វៀតណាមប្តេជ្ញាធ្វើសកម្មភាពដើម្បីសមភាពយេនឌ័រ និងការលុបបំបាត់អំពើហិង្សាលើស្ត្រី

ព្រឹត្តិការណ៍នេះបានទាក់ទាញការចាប់អារម្មណ៍ និងការចូលរួមពីតំណាងជាច្រើនមកពីប្រទេសជាសមាជិកអង្គការសហប្រជាជាតិ យុវជន និងសាធារណជនដែលចាប់អារម្មណ៍លើបញ្ហាសមភាពយេនឌ័រ។

ថ្លែងនៅក្នុងព្រឹត្តិការណ៍នេះ (តាមរយៈសារដែលបានថតវីដេអូ) អគ្គលេខាធិការរងអង្គការសហប្រជាជាតិ អាមីណា ម៉ូហាម៉េដ បានសង្កត់ធ្ងន់ថា ទោះបីជាមានវឌ្ឍនភាពច្រើនក៏ដោយ ក៏មិនទាន់មានប្រទេសណាមួយសម្រេចបានសមភាពយេនឌ័រពេញលេញនៅឡើយទេ។ អំពើហិង្សាលើយេនឌ័រនៅតែជារបាំងដ៏ធំបំផុតមួយដែលប៉ះពាល់ដោយផ្ទាល់ដល់សុខភាព ការអប់រំ និងឱកាសអភិវឌ្ឍន៍របស់ស្ត្រី និងក្មេងស្រី។

ឯកអគ្គរដ្ឋទូត និងប្រធានស្ថានបេសកកម្មមកពីប្រទេសស៊ុយអែត អ៊ុយរូហ្គាយ និងសហភាពអឺរ៉ុប (EU) ក៏បានចែករំលែកបទពិសោធន៍ និងគំនិតផ្តួចផ្តើមជាច្រើន ដើម្បីលើកកម្ពស់សិទ្ធិស្ត្រី បង្កើនការចូលរួមរបស់ស្ត្រីក្នុងតំណែងជាអ្នកដឹកនាំ និងបានសង្កត់ធ្ងន់លើសារៈសំខាន់នៃការរក្សាសមិទ្ធផលនានា ក្នុងការប្រឈមមុខនឹងបញ្ហាប្រឈមបច្ចុប្បន្ន។

លោកឯកអគ្គរដ្ឋទូត Do Hung Viet  ប្រធានស្ថានបេសកកម្មអចិន្ត្រៃយ៍របស់វៀតណាមប្រចាំអង្គការសហប្រជាជាតិ (រូបថត៖ VNA)

ក្នុងនាមជាវាគ្មិនសំខាន់ម្នាក់នៅក្នុងព្រឹត្តិការណ៍នេះ លោកឯកអគ្គរដ្ឋទូត Do Hung Viet ប្រធានស្ថានបេសកកម្មអចិន្ត្រៃយ៍របស់វៀតណាមប្រចាំអង្គការសហប្រជាជាតិ បានសង្កត់ធ្ងន់ថា “ការបំបែករបាំង” មិនត្រឹមតែឆ្លុះបញ្ចាំងនៅក្នុងសមិទ្ធផលនិមិត្តរូបដ៏លេចធ្លោប៉ុណ្ណោះទេ ប៉ុន្តែសំខាន់ជាងនេះទៅទៀត គឺការធានាឱកាសស្មើភាពគ្នាសម្រាប់ស្ត្រី និងក្មេងស្រីក្នុងគ្រប់កាលៈទេសៈទាំងអស់។ លោកឯកអគ្គរដ្ឋទូតបានបញ្ជាក់ថា ស្ត្រីវៀតណាមតែងតែជាកម្លាំងស្នូល និងជាអ្នកត្រួសត្រាយផ្លូវ ចាប់ពីការការពារមាតុភូមិ រហូតដល់ការអភិវឌ្ឍសេដ្ឋកិច្ចសង្គមរបស់ប្រទេស។ លោកឯកអគ្គរដ្ឋទូត Do Hung Viet ក៏បានចែករំលែកសមិទ្ធផលដ៏លេចធ្លោរបស់វៀតណាមក្នុងការលើកកម្ពស់សមភាពយេនឌ័រ និងការការពារ និងគាំទ្រជនរងគ្រោះនៃអំពើហិង្សាលើយេនឌ័រ។

លោកឯកអគ្គរដ្ឋទូត Do Hung Viet បានសង្កត់ធ្ងន់ថា ការលើកកម្ពស់សមភាពយេនឌ័រ គឺជាការទទួលខុសត្រូវរួមគ្នារបស់សង្គមទាំងមូល ដែលតម្រូវឱ្យមានការចូលរួមពីទាំងបុរស និងស្ត្រី ជាមួយនឹងសកម្មភាពជាក់ស្តែង និងប្រកបដោយចីរភាព ដើម្បីបង្កើតបរិយាកាសសុវត្ថិភាព យុត្តិធម៌ និងអំណោយផលសម្រាប់ស្ត្រី និងក្មេងស្រី។

តាមរយៈការចែករំលែកនឹងបំផុសគំនិតពីវាគ្មិនជាច្រើនដែលជាស្ត្រីជោគជ័យ និងមានឥទ្ធិពលក្នុងវិស័យវិទ្យាសាស្ត្រ បច្ចេកវិទ្យា ប្រព័ន្ធផ្សព្វផ្សាយ កីឡា និងសិល្បៈ ព្រឹត្តិការណ៍ "ស្ត្រីបំបែករបាំង" បានរួមចំណែកដល់ការបញ្ជាក់ពីតួនាទី សក្តានុពល និងការរួមចំណែករបស់ស្ត្រីក្នុងគ្រប់វិស័យ ខណៈពេលដែលបញ្ជាក់ជាថ្មីនូវការប្តេជ្ញាចិត្តរបស់សហគមន៍អន្តរជាតិក្នុងការលុបបំបាត់ការរើសអើង និងអំពើហិង្សាគ្រប់ទម្រង់ប្រឆាំងនឹងស្ត្រី និងក្មេងស្រី ដោយហេតុនេះលើកកម្ពស់សមភាពយេនឌ័រ និងផ្តល់អំណាចដល់ស្ត្រី និងក្មេងស្រីនៅទូទាំងពិភពលោក។

បកប្រែដោយ Duy Hoan