លោក Luong Cuong ប្រធានរដ្ឋវៀតណាម ទៅដល់ទីក្រុងលីម៉ា ចាប់ផ្តើមដំណើរទស្សនកិច្ចផ្លូវការនៅប៉េរូ និងចូលរួមកិច្ចប្រជុំកំពូល APEC

ទទួលស្វាគមន៍លោកប្រធានរដ្ឋ Luong Cuong និងគណៈប្រតិភូជាន់ខ្ពស់ នៅអាកាសយានដ្ឋាន Jorge Chavez ភាគីប៉េរូមានរដ្ឋមន្ត្រីរដ្ឋាភិបាល និងមន្ត្រីក្រសួងការបរទេសមួយចំនួនទៀត។ ខាងភាគីវៀតណាមមានលោក Bui Van Nghi ឯកអគ្គរដ្ឋទូតវៀតណាមប្រចាំនៅប្រេស៊ីល និងប៉េរូ ព្រមទាំងកម្មាភិបាល និងបុគ្គលិកនៃស្ថានទូតវៀតណាមផងដែរ។

លោកប្រធារដ្ឋ Luong Cuong ទៅដល់អាកាសយានដ្ឋានអន្តរជាតិ Jorge Chavez ក្នុងទីក្រុងលីម៉ា ចាប់ផ្តើមដំណើរទស្សនកិច្ចផ្លូវការទៅកាន់ប្រទេសប៉េរូ

នេះជាដំណើរទស្សនកិច្ចផ្លូវការលើកដំបូងរបស់ប្រធានរដ្ឋវៀតណាម។ ប្រព្រឹត្តទៅចំនឹងឱកាសដែលប្រទេសទាំងពីរប្រារព្ធខួបលើកទី ៣០ នៃការបង្កើតទំនាក់ទំនងការទូតនោះ ដំណើរទស្សនកិច្ចនេះត្រូវបានគេរំពឹងថាជាព្រឹត្តិការណ៍ប្រវត្តិសាស្ត្រ រួមចំណែកក្នុងការពង្រឹងមូលដ្ឋានគ្រឹះនៃទំនាក់ទំនងនយោបាយដ៏ល្អរវាងប្រទេសទាំងពីរ និងបង្កើនប្រសិទ្ធភាពកិច្ចសហប្រតិបត្តិការលើវិស័យសក្តានុពល និងមានបំណងនាំទំនាក់ទំនងឡើងកម្រិតកំពស់ថ្មីមួយ។

លើសពីនេះ ការចូលរួមរបស់លោកប្រធានរដ្ឋក្នុងកិច្ចប្រជុំកំពូល APEC ឆ្នាំ ២០២៤ ក្នុងឱកាសរំលឹកខួបលើកទី ៣៥ នៃការបង្កើតវេទិកានេះ បន្តអះអាងនូវការរួមចំណែកជាវិជ្ជមាន និងការទទួលខុសត្រូវរបស់វៀតណាមក្នុងការដោះស្រាយបញ្ហាក្នុងតំបន់ និងសកលលោក ជាពិសេសជំរុញដំណើរការសមាហរណកម្មសេដ្ឋកិច្ចអន្តរជាតិ បង្កើតសន្ទុះថ្មីសម្រាប់កំណើនក្នុងតំបន់ បន្តពង្រឹងតួនាទីរបស់ APEC ជាវេទិកាសេដ្ឋកិច្ចឈានមុខគេ។

ក្នុងរយៈពេលជាង ២៥ ឆ្នាំនៃការចូលរួមក្នុង APEC វៀតណាមបានបន្សល់ទុកនូវភាពលេចធ្លោជាច្រើនក្នុងកិច្ចសហប្រតិបត្តិការ APEC ហើយតែងតែត្រូវបានវាយតម្លៃថាជាសមាជិកជាមួយមានការរួមវិភាគទានវិជ្ជមាន មានទំនួលខុសត្រូវ និងមានប្រសិទ្ធភាព ក្នុងការសម្រេចបាននូវគោលដៅ និងចក្ខុវិស័យសហប្រតិបត្តិការ ក៏ដូចជាការលើកកំពស់តួនាទីរបស់វេទិកា។

ម៉្យាងវិញទៀត ការចូលរួមក្នុងកិច្ចប្រជុំកំពូល APEC គឺជាឱកាសមួយសម្រាប់លោកប្រធានរដ្ឋជួបប្រាស្រ័យទាក់ទងជាមួយថ្នាក់ដឹកនាំ APEC រួមទាំងដៃគូយុទ្ធសាស្ត្រគ្រប់ជ្រុងជ្រោយជាច្រើន រួមចំណែកក្នុងការបន្តទំនាក់ទំនងកាន់តែស៊ីជម្រៅជាមួយសមាជិក APEC។

តាមគម្រោង ក្នុងអំឡុងពេលបំពេញទស្សនកិច្ចនៅប្រទេសប៉េរូ លោកប្រធានរដ្ឋនឹងចូលរួមក្នុងពិធីទទួលបដិសណ្ឋារកិច្ចជាផ្លូវការក្រោមអធិបតីភាពប្រធានាធិបតីនៃប្រទេសប៉េរូ: ជួបពិភាក្សាជាមួយថ្នាក់ដឹកនាំរដ្ឋាភិបាល និងរដ្ឋសភានៃប្រទេសប៉េរូ។ ទន្ទឹមនឹងនោះ លោកប្រធានរដ្ឋនឹងចូលរួមជាមួយថ្នាក់ដឹកនាំនៃបណ្តាខឿនសេដ្ឋកិច្ចជាសមាជិកចូលរួមកិច្ចប្រជុំកំពូល APEC; ចូលរួមនិងថ្លែងសុន្ទរកថាសំខាន់ៗនៅកិច្ចប្រជុំកំពូលពាណិជ្ជកម្ម APEC - CEO Summit ការសន្ទនាក្រៅផ្លូវការរវាងថ្នាក់ដឹកនាំ APEC និងភ្ញៀវកិត្តិយស; និងសកម្មភាពទ្វេភាគីជាច្រើនទៀត។

បកប្រែដោយ Duy Hoan