េខាងត្បូង បច្ចុប្បន្នកំពុងស្ថិតក្នុងដំណាក់កាលអភិវឌ្ឍន៍ដ៏ល្អបំផុត ដោយទំនុកចិត្តនយោបាយត្រូវបានពង្រឹងឥតឈប់ឈរ ជាពិសេសបន្ទាប់ពីដំណើរទស្សនកិច្ចកម្រិតខ្ពស់ក្នុងឆ្នាំ ២០២៥ របស់លោក To Lam អគ្គលេខាបក្ស លោក Luong Cuong ប្រធានរដ្ឋ និងលោក វូ វ៉ុន ស៊ីក ប្រធានរដ្ឋសភាកូរ៉េខាងត្បូង ។

ទាក់ទងនឹងទិសដៅអភិវឌ្ឍន៍របស់ប្រទេសវៀតណាម បន្ទាប់ពីមហាសន្និបាត លើកទី១៤ របស់បក្សកុម្មុយនិស្តវៀតណាម លោកនាយករដ្ឋមន្ត្រីបានថ្លែងថា វៀតណាមខិតខំសម្រេចបានអត្រាកំណើនផលិតផលក្នុងស្រុកសរុបជាមធ្យម ១០% ឬច្រើនជាងនេះក្នុងមួយឆ្នាំ ក្នុងអំឡុងឆ្នាំ២០២៦-២០៣០។ ដើម្បីសម្រេចគោលដៅក្លាយជាប្រទេសអភិវឌ្ឍន៍ និងមានចំណូលខ្ពស់នៅឆ្នាំ២០៤៥ វៀតណាមនឹងផ្តោតលើការលុបបំបាត់ឧបសគ្គអំពីច្បាប់ អភិវឌ្ឍវិស័យឯកជន និងការកំណត់ការអភិវឌ្ឈន៍ក្នុងវិស័យវិទ្យាសាស្ត្រ និងបច្ចេកវិទ្យា នវានុវត្តន៍ និងការធ្វើបរិវត្តកម្មឌីជីថល។

លោក Pham Minh Chinh នាយករដ្ឋមន្ត្រីវៀតណាម ទទួលជួបលោក ឆយ យ៉ុង សាំ ឯកអគ្គរដ្ឋទូតកូរ៉េខាងត្បូងប្រចាំនៅវៀតណាម

ដើម្បីលើកកម្ពស់បន្ថែមទៀតនូវភាពជាដៃគូយុទ្ធសាស្ត្រគ្រប់ជ្រុងជ្រោយ លោកនាយករដ្ឋមន្ត្រីបានស្នើឱ្យភាគីទាំងពីរជំរុញពាណិជ្ជកម្មឱ្យឈានដល់ចំណុចកំពូល ១០០ ពាន់លានដុល្លារអាមេរិកក្នុងពេលឆាប់ៗនេះ និងកំណត់គោលដៅ ១៥០ ពាន់លានដុល្លារអាមេរិកនៅឆ្នាំ២០៣០ តាមទិសដៅប្រកបដោយតុល្យភាព។ លោកនាយករដ្ឋមន្ត្រីបានលើកទឹកចិត្តដល់អង្គភាពអាជីវកម្មកូរ៉េខាងត្បូងឱ្យពង្រីកការវិនិយោគលើវិស័យអេឡិចត្រូនិក បច្ចេកវិទ្យាស្នូល និងថាមពលកកើតឡើងវិញ។

ជាពិសេស ដោយសារស្ថានភាពសន្តិសុខស្មុគស្មាញនៅមជ្ឈិមបូព៌ា លោកនាយករដ្ឋមន្ត្រីបានស្នើឱ្យមានកិច្ចសហប្រតិបត្តិការយ៉ាងជិតស្និទ្ធរវាងប្រទេសទាំងពីរ ដើម្បីដោះស្រាយបញ្ហាប្រឈមបច្ចុប្បន្ន ជាពិសេសក្នុងការធានាសន្តិសុខថាមពលជាតិ ការរក្សាការអភិវឌ្ឍសេដ្ឋកិច្ច និងស្ថិរភាពជីវភាពរស់នៅរបស់ប្រជាជន។ ក្នុងឱកាសនេះ លោកនាយករដ្ឋមន្ត្រីក៏បានស្នើសុំឱ្យកូរ៉េខាងត្បួងចែករំលែកបទពិសោធន៍របស់ខ្លួនក្នុងការគ្រប់គ្រងថាមពល ការអភិវឌ្ឍប្រភពឥន្ធនៈជំនួស និងលើកទឹកចិត្តកូរ៉េខាងត្បួងឱ្យបង្កើនការវិនិយោគលើគម្រោងហេដ្ឋារចនាសម្ព័ន្ធថាមពលសំខាន់ៗនៅក្នុងប្រទេសវៀតណាម ដើម្បីបង្កើនការពឹងផ្អែកលើខ្លួនឯង និងភាពធន់នៃសេដ្ឋកិច្ចប្រឆាំងនឹងផលប៉ះពាល់ពីខាងក្រៅ។

ទិដ្ឋភាពនៃជំនួប (រូបថត៖ VGP/Nhat Bac)

លោកឯកអគ្គរដ្ឋទូតកូរ៉េខាងត្បួងបានសម្តែងការយល់ព្រមយ៉ាងខ្លាំងចំពោះសំណើរបស់លោកនាយករដ្ឋមន្ត្រី ហើយបានសន្យាថានឹងខិតខំប្រឹងប្រែងឱ្យអស់ពីសមត្ថភាពដើម្បីសម្របសម្រួលជាមួយក្រសួង និងស្ថាប័នវៀតណាម ដើម្បីអនុវត្តកិច្ចព្រមព្រៀងដែលសម្រេចបានដោយថ្នាក់ដឹកនាំជាន់ខ្ពស់ប្រកបដោយប្រសិទ្ធភាព។លោកឯកអគ្គរដ្ឋទូតបានបញ្ជាក់ថា លោកកំពុងចូលរួមយ៉ាងសកម្មជាមួយរដ្ឋាភិបាលកូរ៉េខាងត្បួង និងសាជីវកម្មថាមពល ដើម្បីពង្រឹងកិច្ចសហប្រតិបត្តិការជាមួយវៀតណាមលើសន្តិសុខថាមពល ហើយបានអះអាងថា លោកនឹងបន្តដើរតួជាស្ពានមួយដើម្បីលើកកម្ពស់ទំនាក់ទំនងរវាងប្រទេសទាំងពីរ ធ្វើឱ្យវាកាន់តែស៊ីជម្រៅ ជាក់ស្តែង និងមានប្រសិទ្ធភាព។

បកប្រែដោយ Duy Hoan