កិច្ចសហប្រតិបត្តិការលើវិស័យការពារជាតិរវាងវៀតណាម និងកូរ៉េខាងត្បូង នៅតែមានសក្ដានុពលជាច្រើនសម្រាប់ការអភិវឌ្ឍ

លោកនាយឧត្តមសេនីយ៍ Phan Van Giang បានអបអរសាទរចំពោះលោក Choi Young Sam ដែលត្រូវបានតែងតាំងជាឯកអគ្គរដ្ឋទូតកូរ៉េខាងត្បូងប្រចាំវៀតណាម។ លោកបានសម្តែងនូវការជឿជាក់ថា លោកឯកអគ្គរដ្ឋទូត Choi Young Sam នឹងបំពេញភារកិច្ចរបស់ខ្លួនបានយ៉ាងល្អ រួមចំណែកយ៉ាងសំខាន់ក្នុងការជំរុញទំនាក់ទំនងភាពជាដៃគូយុទ្ធសាស្ត្រគ្រប់ជ្រុងជ្រោយ វៀតណាម-កូរ៉េខាងត្បូង លើគ្រប់វិស័យ រួមទាំងកិច្ចសហប្រតិបត្តិការលើវិស័យការពារជាតិ។

លោកនាយឧត្តមសេនីយ៍ Phan Van Giang ទទួលជួបលោកឯកអគ្គរដ្ឋទូត Choi Young Sam

លោកនាយឧត្តមសេនីយ៍ Phan Van Giang បានសង្កត់ធ្ងន់ថា ដោយឈរលើមូលដ្ឋាននៃទំនាក់ទំនងដ៏ល្អប្រពៃរវាងប្រទេសទាំងពីរ ក្នុងរយៈពេលថ្មីៗនេះ ភាគីទាំងពីរបានជំរុញកិច្ចសហប្រតិបត្តិការលើវិស័យការពារជាតិទ្វេភាគី និងសម្រេចបានលទ្ធផលវិជ្ជមានជាច្រើន។ លោកនាយឧត្តមសេនីយ៍ Phan Van Giang បានវាយតម្លៃថា កិច្ចសហប្រតិបត្តិការទ្វេភាគីលើវិស័យការពារជាតិនៅតែមានសក្ដានុពលជាច្រើនសម្រាប់ការអភិវឌ្ឍ ជាពិសេសលើវិស័យដែលកូរ៉េខាងត្បូងមានប្រៀបខ្លាំង ហើយវៀតណាមកំពុងត្រូវការដូចជា៖ ការបណ្តុះបណ្តាលធនធានមនុស្សមានគុណភាពខ្ពស់ ឧស្សាហកម្មការពារជាតិ។ល។ លោកនាយឧត្តមសេនីយ៍ Phan Van Giang សង្ឃឹមថា លោកឯកអគ្គរដ្ឋទូត Choi Young Sam នឹងយកចិត្តទុកដាក់ និងបង្កើតលក្ខខណ្ឌអំណោយផលសម្រាប់ក្រសួងការពារជាតិនៃប្រទេសទាំងពីរអនុវត្តខ្លឹមសារនៃកិច្ចសហប្រតិបត្តិការដែលបានព្រមព្រៀងគ្នា។

លោកនាយឧត្តមសេនីយ៍ Phan Van Giang ផ្តល់វត្ថុអនុស្សាវរីយ៍ជូនលោកឯកអគ្គរដ្ឋទូត Choi Young Sam

លោកឯកអគ្គរដ្ឋទូត Choi Young Sam បានសង្កត់ធ្ងន់ថា ទំនាក់ទំនងកូរ៉េខាងត្បូង-វៀតណាម កំពុងអភិវឌ្ឍយ៉ាងល្អប្រសើរ។ លោកបានសម្តែងនូវកិត្តិយសដោយទទួលតំណែងជាឯកអគ្គរដ្ឋទូត បន្ទាប់ពីប្រទេសទាំងពីរបានដំឡើងទំនាក់ទំនងទ្វេភាគីទៅជាភាពជាដៃគូយុទ្ធសាស្ត្រគ្រប់ជ្រុងជ្រោយ។ លោកឯកអគ្គរដ្ឋទូត Choi Young Sam បានបញ្ជាក់ថា លោកនឹងខិតខំប្រឹងប្រែងឱ្យអស់ពីសមត្ថភាព ដើម្បីរួមចំណែកជំរុញទំនាក់ទំនងរវាងប្រទេសទាំងពីរលើគ្រប់វិស័យ រួមទាំងកិច្ចសហប្រតិបត្តិការលើវិស័យការពារជាតិ។

លោកនាយឧត្តមសេនីយ៍ Phan Van Giang និងលោកឯកអគ្គរដ្ឋទូត Choi Young Sam រួមជាមួយប្រតិភូនានាក្នុងជំនួប

លោកឯកអគ្គរដ្ឋទូត Choi Young Sam បានអះអាងថា វិស័យការពារជាតិគឺជាវិស័យសំខាន់មួយនៃកិច្ចសហប្រតិបត្តិការរវាងកូរ៉េខាងត្បូង និងវៀតណាម ព្រមទាំងវាយតំលៃខ្ពស់ចំពោះសារៈសំខាន់ និងលទ្ធផលនៃដំណើរទស្សនកិច្ចផ្លូវការរបស់លោកនាយឧត្តមសេនីយ៍ Phan Van Giang ទៅកាន់ប្រទេសកូរ៉េខាងត្បូងក្នុងខែមីនា ឆ្នាំ២០២៣ នេះ។  លោកបានអះអាងបន្ថែមទៀតថា លោកនឹងខិតខំប្រឹងប្រែងជម្រុញការអនុវត្តខ្លឹមសារដែលភាគីទាំងពីរបានឯកភាពក្នុងដំណើរទស្សនកិច្ចនេះ រួមមានការផ្លាស់ប្តូរគណៈប្រតិភូ កិច្ចសហប្រតិបត្តិការរវាងអង្គភាពទ័ព និងឧស្សាហកម្មការពារជាតិ។ល៕

បកប្រែដោយ Huyen Trang