សាលានាយទាហានកងទ័ពជើងគោកលេខ១ ទទួលគ្រឿងឥស្សរិយយសការពារមាតុភូមិថ្នាក់ទី១

លោកនាយឧត្តមសេនីយ៍ Nguyen Tan Cuong សមាជិកគណៈកម្មាធិការមជ្ឈិមបក្ស សមាជិកអចិន្ត្រៃយ៍នៃគណៈកម្មាធិការបក្សយោធាមជ្ឈិម ប្រធានអគ្គសេនាធិការនៃកងទ័ពប្រជាជនវៀតណាម អនុរដ្ឋមន្ត្រីក្រសួងការពារប្រទេសវៀតណាម បានអញ្ជើញចូលរួមពិធី។

លោកនាយឧត្តមសេនីយ៍ Nguyen Tan Cuong មានប្រសាសន៍ក្នុងពិធី

ក្នុងរយៈពេល ៨០ ឆ្នាំនៃការកសាង អប់រំ បណ្តុះបណ្តាល ប្រយុទ្ធ និងអភិវឌ្ឍ សាលានាយទាហានកងទ័ពជើងគោកលេខ១ តែងតែទទួលបានការយកចិត្តទុកដាក់យ៉ាងជ្រាលជ្រៅពីបក្ស រដ្ឋ គណៈកម្មាធិការបក្សយោធាមជ្ឈិម និងក្រសួងការពារប្រទេស។ ជាពិសេស សាលាមានកិត្តិយសទទួលលោកអ៊ំ ហូ មកទស្សនាចំនួន ៩ លើក។ សាលាក៏ទទួលបានសារលិខិតលើកទឹកចិត្ត និងលើកសរសើរជាច្រើនលើក ហើយទទួលបានទង់ "ស្មោះត្រង់នឹងប្រទេសជាតិ ស្មោះត្រង់ចំពោះប្រជាជន" ពីលោកអ៊ំ ហូ។ មកទល់នឹងពេលនេះ សាលាបានបើកវគ្គបណ្តុះបណ្តាលចំនួន ៩២ វគ្គ ដែលបណ្តុះបណ្តាលនាយទាហាន និងកម្មាភិបាលជិត ១២ ម៉ឺននាក់ក្នុងកងទ័ព។ ព្រមទាំង សាលាបានបណ្តុះបណ្តាលមន្ត្រីយោធារាប់ពាន់នាក់សម្រាប់បណ្តាប្រទេសអាស៊ី អាហ្រ្វិក អាមេរិកឡាទីន ជាពិសេសសម្រាប់ប្រទេសឡាវ។ ទន្ទឹមនឹងនោះ សាលាបានបញ្ជូនកម្មាភិបាល និងគ្រូបង្រៀនរាប់រយនាក់ទៅបំពេញបេសកកម្មអន្តរជាតិ ព្រមទាំងទទួលគណៈប្រតិភូយោធាជាច្រើនរបស់ប្រទេសនានាមកទស្សនា ផ្លាស់ប្តូរ និងចែករំលែកបទពិសោធន៍ រួមចំណែកអនុវត្តគោលនយោបាយការបរទេសរបស់បក្ស និងរដ្ឋ រឹតបន្តឹងទំនាក់ទំនងមិត្តភាព និងកិច្ចសហប្រតិបត្តិការរវាងកងទ័ពប្រជាជនវៀតណាម និងកងទ័ពនៃបណ្ដាប្រទេសក្នុងតំបន់ និងលើពិភពលោក។

ដោយទទួលការផ្ទេរសិទ្ធិពីប្រធានរដ្ឋ លោកនាយឧត្តមសេនីយ៍ Nguyen Tan Cuong ប្រគល់គ្រឿងឥស្សរិយយសការពារមាតុភូមិថ្នាក់ទី១ ជូនដល់សាសាលានាយទាហានកងទ័ពជើងគោកលេខ១

មានប្រសាសន៍ក្នុងពិធីនេះ ក្នុងនាមគណៈកម្មាធិការបក្សយោធាមជ្ឈិម និងក្រសួងការពារប្រទេស លោកនាយឧត្តមសេនីយ៍ Nguyen Tan Cuong បានទទួលស្គាល់ និងលើកសរសើរចំពោះលទ្ធផលល្អ និងសមិទ្ធិផលដែលសាលានាយទាហានកងទ័ពជើងគោកលេខ១ សម្រេចក្នុងរយៈពេល ៨០ ឆ្នាំកន្លងមក។ នាពេលខាងមុខ ដើម្បីបំពេញតម្រូវការនៃភារកិច្ចដែលត្រូវបានប្រគល់ជូន លោកនាយឧត្តមសេនីយ៍ Nguyen Tan Cuong បានស្នើឲ្យថ្នាក់ដឹកនាំ កម្មាភិបាល គ្រូបង្រៀន សិក្ខាកាម កម្មាភិបាល និងយុទ្ធជននៃសាលាបន្តអនុវត្តប្រកបដោយជោគជ័យនូវគោលការណ៍ណែនាំរបស់បក្ស គោលនយោបាយ ច្បាប់របស់រដ្ឋ គោលការណ៍របស់គណៈកម្មាធិការបក្សយោធាមជ្ឈិម និងក្រសួងការពារប្រទេស អំពីយោធា ការពារជាតិ ការកសាងកងទ័ព ការការពារមាតុភូមិ ក្នុងដំណាក់កាលធ្វើបដិវត្តន៍ថ្មី ហើយកសាងសាលាដ៏រឹងមាំលើគ្រប់វិស័យ "ស្មោះត្រង់ ត្រួសត្រាយ គំរូ ប្តេជ្ញាឈ្នះ"។

ទន្ទឹមនឹងនោះ សាលាគប្បីបន្តអនុវត្តប្រកបដោយប្រសិទ្ធភាពនូវគម្រោង “ផ្លាស់ប្ដូរថ្មីនូវដំណើរការ និងកម្មវិធីបណ្តុះបណ្តាលសម្រាប់នាយទាហានគ្រប់លំដាប់ថ្នាក់ក្នុងជួរកងទ័ពរហូតដល់ឆ្នាំ ២០៤៥” និងបាវចនា “គុណភាពនៃការបណ្ដុះបណ្ដាលរបស់សាលាគឺជាសមត្ថភាពត្រៀមខ្លួនប្រយុទ្ធជាស្រេចរបស់អង្គភាព” ហើយពង្រឹងទំនាក់ទំនងសាមគ្គីភាព ជិតស្និទ្ធរវាងកងទ័ពនិងប្រជាជន រវាងសាលានិងគណៈកម្មាធិការបក្ស អាជ្ញាធរ និងប្រជាជននៅមូលដ្ឋាន...៕

បកប្រែដោយ Thuy Anh