ក្រសួងការពារប្រទេសវៀតណាម ចាត់បញ្ជូនកងកម្លាំងទៅមីយ៉ាន់ម៉ា ដើម្បីចូលរួមការជួយសង្គ្រោះក្រោយគ្រោះរញ្ជួយដី

លោកឧត្តមសេនីយ៍ឯក Huynh Chien Thang អនុប្រធានអគ្គសេនាធិការនៃកងទ័ពប្រជាជនវៀតណាមបានធ្វើជាអធិបតីនៃកិច្ចប្រជុំ។

លោកឧត្តមសេនីយ៍ឯក Huynh Chien Thang ថ្លែងមតិក្នុងកិច្ចប្រជុំ

រាយការណ៍នៅក្នុងកិច្ចប្រជុំ ថ្នាក់ដឹកនាំនាយកដ្ឋានជួយសង្គ្រោះ និងគ្រោះមហន្ដរាយ បានឲ្យដឹងថា ការរញ្ជួយដីកម្រិត ៧.៧ រ៉ិចទ័រ ដែលបានកើតឡើងនៅថ្ងៃទី ២៨ ខែមីនា នៅភាគកណ្តាលនៃប្រទេសមីយ៉ាន់ម៉ា ដែលបណ្ដាលឲ្យមនុស្សរាប់ពាន់នាក់ស្លាប់ និងរងរបួស។

ថ្នាក់ដឹកនាំនាយកដ្ឋានជួយសង្គ្រោះ និងគ្រោះមហន្ដរាយ រាយការណ៍ក្នុងកិច្ចប្រជុំ

នាយកដ្ឋានជួយសង្គ្រោះ និងសង្គ្រោះមហន្ដរាយធ្វើជាអធិបតី និងសម្របសម្រួលជាមួយស្ថាប័ន និងអង្គភាពពាក់ព័ន្ធ ដើម្បីរៀបចំផែនការ និងកងកម្លាំងរបស់កងទ័ពប្រជាជនវៀតណាមទៅចូលរួមជួយសង្គ្រោះគ្រោះមហន្តរាយនៅមីយ៉ាន់ម៉ា ដែលមានយោធិនចំនួន ៧៩ នាក់ ដែលក្នុងនោះរួមមាន៖ មេបញ្ជាការ កម្លាំងព័ត៌មាននិងឃោសនា កម្លាំងជួយសង្គ្រោះ (រួមមានកម្លាំងស្វែងរកនិងជួយសង្គ្រោះនៃបញ្ជាការដ្ឋានវិស្វកម្ម និងកម្លាំងគ្រូបង្វឹកឆ្កែជំនាញនៃបញ្ជាការដ្ឋានកងទ័ពការពារព្រំដែន) និងកម្លាំងវេជ្ជសាស្ដ្រ។

ទិដ្ឋភាពនៃកិច្ចប្រជុំ

អគ្គនាយកដ្ឋានភស្តុភារនិងបច្ចេកទេស សម្របសម្រួលជាមួយនាយកដ្ឋានបុគ្គលិក រៀបចំកងកម្លាំងនិងមធ្យោបាយត្រៀមខ្លួនទៅបំពេញភារកិច្ច។ ក្នុងនោះ ផ្តោតលើការធានានូវភស្តុភារ និងបច្ចេកទេសសម្រាប់កងកម្លាំងស្វែងរក និងជួយសង្គ្រោះ និងធានាឲ្យបាននូវទំនិញជួយសង្គ្រោះសម្រាប់ប្រទេសមិត្ដ។

បន្ទាប់ពីបានស្តាប់ការវាយតម្លៃ និងវិភាគស្ថានការណ៍ដោយស្ថាប័ន និងអង្គភាពនានា លោកឧត្តមសេនីយ៍ឯក Huynh Chien Thang បានកត់សម្គាល់ការត្រៀមរៀបចំ និងការរៀបចំកងកម្លាំងទៅបំពេញបេសកកម្មជួយសង្គ្រោះនៅប្រទេសមីយ៉ាន់ម៉ា។

លោកអនុប្រធានអគ្គសេនាធិការនៃកងទ័ពប្រជាជនវៀតណាម បានអះអាងថា ការបញ្ជូនកងទ័ពប្រជាជនវៀតណាមទៅចូលរួម​ជួយសង្គ្រោះគ្រោះមហន្តរាយនៅមីយ៉ាន់ម៉ា បង្ហាញពីការទទួលខុសត្រូវខ្ពស់របស់បក្ស រដ្ឋ និងប្រជាជនវៀតណាមចំពោះសហគមន៍អន្តរជាតិ។ ព្រមទាំងអះអាងនូវកិត្យានុភាព ទំនួលខុសត្រូវនិងសមត្ថភាពរបស់កងទ័ពប្រជាជនវៀតណាមក្នុងទំនាក់ទំនង និងសហប្រតិបត្តិការអន្តរជាតិ។

លោកឧត្តមសេនីយ៍ឯក Huynh Chien Thang បានស្នើឱ្យនាយកដ្ឋានជួយសង្គ្រោះ និងសង្គ្រោះគ្រោះមហន្ដ្រាយ នាយកដ្ឋានទាក់ទងការបរទេស អគ្គនាយកដ្ឋានភស្តុភារ និងបច្ចេកទេស និងអង្គភាពពាក់ព័ន្ធ សម្របសម្រួលយ៉ាងជិតស្និត្ធ  ដើម្បីកងកម្លាំងអាចចេញទៅបំពេញភារកិច្ចនៅថ្ងៃទី៣០ ខែមីនា៕

បកប្រែដោយ Pham Diep