    |
 |
|
សម័យប្រជុំពេញអង្គនៃកិច្ចប្រជុំកំពូលអាស៊ានលើកទី៤៧ និងពិធីប្រគល់ពិធីសារលើកទី២ស្តីពីការធ្វើវិសោធនកម្មកិច្ចព្រមព្រៀងពាណិជ្ជកម្មទំនិញអាស៊ាន (ATIGA) |
កិច្ចប្រជុំកំពូលនានា ដែលលេចធ្លោគឺកិច្ចប្រជុំកំពូលអាស៊ានលើកទី៤៧ និងកិច្ចប្រជុំពាក់ព័ន្ធនៅទីក្រុងគូឡាឡាំពួរ មិនត្រឹមតែបូកសរុបដំណើរការអភិវឌ្ឍរបស់អាស៊ានក្នុងឆ្នាំដ៏សំខាន់នេះប៉ុណ្ណោះទេ ប៉ុន្តែថែមទាំងបានដាក់មូលដ្ឋានគ្រឹះយុទ្ធសាស្ត្រសម្រាប់ចក្ខុវិស័យសហគមន៍អាស៊ានឆ្នាំ២០៤៥ ឆ្ពោះទៅរកសហគមន៍ដែលមានភាពធន់ ស្វាហាប់ ច្នៃប្រឌិត និងផ្តោតលើប្រជាជនផងដែរ។
នៅក្នុងបរិបទនៃបរិយាកាសអន្តរជាតិដែលមិនស្ថិតស្ថេរកាន់តែខ្លាំងឡើង ការប្រកួតប្រជែងជាយុទ្ធសាស្ត្រកាន់តែកើនឡើង និងការលេចចេញជាថ្មីនៃការគាំរពារនិយមនោះ ថ្នាក់ដឹកនាំអាស៊ានបានផ្តោតលើការពង្រីកសមាជិក ពង្រឹងភាពធន់ផ្នែកសេដ្ឋកិច្ច និងពង្រឹងកិច្ចសហប្រតិបត្តិការក្នុងតំបន់។ របៀបវារៈសេដ្ឋកិច្ចត្រូវបានចាត់ទុកថាជាអាទិភាពបន្ទាន់បំផុត ដោយមានគោលបំណងរក្សាសន្ទុះសមាហរណកម្ម ការពារខ្សែសង្វាក់ផ្គត់ផ្គង់ និងកាត់បន្ថយផលប៉ះពាល់ពីហានិភ័យខាងក្រៅ ជាពិសេសពន្ធគយ និងការរំខានពាណិជ្ជកម្មសកល។
ពង្រឹងតួនាទីមជ្ឈភាពរបស់អាស៊ាន
សមិទ្ធផលការទូតដ៏គួរឱ្យកត់សម្គាល់បំផុតមួយរបស់អាស៊ានក្នុងឆ្នាំ ២០២៥ គឺការបញ្ជូលទីម័រខាងកើតជាសមាជិកទី ១១ ។ សេចក្តីប្រកាសបញ្ចូលដែលចុះហត្ថលេខាក្នុងក្របខ័ណ្ឌនៃកិច្ចប្រជុំកំពូលអាស៊ានលើកទី ៤៧ ត្រូវបានចាត់ទុកថាជាព្រឹត្តិការណ៍ប្រវត្តិសាស្ត្រមួយ ដែលបង្ហាញយ៉ាងច្បាស់អំពីគោលការណ៍បរិយាបន្ន និងការគាំទ្រគ្នាទៅវិញទៅមក - តម្លៃស្នូលរបស់អាស៊ានអស់រយៈពេលជិតប្រាំមួយទសវត្សរ៍មកហើយ។
ការចូលជាសមាជិកអាស៊ានរបស់ទីម័រខាងកើតត្រូវបានគេរំពឹងថានឹងផ្តល់នូវកម្លាំងចលករថ្មីដល់សហគមន៍សេដ្ឋកិច្ចអាស៊ាន (AEC) ខណៈពេលដែលពង្រីកវិសាលភាពសម្រាប់កិច្ចសហប្រតិបត្តិការនយោបាយ និងសន្តិសុខ និងការតភ្ជាប់ក្នុងតំបន់។ ទោះជាយ៉ាងណាក៏ដោយ អ្នកតាក់តែងគោលនយោបាយក៏ទទួលស្គាល់នូវបញ្ហាប្រឈមដែលភ្ជាប់មកជាមួយផង ជាពិសេសហានិភ័យនៃការពង្រីកគម្លាតអភិវឌ្ឍន៍ក្នុងចំណោមប្រទេសជាសមាជិក។ នេះត្រូវបានគេមើលឃើញថាជាបញ្ហារយៈពេលវែង ដែលទាមទារឱ្យអាស៊ានបន្តពង្រឹងជំនួយបច្ចេកទេស បង្រួមគម្លាតនិងធានាបាននូវសាមគ្គីភាពផ្ទៃក្នុង។
