លោក To Lam អគ្គលេខាបក្ស និងជាប្រធានរដ្ឋវៀតណាម​ អញ្ជើញជួបសវនាជាមួយលោក វ៉ាង ហ៊ូនីង (Wang Huning) ប្រធានសភាប្រឹក្សានយោបាយប្រជាជនចិន

លោក To Lam អគ្គលេខាបក្ស និងជាប្រធានរដ្ឋវៀតណាម និងបណ្តាប្រតិភូវៀត​ណាម​

នៅក្នុងជំនួប លោក To Lam អគ្គលេខាបក្ស និងជាប្រធានរដ្ឋ បានបញ្ជាក់ថា វៀតណាមសង្ឃឹមថា តាមរយៈដំណើរទស្សនកិច្ចនេះ នឹងពង្រឹងទំនុកចិត្តនយោបាយបន្ថែមទៀត បង្កើតកម្រិតថ្មីនៃកិច្ចសហប្រតិបត្តិការទ្វេភាគីជាមួយនឹងការតភ្ជាប់កាន់តែទូលំទូលាយ និងស៊ីជម្រៅ និងរួមគ្នាសម្រេចបាននូវគោលដៅអភិវឌ្ឍន៍របស់ប្រទេសនីមួយៗ។ លើកកម្ពស់ការតភ្ជាប់ទាំងបីនៃឧត្តមគតិជំនឿ ផលប្រយោជន៍អភិវឌ្ឍន៍ និងវប្បធម៌ ទឹកចិត្តប្រជាជន។ ភាគីទាំងពីរបានស្នើឱ្យរក្សាទំនាក់ទំនងកម្រិតខ្ពស់ជាប្រចាំ ពង្រឹងទំនុកចិត្តនយោបាយ បង្កើនប្រសិទ្ធភាពនៃកិច្ចសហប្រតិបត្តិការតាមរយៈបណ្តាញ​បក្ស រដ្ឋ រដ្ឋាភិបាល រដ្ឋសភា រណសិរ្សមាតុភូមិ ពង្រឹងសសរស្តម្ភនៃកិច្ចសហប្រតិបត្តិការការពារជាតិ និងសន្តិសុខ។

លោក វ៉ាង ហ៊ូនីង (Wang Huning) ប្រធានសភាប្រឹក្សានយោបាយប្រជាជនចិន និងបណ្តាប្រតិភូចិន

លោក To Lam អគ្គលេខាបក្ស និងជាប្រធានរដ្ឋ ក៏បានស្នើផងដែរថា បន្ថែមពីលើការលើកកម្ពស់វិស័យសហប្រតិបត្តិការប្រពៃណីដូចជាពាណិជ្ជកម្ម និងវិនិយោគ ភាគីទាំងពីរគួរតែធ្វើការរួមគ្នាដើម្បីបង្កើតរបកគំហើញថ្មីៗនៅក្នុងវិស័យថ្មីៗដូចជាការសាងសង់ហេដ្ឋារចនាសម្ព័ន្ធដឹកជញ្ជូន ជាពិសេសផ្លូវដែក និងលើកកម្ពស់កិច្ចសហប្រតិបត្តិការក្នុងការធ្វើបរិវត្តកម្មឌីជីថល និងបច្ចេកវិទ្យាយុទ្ធសាស្ត្រដូចជា បញ្ញាសិប្បនិម្មិត (AI) ការគណនាកង់ទិច ស៊ីមីកុងដុកទ័រ និងការបណ្តុះបណ្តាលធនធានមនុស្សដែលមានគុណភាពខ្ពស់។ ពង្រីកតួនាទីរបស់សភាប្រឹក្សានយោបាយប្រជាជនចិន(CPPCC) និងគណៈកម្មាធិការមជ្ឈិមនៃរណសិរ្សមាតុភូមិវៀតណាម ក្នុងការគាំទ្រ និងលើកទឹកចិត្តដល់មូលដ្ឋាន អង្គការមហាជននៃប្រទេសទាំងពីរ ឱ្យបង្កើនប្រសិទ្ធភាពនៃយន្តការសហប្រតិបត្តិការដែលមានស្រាប់ ពង្រឹងការផ្លាស់ប្តូរ និងលើកកម្ពស់ការផ្សព្វផ្សាយព័ត៌មានអំពីទំនាក់ទំនងមិត្តភាពរវាងវៀតណាម និងចិន។

ទិដ្ឋភាពនៃជំនួប​

លោក វ៉ាង ហ៊ូនីង ប្រធានសភាប្រឹក្សានយោបាយប្រជាជនចិន បានបញ្ជាក់ថា ប្រទេសចិនតែងតែចាត់ទុកទំនាក់ទំនងរបស់ខ្លួនជាមួយវៀតណាមជាអាទិភាពក្នុងការទូតជាមួយប្រទេសជិតខាងរបស់ខ្លួន។ លោកបានស្នើឱ្យភាគីទាំងពីរយល់ជ្រួតជ្រៀបអំពីទិសដៅនៃការអភិវឌ្ឍទំនាក់ទំនងទ្វេភាគី រួមគ្នាលើកកម្ពស់បុព្វហេតុនៃទំនើបកម្មសង្គមនិយមនៅក្នុងប្រទេសនីមួយៗ ពង្រឹងបន្ថែមទៀតនូវការតភ្ជាប់ជាយុទ្ធសាស្ត្រ ជាពិសេសការផ្តល់អាទិភាពដល់ការបង្កើនល្បឿននៃការតភ្ជាប់ហេដ្ឋារចនាសម្ព័ន្ធ ការអភិវឌ្ឍបញ្ញាសិប្បនិម្មិត និងសេដ្ឋកិច្ចឌីជីថល។

ប្រទេសចិនត្រៀមខ្លួនជាស្រេចដើម្បីពង្រីកការនាំចូលទំនិញ ជាពិសេសផលិតផលកសិកម្មដែលមានគុណភាពខ្ពស់ពីប្រទេសវៀតណាម និងលើកទឹកចិត្តដល់អង្គភាពអាជីវកម្មឱ្យពង្រីកការវិនិយោគ និងកិច្ចសហប្រតិបត្តិការដែលផ្តល់ផលប្រយោជន៍ទៅវិញទៅមកនៅក្នុងប្រទេសវៀតណាម។ សភាប្រឹក្សានយោបាយប្រជាជនចិនត្រៀមខ្លួនជាស្រេចដើម្បីពង្រឹងបន្ថែមទៀតនូវទំនាក់ទំនងមិត្តភាពជាមួយរណសិរ្សមាតុភូមិវៀតណាម រួមគ្នាលើកទឹកចិត្តដល់ការផ្លាស់ប្តូររវាងប្រជាជនគ្រប់មជ្ឈដ្ឋាន ជាពិសេសយុវជនជំនាន់ក្រោយ ពង្រីកកិច្ចសហប្រតិបត្តិការក្នុងវិស័យអប់រំ និងថែទាំសុខភាព ការផ្លាស់ប្តូរក្នុងស្រុក និងគាំទ្រគ្នាទៅវិញទៅមកក្នុងការរៀបចំព្រឹត្តិការណ៍ពហុភាគីប្រកបដោយប្រសិទ្ធភាព៕

បកប្រែដោយ Duy Hoan