ដើម្បីការប្រកួតកីឡាយោធា (Army Games) ឆ្នាំ២០២០ ប្រកបដោយសុវត្ថិភាព

បុគ្គលិកពេទ្យរុស្ស៊ីបានពិនិត្យសីតុណ្ហភាពសម្រាប់សមាជិកនៃក្រុមកងទ័ពប្រជាជនវៀតណាមនៅលើយន្តហោះ

Army Games ឆ្នាំ ២០២០ បានប្រព្រឹត្តឡើងនៅចំពេលដែលការរីករាលដាល Covid-19 កំពុងកើតមានយ៉ាងស្មុគស្មាញនៅលើពិភពលោក។ ដើម្បី Army Games ឆ្នាំ២០២០  ប្រកបដោយសុវត្តភាព  ក្រសួងការពារជាតិរុស្ស៊ីបានតម្រូវឱ្យក្រុមចូលរួម Army Games ឆ្នាំ២០២០ ទាំងអស់ មិនត្រឹមតែត្រូវបង្ហាញលិខិតបញ្ជាក់លទ្ធផលអវិជ្ជមានជំងឺ Covid-19 នោះទេ ថែមទាំងត្រូវតែបន្តធ្វើតេស្ត Covid-19 នៅតាមកន្លែងស្នាក់នៅ និងដាក់ឱ្យនៅដាច់ដោយឡែកក្នុងរយៈពេល ៣ ថ្ងៃទៀតផង។

សមាជិកនៃក្រុមគីមីសាស្ត្រឆ្លៀតពេលហ្វឹកហ្វឺនក្នុងបន្ទប់

បណ្តាក្រុមកងទ័ពប្រជាជនវៀតណាមបានចាត់តាំងបុគ្គលិកទៅត្រួតពិនិត្យសីតុណ្ហភាព និងតាមដានស្ថានភាពសុខភាពរបស់អត្តពលិកទាំងអស់ជាប្រចាំថ្ងៃ ហើយនៅតាមបន្ទប់នីមួយៗសម្រាប់មនុស្ស ២ នាក់ដែលដាក់ឲ្យនៅដាច់ដោយឡែកពីគេនោះ ត្រូវបានប្រែក្លាយទៅជា “ទីធ្លាហ្វឹកហ្វឺន” វិញ។  កន្លែងនេះក្លាយទៅជាកន្លែងសម្រាប់កម្មាភិបាល និងយុទ្ធជនវៀតណាមហ្វឹកហ្វឺនលត់ដំកាយសម្បទា និងសិក្សាស្រាវជ្រាវលើឯកសារនានាដែលទាក់ទងនឹង Army Games 2020 ដើម្បីត្រៀមចូលរួមការប្រកួតជាក់ស្តែង។

“បន្ទាប់ពីចូលទៅកន្លែងដែលគេដាក់ឲ្យនៅដាច់ដោយឡែកពីគេ​នោះ  សមាជិកទាំងអស់បានគោរពយ៉ាងម៉ឹងមាត់នូវវិន័យរបស់ភាគីមិត្ត ហើយឆ្លៀតពេលវេលាសិក្សាឯកសារនានាដែលទាក់ទងនឹងការប្រកួត ព្រមទាំងរក្សាការហាត់ប្រាណពេលព្រឹក និងពេលល្ងាចនៅ​ក្នុងបន្ទប់របស់ខ្លួនឯងផងដែរ”។ នេះបើយោងតាមការចែករំលែកពី លោកវរសេនីយ៍ឯក Bui Danh Danh ប្រធានក្រុមបាញ់ស៊ីប។

ក៏ដូចជាក្រុមបាញ់ស៊ីបដែរ ក្រុមកាំភ្លើងធំ ក៏បានគោរពយ៉ាងម៉ឹងម៉ាត់នូវវិន័យរបស់ភាគីមិត្តដែរ សមាជិកទាំងអស់មិនចេញពីបន្ទប់ទេ ហើយរៀបចំបន្ទប់ឲ្យមានសណ្តាប់ធ្នាប់ និងស្លៀកពាក់ឯកសណ្ឋានដូចគ្នាដែរ។

ក្រុមបាញ់ស៊ីបកំពុងហ្វឹកហាត់

ពេល​ស្នាក់នៅនៅសណ្ឋាគារ Slavyanka នៅទីក្រុងមូស្គូ ក្រុមគីមីសាស្ត្រត្រូវបានគេតម្រូវឲ្យមិន​បានចាកចេញពីបរិវេណសណ្ឋាគារ និង​ត្រូវរក្សាគម្លាតសង្គម។ ហេតុដូច្នេះ លើកលែងតែពេលទៅពិសារអាហារ  អត្តពលិកទាំងអស់បានចំណាយពេលភាគច្រើនរបស់ពួកគេនៅក្នុងបន្ទប់ដើម្បីជៀសវាងការជួបប្រាស្រ័យទាក់ទងនឹងមនុស្សនៅខាងក្រៅ។

ក្នុងអំឡុងពេលនៅដាច់ដោយឡែកពីគេក្នុងរយៈពេល ៣ ថ្ងៃនេះ អាហារបរិភោគរបស់ក្រុមនានា ត្រូវបានបុគ្គលិករុស្ស៊ីដែលពាក់ម៉ាស់ ​ពាក់ស្រោមដៃ យកទៅដល់បន្ទប់និមួយៗតែម្តង។

“កម្មាភិបាល នៃក្រសួងការពារជាតិ និងក្រសួងសុខាភិបាលនៃប្រទេសរុស្ស៊ីតែងតែចុះទៅពិនិត្យកន្លែងដែលក្រុម​​កងទ័ពប្រជាជន​វៀ​តណា​​ម​កំ​ពុ​ង​ស្នាក់នៅ។ អាចនិយាយបានថា  ការបង្ការជំងឺរាតត្បាតរបស់ភាគីមិត្តគឺពិតជាល្អណាស់”។ នេះបើយោងតាមការចែក​រំលែកពី​ លោកវរសេនីយ៍ឯក Ngo Van Dinh ប្រធានក្រុមគីមីសាស្ត្រ៕

បកប្រែដោយ Duy Hoan