នៅលើកម្រិតភូមិសាស្ត្រនយោបាយ អាស៊ានបញ្ជាក់ជាថ្មីនូវសំឡេងរួម និងសមត្ថភាពធ្វើសកម្មភាពដូចជាវេទិកាតំបន់មួយដែលមានតុល្យភាព និងជឿទុកចិត្ត។ នៅក្នុងបរិបទនៃការប្រកួតប្រជែងកាន់តែខ្លាំងឡើងនៃមហាអំណាច អាស៊ាននៅតែរឹងមាំនៅក្នុងគោលការណ៍អព្យាក្រឹតភាពរបស់ខ្លួន ខណៈពេលដែលពង្រឹង "តួនាទីមជ្ឈភាព" របស់ខ្លួនដូចជាវេទិកាមួយសម្រាប់ការសន្ទនា ជាកន្លែងដែលភាគីនានាអាចគ្រប់គ្រងការមិនចុះសម្រុងគ្នាតាមរយៈការទូត និងកិច្ចសហប្រតិបត្តិការ។
ទំនាក់ទំនងការបរទេសរបស់អាស៊ាននៅឆ្នាំ ២០២៥ នឹងបន្តបញ្ជាក់ពីតួនាទីកណ្តាលរបស់ប្លុកនៅក្នុងរចនាសម្ព័ន្ធតំបន់ តាមរយៈយន្តការ "អាស៊ាន+" ជាមួយដៃគូសំខាន់ៗដូចជា សហរដ្ឋអាមេរិក ចិន ជប៉ុន កូរ៉េខាងត្បូង ឥណ្ឌា និងសហភាពអឺរ៉ុប (EU)។ ខ្លឹមសារនៃកិច្ចពិភាក្សាត្រូវបានពង្រីកកាន់តែខ្លាំងឡើងទៅក្នុងវិស័យថ្មីៗ ទាំងពាណិជ្ជកម្មឌីជីថល ថាមពលស្អាត ភាពធន់នៃខ្សែសង្វាក់ផ្គត់ផ្គង់ ទាំងកំណើនប្រកបដោយបរិយាប័ន្ន។
ជាពិសេស អាស៊ានកំពុងលើកកម្ពស់យុទ្ធសាស្ត្រនៃការធ្វើពិពិធកម្មភាពជាដៃគូ ពង្រឹងការតភ្ជាប់ជាមួយតំបន់ និងក្រុមប្រទេសដូចជាក្រុមប្រឹក្សាសហប្រតិបត្តិការឈូងសមុទ្រ (GCC) មជ្ឈិមបូព៌ា BRICS និងសេដ្ឋកិច្ចនៃអឌ្ឍគោលខាងត្បូង។ វិធីសាស្រ្តនេះមានគោលបំណងបង្កើនលំហយុទ្ធសាស្ត្រ បង្កើនការពឹងផ្អែកលើខ្លួនឯងផ្នែកសេដ្ឋកិច្ច និងកាត់បន្ថយការពឹងផ្អែកបែបប្រពៃណីលើមហាអំណាចមួយចំនួននៅក្នុងបរិបទនៃបរិយាកាសអន្តរជាតិដែលមិនអាចទាយទុកជាមុនបាន។
តួនាទីលេចធ្លោរបស់វៀតណាម
|
|
 |
|
លោក Pham Minh Chinh នាយករដ្ឋមន្ត្រីវៀតណាម អញ្ជើញចូលរួមសម័យប្រជុំពេញអង្គនៃកិច្ចប្រជុំកំពូលអាស៊ានលើកទី៤៧ និងពិធីប្រគល់ពិធីសារទីពីរដែលធ្វើវិសោធនកម្មកិច្ចព្រមព្រៀងពាណិជ្ជកម្មទំនិញអាស៊ាន (ATIGA) (រូបថត៖ TTXVN) |
