វៀតណាម និងរុស្ស៊ីអនុវត្តជាបន្ទាន់នូវការសន្យាអំពីប្រេង និងឧស្ម័ន

លោក Pham Minh Chinh នាយករដ្ឋមន្ត្រីវៀតណាម បានបញ្ជាក់ថា ទំនាក់ទំនងរវាងវៀតណាម និងសហព័ន្ធរុស្ស៊ីគឺជាទំនាក់ទំនងជិតស្និទ្ធ និងស្មោះត្រង់។ ដោយផ្អែកលើមូលដ្ឋានគ្រឹះនេះ វៀតណាមសង្ឃឹមថានឹងធ្វើការជាមួយរុស្ស៊ីដើម្បីសម្រេចបានកិច្ចព្រមព្រៀងកម្រិតខ្ពស់បន្ថែមទៀត ដោយនាំកិច្ចសហប្រតិបត្តិការទ្វេភាគីកាន់តែស៊ីជម្រៅ មានប្រសិទ្ធភាព និងជាក់ស្តែង។

លោក Pham Minh Chinh នាយករដ្ឋមន្ត្រីវៀតណាម ជួបជាមួយឯកអគ្គរដ្ឋទូតរុស្ស៊ី (រូបថត៖ VGP)

ដើម្បីអនុវត្តលទ្ធផលនៃដំណើរទស្សនកិច្ចផ្លូវការថ្មីៗនេះទៅកាន់ប្រទេសរុស្ស៊ី នៅក្នុងជំនួបនេះ លោក Pham Minh Chinh នាយករដ្ឋមន្ត្រី ក៏បានស្នើឱ្យឯកអគ្គរដ្ឋទូតបន្តសម្របសម្រួលយ៉ាងជិតស្និទ្ធជាមួយក្រសួង ស្ថាប័ន និងអង្គការពាក់ព័ន្ធនៃប្រទេសទាំងពីរ ដើម្បីលើកកម្ពស់ការអនុវត្តការសន្យានានាលើគ្រប់វិស័យ ដោយហេតុនេះលើកកម្ពស់ទំនាក់ទំនងវៀតណាម-រុស្ស៊ី។

នៅក្នុងវិស័យថាមពល ជាពិសេសប្រេង និងឧស្ម័ន លោកនាយករដ្ឋមន្ត្រីបានសង្កត់ធ្ងន់លើតម្រូវការបន្ទាន់ក្នុងការអនុវត្តកិច្ចព្រមព្រៀង និងឯកសារដែលបានចុះហត្ថលេខា ពង្រីកប្រពៃណីនៃកិច្ចសហប្រតិបត្តិការប្រកបដោយប្រសិទ្ធភាពរវាងប្រទេសទាំងពីរ។ ផ្តោតសំខាន់គឺលើការពន្លឿនការរុករកប្រេង និងឧស្ម័ននៅក្នុងទឹកដីនៃប្រទេសនីមួយៗ ខណៈពេលដែលពង្រីកទៅវិស័យថាមពលថ្មី ថាមពលកកើតឡើងវិញ និងការប្រើប្រាស់ថាមពលនុយក្លេអ៊ែរក្នុងបំណងសន្តិភាព។

ទាក់ទងនឹងការដឹកជញ្ជូន លោកនាយករដ្ឋមន្ត្រីបានស្នើឱ្យរុស្ស៊ីបញ្ជូនគណៈប្រតិភូទៅកាន់ប្រទេសវៀតណាមជាបន្ទាន់ ដើម្បីធ្វើការស្រាវជ្រាវ និងសម្របសម្រួលជាមួយតំបន់នានាដូចជាទីក្រុងហាណូយ និងទីក្រុងហូជីមិញ ក្នុងការរចនា និងសាងសង់ប្រព័ន្ធផ្លូវដែកទីក្រុង ក៏ដូចជាលើកកម្ពស់ការតភ្ជាប់ផ្លូវរថភ្លើងវៀតណាម-រុស្ស៊ី។

ទាក់ទងនឹងវិស័យសហប្រតិបត្តិការផ្សេងទៀត លោកនាយករដ្ឋមន្ត្រីបានថ្លែងថា លោកបានណែនាំដល់ក្រសួង ស្ថាប័ន និងតំបន់ពាក់ព័ន្ធឱ្យអនុវត្តកិច្ចព្រមព្រៀងដែលសម្រេចបានក្នុងអំឡុងពេលទស្សនកិច្ចនេះ ដោយធានាបាននូវវឌ្ឍនភាព និងប្រសិទ្ធភាព។

នៅខាងរុស្ស៊ី លោកឯកអគ្គរដ្ឋទូត Gennady Bezdetko បានយល់ស្របនឹងសំណើរបស់លោកនាយករដ្ឋមន្ត្រី ដោយបញ្ជាក់ថា លោកនឹងសម្របសម្រួលយ៉ាងជិតស្និទ្ធជាមួយស្ថាប័ននៃប្រទេសទាំងពីរ ដើម្បីលើកកម្ពស់កិច្ចសហប្រតិបត្តិការយ៉ាងទូលំទូលាយលើគ្រប់វិស័យ ជាពិសេសវិស័យសំខាន់ៗដែលថ្នាក់ដឹកនាំរដ្ឋាភិបាលវៀតណាមបានសង្កត់ធ្ងន់។

បកប្រែដោយ Duy Hoan