លោកនាយឧត្តមសេនីយ៍ Phan Van Giang ជួបប្រាស្រ័យជាមួយអ្នកបោះឆ្នោតនៅកងពលធំលេខ ៣១២

ជម្រាបជូនកម្មាភិបាល និងយុទ្ធជននៃកងពលធំលេខ ៣១២ អំពីខ្លឹមសារមួយចំនួនអំពីស្ថានភាពពិភពលោកតំបន់ និងក្នុងប្រទេស លោកនាយឧត្តមសេនីយ៍ Phan Van Giang បានអះអាងថា ក្រោមការដឹកនាំដ៏ឈ្លាសវៃ និងទាន់ពេលវេលារបស់បក្ស និងការចូលរួមនៃប្រព័ន្ធនយោបាយទាំងមូល ស្ថានភាពសេដ្ឋកិច្ចសង្គមក្នុងរយៈពេល ៦ ខែដើមឆ្នាំ២០២៥ បន្តសម្រេចបានលទ្ធផលវិជ្ជមាន ទូលំទូលាយ និងសំខាន់ៗជាច្រើន។

លោកនាយឧត្តមសេនីយ៍ Phan Van Giang ជាមួយថ្នាក់ដឹកនាំ និងមេបញ្ជាការកងពលធំលេខ៣១២ អង្គទ័ពលេខ១២

អំពីភារកិច្ចយោធា និងការពារជាតិ ក្នុងរយៈពេល ៦ ខែដើមឆ្នាំ២០២៥ លោកនាយឧត្តមសេនីយ៍ Phan Van Giang បានអះអាងថា គណៈកម្មាធិការបក្សយោធាមជ្ឈិម ក្រសួងការពារប្រទេស បានដឹកនាំ និងណែនាំកងទ័ពទាំងមូលរួបរួមគ្នា ជំនះពុះពារការលំបាកយ៉ាងសកម្ម និងបំពេញភារកិច្ចយ៉ាងទូលំទូលាយ។ អនុវត្តភារកិច្ចហ្វឹកហ្វឺនបានល្អ និងរក្សាការត្រៀមខ្លួនប្រយុទ្ធយ៉ាងតឹងរ៉ឹង ប្រកាន់ខ្ជាប់ និងវាយតម្លៃស្ថានភាពឱ្យបានត្រឹមត្រូវ ផ្តល់យោបល់ដល់បក្ស និងរដ្ឋអំពីគោលនយោបាយ និងវិធានការនានា ដើម្បីដោះស្រាយស្ថានការណ៍ប្រកបដោយប្រសិទ្ធភាព ជៀសវាងភាពអសកម្ម ឬភ្ញាក់ផ្អើល និងការពារអធិបតេយ្យភាព និងបូរណភាពទឹកដីនៃមាតុភូមិយ៉ាងរឹងមាំ។

លោកនាយឧត្តមសេនីយ៍ Phan Van Giang និងប្រតិភូរដ្ឋសភាខេត្ត Thai Nguyen អញ្ជើញជួបប្រាស្រ័យជាមួយអ្នកបោះឆ្នោត

លោកនាយឧត្តមសេនីយ៍ Phan Van Giang បានវាយតម្លៃថា ក្នុងរយៈពេល ៦ ខែដើមឆ្នាំ២០២៥ ដោយសាមគ្គីភាព និងការឯកភាពខ្ពស់ កងពលធំលេខ ៣១២ បានដាក់ពង្រាយយ៉ាងទូលំទូលាយ និងសម្រេចបានជោគជ័យនូវភារកិច្ចដែលត្រូវបានប្រគល់។ លោកនាយឧត្តមសេនីយ៍ Phan Van Giang បានស្នើឱ្យកម្មាភិបាល និងយុទ្ធជននៃកងពលធំលេខ៣១២ និងអង្គភាពដែលឈរជើងនៅខេត្ត Thai Nguyen បន្តក្តាប់ស្ថានការណ៍ កំណត់សតិអារម្មណ៍ល្អ ជំនះពុះពារការលំបាកយ៉ាងសកម្ម និងអនុវត្តភារកិច្ចយោធា និងការពារជាតិក្នុងរយៈពេល៦ ខែចុងឆ្នាំ២០២៥ និងឆ្នាំបន្តបន្ទាប់ប្រកបដោយជោគជ័យ។ ទន្ទឹមនឹងនោះ កសាងអង្គភាពបក្សរឹងមាំខាងនយោបាយ សតិអារម្មណ៍សីលធម៌ អង្គភាព និងកម្មាភិបាល ស្ថាប័ន និងអង្គភាពរឹងមាំគ្រប់ជ្រុងជ្រោយ  ដោយបំពេញប្រកបដោយជោគជ័យនូវរាល់ភារកិច្ចដែលត្រូវបានប្រគល់ ជំរុញចលនាប្រឡងប្រណាំង បង្កើតស្នាដៃ ដើម្បីអបអរសារទរមហាសន្និបាតបក្សនៃអង្គទ័ពលេខ១២ និងមហាសន្និបាតបក្សកងទ័ពលើកទី១២។

លោកនាយឧត្តមសេនីយ៍ Phan Van Giang ផ្តល់អំណោយរបស់គណៈកម្មាធិការបក្សយោធាមជ្ឈិម ក្រសួងការពារប្រទេស ជូនកម្មាភិបាល និងយុទ្ធជននៃកងពលធំលេខ៣១២

ក្នុងឱកាសនេះ លោកនាយឧត្តមសេនីយ៍ Phan Van Giang បានប្រគល់អំណោយរបស់គណៈកម្មាធិការបក្សយោធាមជ្ឈិម ក្រសួងការពារប្រទេស ជូនដល់អង្គភាព និងយោធិន ដែលជាយុទ្ធជនពិការ កូនរបស់យុទ្ធជនពលី និងយោធិនជួបការលំបាកពិសេសនៃកងពលធំលេខ៣១២៕

បកប្រែដោយ Huyen Trang