ប្រធានរដ្ឋសភាវៀតណាមទទួលជួបបណ្ដាឯកអគ្គរដ្ឋទូត៖ កម្ពុជា សហរដ្ឋអាមេរិក និងហ្វីលីពីន

* ទទួលជួបលោកស្រី ជា គឹមថា ឯកអគ្គរាជទូតកម្ពុជា លោក  Tran Thanh Man ប្រធានរដ្ឋសភាវៀតណាម បានអបអរសាទរចំពោះលោកស្រីឯកអគ្គរាជទូតកម្ពុជាដែលបញ្ចប់បេសកកម្មការទូតនៅវៀតណាមដោយជោគជ័យ រួមចំណែកដល់ការអភិវឌ្ឍយ៉ាងទូលំទូលាយនៃទំនាក់ទំនងមិត្តភាពវៀតណាម-កម្ពុជា។ លោកប្រធានរដ្ឋសភា​វៀតណាម បានវាយតម្លៃខ្ពស់ចំពោះកិច្ចសហប្រតិបត្តិការរវាងរដ្ឋសភាវៀតណាម ជាមួយព្រឹទ្ធសភា និងរដ្ឋសភាកម្ពុជាទាំងទ្វេភាគីនិងពហុភាគីក្នុងរយៈពេលប៉ុន្មានឆ្នាំកន្លងមកនេះ។

លោក  Tran Thanh Man ប្រធានរដ្ឋសភាវៀតណាម ទទួលជួបលោកស្រីឯកអគ្គរាជទូត ជា គឹមថា

លោកស្រីឯកអគ្គរាជទូត ជា គឹមថា បានសម្តែងការរីករាយចំពោះការអភិវឌ្ឍដ៏ខ្លាំងក្លានៃទំនាក់ទំនងរវាងប្រទេសទាំងពីរក្នុងស្មារតីអ្នកជិតខាងល្អ មិត្តភាពជាប្រពៃណី កិច្ចសហប្រតិបត្តិការគ្រប់ជ្រុងជ្រោយ និងនិរន្តរភាពយូរអង្វែង។ ជាពិសេសគឺដំណើរទស្សនកិច្ចកម្រិតខ្ពស់រវាងថ្នាក់ដឹកនាំនៃប្រទេសទាំងពីរ បានរួមចំណែកដល់ការពង្រឹងទំនុកចិត្តខាងនយោបាយរវាងប្រទេសទាំងពីរ និងរដ្ឋសភាទាំងពីរ។ លោកស្រីឯកអគ្គរាជទូតកម្ពុជា បានសង្កត់ធ្ងន់ថា ទំនាក់ទំនងវៀតណាម-កម្ពុជាមានតម្លៃពិសេស ហើយកិច្ចសហប្រតិបត្តិការ និងការជួយគ្នាទៅវិញទៅមកដើរតួនាទីយ៉ាងសំខាន់ក្នុងការអភិវឌ្ឍប្រកបដោយស្ថិរភាព និងវិបុលភាពនៃប្រទេសទាំងពីរ។

* ទទួលជួបជាមួយលោក Marc Knapper ឯកអគ្គរដ្ឋទូតសហរដ្ឋអាមេរិក លោក Tran Thanh Man ប្រធានរដ្ឋសភាវៀតណាមបានវាយតម្លៃខ្ពស់ចំពោះការរួមចំណែកវិជ្ជមាន និងមានប្រសិទ្ធភាពរបស់លោកឯកអគ្គរដ្ឋទូតក្នុងការជំរុញទំនាក់ទំនងរវាងវៀតណាមនិងសហរដ្ឋអាមេរិកឲ្យមានការអភិវឌ្ឍដ៏ខ្លាំងក្លាលើគ្រប់វិស័យ រួមមានការលើកតម្កើងទំនាក់ទំនងទៅជាភាពជាដៃគូយុទ្ធសាស្ត្រគ្រប់ជ្រុងជ្រោយនៅឆ្នាំ ២០២៣។

