ពង្រឹងទំនាក់ទំនងរវាងវៀតណាម និងស៊ុយអែត

លោកនាយករដ្ឋមន្ត្រីស៊ុយអែត Ulf Kristersson បានស្វាគមន៍លោកស្រីអនុប្រធានរដ្ឋ Vo Thi Anh Xuan និងគណៈប្រតិភូជាន់ខ្ពស់វៀតណាមមកបំពេញទស្សនកិច្ចនៅព្រះរាជាណាចក្រស៊ុយអែតក្នុងឱកាសដែលប្រទេសទាំងពីរប្រារព្ធខួបលើកទី ៥៥ នៃការបង្កើតទំនាក់ទំនងការទូត (១៩៦៩-២០២៤) និងអះអាងនូវសារៈសំខាន់នៃទំនាក់ទំនងជាមួយវៀតណាម ហើយមានបំណងជំរុញកិច្ចសហប្រតិបត្តិការរវាងប្រទេសទាំងពីរលើវិស័យពាណិជ្ជកម្ម វិនិយោគ នវានុវត្តន៍ ការធ្វើបរិវត្តកម្មឌីជីថល ការធ្វើបរិវត្តកម្មបៃតង ការឆ្លើយតបទៅនឹងការប្រែប្រួលអាកាសធាតុ ការអភិវឌ្ឍន៍ប្រកបដោយចីរភាព។

លោកនាយករដ្ឋមន្ត្រីស៊ុយអែត Ulf Kristersson ទទួល​ស្វាគមន៍លោកស្រីអនុប្រធានរដ្ឋ Vo Thi Anh Xuan

លោកស្រីអនុប្រធានរដ្ឋ Vo Thi Anh Xuan បានអះអាងថា វៀតណាមជានិច្ចកាលយកចិត្តទុកដាក់ក្នុងការពង្រឹង និងពង្រីកទំនាក់ទំនងមិត្តភាពប្រពៃណី និងកិច្ចសហប្រតិបត្តិការល្អជាមួយស៊ុយអែត និងស្នើរដ្ឋាភិបាលស៊ុយអែតបន្តលើកទឹកចិត្តសហគ្រាសស៊ុយអែតឲ្យជំរុញការវិនិយោគនៅវៀតណាមលើវិស័យដែលស៊ុយអែតមានចំណុចខ្លាំង ហើយវៀតណាមមានតម្រូវការដូចជាថាមពលកកើតឡើងវិញ ការធ្វើបរិវត្តកម្មឌីជីថល និងការធ្វើបរិវត្តកម្មបៃតង សេដ្ឋកិច្ចរាងជារង្វង់ ហេដ្ឋារចនាសម្ព័ន្ធ ជាពិសេសជួយវៀតណាមផ្លាស់ប្តូរគំរូកំណើនសេដ្ឋកិច្ចដែលទាក់ទងនឹងការច្នៃប្រឌិត ជាវិស័យដែលស៊ុយអែតមានចំណុចខ្លាំងឈានមុខគេក្នុងពិភពលោក។

ដោយផ្អែកលើសមិទ្ធិផលល្អនៃកិច្ចសហប្រតិបត្តិការក្រោយរយៈពេល ៥៥ ឆ្នាំ ភាគីទាំងពីរបានឯកភាពគ្នាក្នុងការធ្វើឱ្យទំនាក់ទំនងរវាងប្រទេសទាំងពីរកាន់តែស៊ីជម្រៅតាមរយៈការជំរុញការផ្លាស់ប្តូរគណៈប្រតិភូគ្រប់លំដាប់ថ្នាក់ ជាពិសេសថ្នាក់ជាន់ខ្ពស់; បន្តសម្របសម្រួលយ៉ាងជិតស្និទ្ធនៅវេទិកាតំបន់ និងអន្តរជាតិ ដូចជាអង្គការសហប្រជាជាតិ និងក្របខ័ណ្ឌកិច្ចសហប្រតិបត្តិការអាស៊ាន-សហភាពអឺរ៉ុប។ ពង្រឹងកិច្ចសហប្រតិបត្តិការលើវិស័យនវានុវត្តន៍ វិទ្យាសាស្ត្រ បច្ចេកវិទ្យា វប្បធម៌ ទេសចរណ៍ និងការផ្លាស់ប្តូរប្រជាជន តាមរយៈការបង្កើនការយល់ដឹងគ្នាទៅវិញទៅមក និងរឹតចំណងមិត្តភាពរវាងប្រជាជនទាំងពីរ រួមចំណែកជំរុញការអភិវឌ្ឍន៍ទំនាក់ទំនងរវាងប្រទេសទាំងពីរឱ្យកាន់តែរីកចម្រើន។

លោកនាយករដ្ឋមន្ត្រីស៊ុយអែត Ulf Kristersson និងលោកស្រីអនុប្រធានរដ្ឋ Vo Thi Anh Xuan អញ្ជើញជាសាក្សីក្នុងពិធីប្រគល់អនុស្សរណៈនៃការយោគយល់គ្នា

មុនពេលជំនួបពិភាក្សា មេដឹកនាំទាំងពីរបានអញ្ជើញជាសាក្សីក្នុងពិធីប្រគល់អនុស្សរណៈនៃការយោគយល់គ្នារវាងក្រសួងការបរទេសវៀតណាម និងក្រសួងការបរទេសស៊ុយអែត រវាងក្រសួងឧស្សាហកម្ម និងពាណិជ្ជកម្មវៀតណាម និងក្រសួងការបរទេស នៃប្រទេសស៊ុយអែត។

បកប្រែដោយ Duy Hoan