ពិនិត្យចុងក្រោយលើការត្រៀមរៀបចំពិធីបើកពិព័រណ៍ការពារជាតិអន្តរជាតិវៀតណាមឆ្នាំ២០២៤

លោកឧត្តមសេនីយ៍ឯក Hoang Xuan Chien ដឹកនាំការពិនិត្យ

បន្ទាប់ពីទស្សនាការសម្តែងរបស់កងកម្លាំងទាំងឡាយ លោកឧត្តមសេនីយ៍ឯក Hoang Xuan Chien បានកោតសរសើរចំពោះកម្មាភិបាល យុទ្ធជន សិល្បករ សិល្បការិនី តារាចម្រៀង តារាសម្តែង និងអង្គភាពនានាដែលចូលរួមយ៉ាងសកម្មក្នុងការរួមចំណែកដល់ជោគជ័យរបស់ការពិនិត្យចុងក្រោយ។ កងទ័ពជើងអាកាស កងទ័ពពិសេស និងក្រុមឆ្កែជំនាញនៃកងទ័ពការពារព្រំដែន បានសម្ដែងបានល្អ និងសហការបានល្អ បង្កើតបានការសម្តែងដ៏អស្ចារ្យ បង្ហាញពីអាជីពនិងកម្លាំងរបស់កងទ័ពប្រជាជនវៀតណាម។ នេះជាលទ្ធផលនៃដំណើរការខិតខំប្រឹងប្រែងសហការហ្វឹកហាត់របស់បណ្ដាកងកម្លាំងនាពេលកន្លងមកដើម្បីត្រៀមរៀបចំសម្រាប់​ពិធីបើកដ៏គួរឲ្យចាប់អារម្មណ៍ និងទទួលបានជោគជ័យ។

ការសម្តែងសិល្បៈ

លោកឧត្តមសេនីយ៍ឯក Hoang Xuan Chien បានផ្តល់យោបល់លើការទទួលភ្ញៀវ ពិធីការ បដិសណ្ឋារកិច្ច និងការតាំងបង្ហាញនៅកណ្តាលវាល និងក្នុងផ្ទះ ហើយស្នើឲ្យកងកម្លាំងទាំងឡាយបញ្ចប់សកម្មភាពត្រៀមរៀបចំចុងក្រោយ។ លោកឧត្តមសេនីយ៍ឯក Hoang Xuan Chien ក៏បានចុះពិនិត្យនៅសំណង់ដែលបម្រើឲ្យការតាំងពិព័រណ៍ និងខ្លឹមសារទាក់ទងនឹងការងាររៀបចំ។ មកដល់ពេលនេះ ការត្រៀមរៀបចំហេដ្ឋារចនាសម្ព័ន្ធ ភស្តុភារ និងបច្ចេកទេសសម្រាប់ពិព័រណ៍ត្រូវបានបញ្ចប់ជាមូលដ្ឋាន ត្រៀមខ្លួនសម្រាប់ថ្ងៃបើកពិព័រណ៍ (ថ្ងៃទី ១៩ ខែវិច្ឆិកា)  និងសកម្មភាពជាច្រើនក្នុងក្របខ័ណ្ឌនៃព្រឹត្តិការណ៍៕

បកប្រែដោយ Thuy Anh