យោងតាមការវាយតម្លៃរបស់អ្នកជំនាញក្នុងតំបន់ជាច្រើនជឿថា វៀតណាមកំពុងលេចចេញជាសមាជិកដ៏ស្វាហាប់ និងមានឥទ្ធិពលមួយរបស់អាស៊ាននៅឆ្នាំ២០២៥។ វៀតណាមត្រូវបានគេមើលឃើញថាកំពុងផ្លាស់ប្តូរពីអ្នកទទួលផលនៃការធ្វើសមាហរណកម្មទៅជា "ស្ថាបត្យករ" មានភាពសកម្ម ដែលរួមចំណែកដល់ការតម្រង់ទិសក្នុងការរៀបចំរបៀបវារៈយុទ្ធសាស្ត្ររបស់ប្លុក។
ជាមួយនឹងអត្រាកំណើនខ្ពស់របស់ខ្លួន វៀតណាមដើរតួនាទីយ៉ាងសំខាន់នៅក្នុងវិស័យសំខាន់ៗដូចជា ការផ្លាស់ប្តូរថាមពល សេដ្ឋកិច្ចបៃតង សេដ្ឋកិច្ចឌីជីថល និងការផលិតទំនើប។ វៀតណាមក៏ត្រូវបានចាត់ទុកថាជាគោលដៅដ៏ទាក់ទាញមួយនៅក្នុងយុទ្ធសាស្ត្រ "ចិន+១" ដោយទាក់ទាញដើមទុនវិនិយោគ បច្ចេកវិទ្យា និងខ្សែសង្វាក់ផ្គត់ផ្គង់ថ្មី ដែលបង្កើតការរីកសាយភាយវិជ្ជមានពាសពេញតំបន់។
ការកែសម្រួលយុទ្ធសាស្ត្រអភិវឌ្ឍន៍ជាតិរបស់ខ្លួនឱ្យស្របនឹងគំនិតផ្តួចផ្តើមក្នុងតំបន់ដូចជា DEFA និង APG ត្រូវបានចាត់ទុកថាជាកត្តាសំខាន់ក្នុងការធ្វើឱ្យវៀតណាមក្លាយជាគំរូនៃការធ្វើសមាហរណកម្មសកម្ម និងការអភិវឌ្ឍប្រកបដោយចីរភាពនៅក្នុងអាស៊ាន។
កិច្ចប្រជុំកំពូលអាស៊ានលើកទី៤៧ បានបង្កើតអាទិភាពយុទ្ធសាស្ត្រឆ្ពោះទៅរកចក្ខុវិស័យសហគមន៍អាស៊ាន។ ឆ្នាំអាស៊ាន ២០២៥ ដែលការផ្តោតសំខាន់គឺលើការបញ្ចប់ និងអនុវត្តក្របខ័ណ្ឌថ្មីៗដូចជា DEFA និង APG; ការពង្រឹងការតភ្ជាប់រូបវន្ត ឌីជីថល និងគោលនយោបាយ; និងការលើកកម្ពស់កំណើនបៃតង បរិយាប័ន្ន និងផ្អែកលើនវានុវត្តន៍។
ជារួម ឆ្នាំអាស៊ាន ២០២៥ គឺជាចំណុចរបត់ដ៏សំខាន់មួយនៅក្នុងវឌ្ឍនភាពរយៈពេលវែងរបស់ប្លុក។ ទោះបីជាប្រឈមមុខនឹងបញ្ហាប្រឈមជាច្រើនក៏ដោយ អាស៊ានបង្ហាញពីឆន្ទៈនយោបាយ និងសមត្ថភាពរួមក្នុងការសម្របខ្លួនទៅនឹងបរិយាកាសសកលដែលមានការប្រែប្រួល ដោយបន្តបញ្ជាក់ពីតួនាទីរបស់ខ្លួនជាវេទិកាសម្រាប់កិច្ចសន្ទនាក្នុងតំបន់ ឆ្ពោះទៅរកអនាគតដែលមានស្ថិរភាព និងចីរភាពជាងមុន នៅឆ្នាំ២០៤៥៕
បកប្រែដោយ Duy Hoan