ការពិនិត្យមើលទីតាំងរៀបចំការតាំងពិព័រណ៍ការពារជាតិអន្តរជាតិវៀតណាមឆ្នាំ ២០២៤

តាមរយៈការពិនិត្យ គណៈប្រតិភូនឹងជ្រើសទីតាំងដែលគ្រោងនឹងរៀបចំតាំងពិព័រណ៍ការពារជាតិអន្តរជាតិវៀតណាមឆ្នាំ ២០២៤។ តំបន់រៀបចំការតាំងពិព័រណ៍ត្រូវមានផ្ទៃដីធំ ហើយមិនឆ្ងាយពីកណ្ដាលទីក្រុងហាណូយ និងមានភាពងាយស្រួលក្នុងការធ្វើដំណើរ ដើម្បីធានាបាននូវកន្លែងស្នាក់នៅ សេវាកម្មម្ហូបអាហារសម្រាប់បំរើគណៈប្រតិភូ និងអ្នកចូលរួម។

លោកឧត្តមសេនីយ៍ឯក Hoang Xuan Chien អនុរដ្ឋមន្ត្រីក្រសួងការពារប្រទេសចុះពិនិត្យមើលទីតាំងគ្រោងរៀបចំការតាំងពិព័រណ៍នៅកងវរសេនាធំលេខ ៩១៦ កងពលធំលេខ ៣៧១ ប្រភេទទ័ពការពារដែនអាកាសនិងទ័ពជើងអាកាស

លោកឧត្តមសេនីយ៍ឯក Hoang Xuan Chien បានឲ្យដឹងថា តំបន់ដីបម្រុងដែលគ្រប់គ្រងដោយនាយកដ្ឋានភស្តុភារ នៃអគ្គសេនាធិការដ្ឋាននៃកងទ័ពប្រជាជនវៀតណាមនៅសង្កាត់ Tay Mo ខ័ណ្ឌ Nam Tu Liem (ក្បែរសារមន្ទីរប្រវត្តិសាស្ត្រយោធាវៀតណាម) មានគុណសម្បត្តិជាច្រើនដែលស្របនឹងការរៀបចំការតាំងពិព័រណ៍ការពារជាតិអន្តរជាតិវៀតណាមឆ្នាំ ២០២៤។ ទន្ទឹមនឹងនោះ អាកាសយានដ្ឋាន Gia Lam និងអាកាសយានដ្ឋាន Hoa Lac ក៍អាចជាទីតាំងពីរសម្រាប់រៀបចំព្រឹត្តិការណ៍នេះ​ដែរ។

លោកឧត្តមសេនីយ៍ឯក Hoang Xuan Chien​ ចុះពិនិត្យគម្រោងសាងសង់សារមន្ទីរប្រវត្តិសាស្ត្រយោធាវៀតណាម

លោកឧត្តមសេនីយ៍ឯក Hoang Xuan Chien បានអះអាងថា ការជ្រើសរើសទីតាំងសមស្របសម្រាប់រៀបចំតាំងពិពរណ៌​នឹងជួយសន្សំប្រាក់បានច្រើននៅពេលរៀបចំការតាំងពិព័រណ៍រៀងរាល់ ២ ឆ្នាំម្តង។ ដោយបានដឹងថា ការតាំងពិព័រណ៍ការពារជាតិអន្តរជាតិវៀតណាមឆ្នាំ ២០២៤ ត្រូវបានគេរំពឹងថានឹងមានទ្រង់ទ្រាយធំជាងគេ ​បើធៀបនឹងការតាំងពិពរណ៌​នៅឆ្នាំ ២០២២ ដោយមានប្រទេសចូលរួមប្រហែល ៥០ និងស្តង់បង្ហាញចំនួន ២៥០ ៕

បកប្រែដោយ Pham Diep