លោក Tran Thanh Man​ ប្រធានរដ្ឋសភា និងលោក Marc Knapper

លោកប្រធានរដ្ឋសភាវៀតណាម បានយល់ព្រមជាមួយសំណើរបស់លោក Marc Knapper ក្នុងការបន្តបង្កើនការផ្លាស់ប្តូរគណៈប្រតិភូរដ្ឋសភា គណៈកម្មាធិការជំនាញ និងសមាជិកសភានៃប្រទេសទាំងពីរ។ ជំរុញកិច្ចសហប្រតិបត្តិការក្នុងវិស័យអាទិភាពដូចជា ការធ្វើបរិវត្ដកម្មឌីជីថល នវានុវត្តន៍ វិទ្យាសាស្ត្រ និងបច្ចេកវិទ្យា ថាមពលស្អាត ការឆ្លើយតបទៅនឹងការប្រែប្រួលអាកាសធាតុ ការអប់រំនិងបណ្តុះបណ្តាល និងសុខាភិបាល ហើយបន្តអនុវត្តប្រកបដោយប្រសិទ្ធភាពនូវគម្រោងជំនះផលវិបាកនៃសង្គ្រាម រួមទាំងការបោសសម្អាតគ្រាប់បែក និងគ្រាប់មីន ការបន្សាបជាតិពុល  dioxin និងការគាំទ្រដល់ជនពិការ។

លោក Marc Knapper បានវាយតម្លៃខ្ពស់ចំពោះសមិទ្ធផលលេចធ្លោក្នុងកិច្ចសហប្រតិបត្តិការរវាងរដ្ឋសភាទាំងពីរក្នុងរយៈពេលកន្លងមក។ ព្រមទាំងសម្តែងការជឿជាក់ថា ដោយមានការគាំទ្រនិងការរួមចំណែកពីស្ថាប័ននីតិប្បញ្ញត្តិនៃប្រទេសទាំងពីរ កិច្ចសហប្រតិបត្តិការវៀតណាម-សហរដ្ឋអាមេរិកក្នុងវិស័យជាច្រើនដូចជា ពាណិជ្ជកម្ម វិនិយោគ ថាមពល វិទ្យាសាស្ត្រ និងបច្ចេកវិទ្យា ការជំនះផលវិបាកនៃសង្គ្រាម ការអប់រំ និងបណ្តុះបណ្តាល ការផ្លាស់ប្តូររវាងប្រជាជននិងប្រជាជន រួមជាមួយនឹងទំនាក់ទំនងរវាងរដ្ឋសភាទាំងពីរនឹងបន្តអភិវឌ្ឍកាន់តែស៊ីជម្រៅ។

* ទទួលជួបលោក Meynardo L.B.Montealegre ឯកអគ្គរដ្ឋទូតហ្វីលីពីន លោក Tran Thanh Man ប្រធានរដ្ឋសភាវៀតណាម បានវាយតម្លៃខ្ពស់ចំពោះតួនាទីរបស់លោកឯកអគ្គរដ្ឋទូតក្នុងការលើកកម្ពស់ទំនាក់ទំនងភាពជាដៃគូយុទ្ធសាស្ត្ររវាងវៀតណាម និងហ្វីលីពីន។

លោកប្រធានរដ្ឋសភាវៀតណាមស្នើឲ្យប្រទេសទាំងពីរបន្តអនុវត្តវិធានការជាច្រើនដើម្បីពង្រឹងកិច្ចសហប្រតិបត្តិការក្នុងវិស័យសេដ្ឋកិច្ច និងពាណិជ្ជកម្មបន្ថែមទៀត ដើម្បីជំរុញទំហំពាណិជ្ជកម្មទ្វេភាគីសម្រេចបាន ១០ ពាន់លានដុល្លារអាមេរិកឱ្យបានឆាប់។

លោក Tran Thanh Man ប្រធានរដ្ឋសភាវៀតណាម និងលោក Meynardo L.B. Montealegre ឯកអគ្គរដ្ឋទូត

លោក Meynardo L.B. Montealegre វាយតម្លៃខ្ពស់ចំពោះកិច្ចសហប្រតិបត្តិការលើគ្រប់វិស័យរវាងប្រទេសទាំងពីរក្នុងរយៈពេលកន្លងមក ព្រមទាំងឯកភាពថា ប្រទេសទាំងពីរគួរតែបន្តលើកកម្ពស់កិច្ចសហប្រតិបត្តិការក្នុងវិស័យសេដ្ឋកិច្ច និងពាណិជ្ជកម្ម និងការផ្លាស់ប្ដូររវាងប្រជាជននិងប្រជាជន ហើយខិតខំសម្រេចបាននូវទំហំពាណិជ្ជកម្មទ្វេភាគី  ១០ ពាន់លានដុល្លារអាមេរិកនាពេលឆាប់ៗនេះ៕

បកប្រែដោយ Pham Diep