តួនាទីរបស់ ADMM/ADMM+ ក្នុងការបង្ការ និងគ្រប់គ្រងជម្លោះ

សិក្ខាសាលានេះមានប្រធានបទ៖ “ឥទ្ធិពលនៃជម្លោះនានាលើតំបន់ និងតួនាទីនៃកិច្ចប្រជុំរដ្ឋមន្ត្រីការពារជាតិអាស៊ាន (ADMM) និងកិច្ចប្រជុំរដ្ឋមន្ត្រីការពារជាតិអាស៊ានបូក (ADMM+) ក្នុងការបង្ការ និងគ្រប់គ្រងជម្លោះ” ដែលរៀបចំដោយសាលាស្រាវជ្រាវអន្តរជាតិ S. Rajaratnam (RSIS) និង​សាកលវិទ្យាល័យបច្ចេកវិទ្យា Nanyang ប្រទេសសិង្ហបុរី។ គណៈប្រតិភូវៀតណាមដឹកនាំដោយលោកឧត្តមសេនីយ៍ត្រី បណ្ឌិត Tran Minh Tuan នាយករងវិទ្យាស្ថានយុទ្ធសាស្ត្រការពារជាតិបានចូលរួមសិក្ខាសាលា។

ក្នុងសុន្ទរកថាបើកសិក្ខាសាលា លោកឯកអគ្គរដ្ឋទូត Ong Keng Yong អនុប្រធានប្រតិបត្តិនៃ RSIS និងជាប្រធាន NADI និងលោកស្រី Elizabeth Tan នាយិកាការិយាល័យគោលនយោបាយការពារជាតិ និងក្រុមគោលនយោបាយការពារជាតិនៃក្រសួងការពារជាតិសិង្ហបុរី បានសង្កត់ធ្ងន់លើសារៈសំខាន់នៃការរៀបចំសិក្ខាសាលា។ លោកស្រី Elizabeth Tan បានមានប្រសាសន៍ថា សិក្ខាសាលានេះត្រូវបានរៀបចំទាន់ពេលវេលា ដោយសារអាស៊ានកំពុងស្ថិតក្នុងដំណើរការបញ្ចប់ចក្ខុវិស័យសហគមន៍អាស៊ានឆ្នាំ២០២៥ និងឆ្ពោះទៅរកចក្ខុវិស័យសហគមន៍អាស៊ានឆ្នាំ២០៤៥។ លើសពីនេះ ភាពតានតឹងកំពុងកើនឡើងទាំងក្នុង និងក្រៅតំបន់បង្ហាញពីភាពបន្ទាន់ ដើម្បីឱ្យអាស៊ានពិភាក្សាយ៉ាងម៉ត់ចត់អំពីវិធានការបង្ការ និងគ្រប់គ្រងជម្លោះ។ លោកស្រី Elizabeth Tan បានសង្កត់ធ្ងន់ថា ប្រទេសអាស៊ាននានាត្រូវតែសហប្រតិបត្តិការជាមួយគ្នាដើម្បីការពារផលប្រយោជន៍រួមនៃតំបន់ ទប់ស្កាត់ជម្លោះកុំឱ្យកើតមានឡើង ឬរីករាលដាលដល់តំបន់ និងធានាអាស៊ានប្រកបដោយសាមគ្គីភាព និងភាពធន់នៅពេលប្រឈមមុខនឹងជម្លោះបែបនេះ។

ប្រតិភូមកពីបណ្តាប្រទេសចូលរួមសិក្ខាសាលា

នៅក្នុងសិក្ខាសាលា តំណាងប្រទេសនានាបានផ្តោតលើការសង្កត់ធ្ងន់លើតួនាទីរបស់អាស៊ាន ដែលក្នុងនោះ ADMM/ADMM+ គឺជាមូលដ្ឋានគ្រឹះដ៏សំខាន់សម្រាប់កិច្ចសន្ទនា កិច្ចសហប្រតិបត្តិការ និងស្ថិរភាពក្នុងតំបន់។ បទអន្តរាគមន៍របស់តំណាងគណៈប្រតិភូវៀតណាមក្នុងសិក្ខាសាលានេះ ទទួលបានការវាយតម្លៃខ្ពស់ពីប្រទេសនានា។ តំណាងគណៈប្រតិភូវៀតណាមបានអះអាងថា តំបន់អាស៊ីអាគ្នេយ៍ និងអាស៊ានដើរតួនាទីសំខាន់កាន់តែខ្លាំងឡើងចំពោះសន្តិសុខ និងការអភិវឌ្ឍនៃប្រទេសជាច្រើនក្នុងតំបន់ និងលើសពីនេះ ក្លាយជាតំបន់សំខាន់សម្រាប់ការចូលរួម ឥទ្ធិពល និងការប្រកួតប្រជែងរវាងមហាអំណាច។ បរិយាកាសសន្តិសុខនាពេលបច្ចុប្បន្ននៅក្នុងតំបន់អាស៊ីអាគ្នេយ៍ជាទូទៅមានស្ថិរភាព ប៉ុន្តែនៅតែមានចំណុចក្តៅ និងបញ្ហាប្រឈមផ្នែកសន្តិសុខមិនមែនជាប្រពៃណីដែលអាចនាំឱ្យមានជម្លោះ។ ADMM/ADMM+ ត្រូវតែបន្តជាយន្តការសហប្រតិបត្តិការដ៏សំខាន់មួយ ដើម្បីបង្ការ និងគ្រប់គ្រងជម្លោះតាមរយៈការលើកកម្ពស់កិច្ចសន្ទនា ការជឿទុកចិត្ត តម្លាភាពក្នុងគោលនយោបាយការពារជាតិ និងសកម្មភាពជាក់ស្តែង ដូចជាការអប់រំ និងបណ្តុះបណ្តាល និងចែករំលែកព័ត៌មាន។ល។

នៅក្នុងបរិបទនយោបាយ និងសន្តិសុខដែលកំពុងផ្លាស់ប្តូរ ADMM/ADMM+ ចាំបាច់ត្រូវពង្រឹងតួនាទីរបស់ខ្លួនបន្ថែមទៀតក្នុងការបង្ការ និងគ្រប់គ្រងជម្លោះក្នុងតំបន់ ដោយទាមទារឱ្យ ADMM/ADMM+ លើកកម្ពស់ការជឿទុកចិត្ត និងការយល់ដឹងគ្នាទៅវិញទៅមករវាងកងទ័ពនៃបណ្តាប្រទេសអាស៊ាន និងជាមួយដៃគូ; រួមទាំងការលើកកម្ពស់កិច្ចសហប្រតិបត្តិការប្រកបដោយប្រសិទ្ធភាពជាក់ស្តែង ដើម្បីដោះស្រាយបញ្ហាប្រឈមសន្តិសុខរួមនៅក្នុងតំបន់ ជាពិសេសបញ្ហាប្រឈមមិនមែនប្រពៃណី; លើកទឹកចិត្ត និងអំពាវនាវឱ្យប្រទេសផ្សេងទៀតគោរពតាមអនុសញ្ញា ស្តីពីបទប្បញ្ញត្តិអន្តរជាតិសម្រាប់ការបង្ការការប៉ះទង្គិចគ្នានៅសមុទ្រ (COLREGs) ឆ្នាំ ១៩៧២ និងណែនាំការអនុវត្តគោលការណ៍នៃការប្រព្រឹត្តក្នុងករណីឧប្បត្តិហេតុផ្លូវអាកាសយោធា (GAME); ស្វែងយល់អំពីលទ្ធភាពនៃការបង្កើតបណ្តាញព្រមានជាមុន មជ្ឈមណ្ឌលដោះស្រាយជម្លោះ និងបង្កើតច្រករបៀងមនុស្សធម៌ក្នុងករណីមានជម្លោះ។ល។

នៅក្នុងសិក្ខាសាលា ប្រតិភូទាំងឡាយក៏បានផ្លាស់ប្តូរទស្សនៈមួយចំនួនក្នុងស្មារតីបើកចំហ និងស្មោះត្រង់ដូចជា៖ អន្តរកម្មរវាងអាស៊ាន និង ADMM/ADMM+ និងតំណភ្ជាប់អនុពហុភាគីក្នុងលក្ខណៈសហប្រតិបត្តិការ និងមិនទំនាស់ផលប្រយោជន៍របស់អាស៊ាន។ ស្តីពីបម្រែបម្រួលអាកាសធាតុ ADMM/ADMM+ អាចសហប្រតិបត្តិការ និងចែករំលែកព័ត៌មានជាមួយអាជ្ញាធរមូលដ្ឋាន ព្រោះជារឿយៗពួកគេជាអ្នកដំបូងគេក្នុងការឆ្លើយតបទៅនឹងវិបត្តិមនុស្សធម៌ដែលបង្កឡើងដោយអាកាសធាតុ។ អាស៊ានក៏អាចផ្តួចផ្តើមការពិភាក្សាអំពីផលប៉ះពាល់ផ្លូវច្បាប់នៃការប្រែប្រួលអាកាសធាតុលើសិទ្ធិអធិបតេយ្យភាពនៃប្រទេសជាប់មាត់សមុទ្រ ។ល៕

បកប្រែដោយ Huyen Trang