ពិធីចុះហត្ថលេខា និងកិច្ចប្រជុំជាន់ខ្ពស់នៃអនុសញ្ញាអង្គការសហប្រជាជាតិស្តីពីការប្រឆាំងនឹងឧក្រិដ្ឋកម្មតាមអ៊ីនធឺណិត

ក្នុងសុន្ទរកថាស្វាគមន៍ លោក Luong Cuong ប្រធានរដ្ឋ បានបញ្ជាក់ថា ពិធីចុះហត្ថលេខាលើអនុសញ្ញាហាណូយ គឺជាព្រឹត្តិការណ៍ប្រវត្តិសាស្ត្រមួយ ដែលចាប់ផ្តើមយុគសម័យនៃកិច្ចសហប្រតិបត្តិការសកលក្នុងវិស័យអ៊ីនធឺណិត មិនត្រឹមតែជាការកត់សម្គាល់ពីកំណើតនៃឧបករណ៍ច្បាប់សកលប៉ុណ្ណោះទេ ថែមទាំងបញ្ជាក់ពីភាពរស់រវើកយូរអង្វែងនៃពហុភាគីនិយម ដែលប្រទេសនានាយកឈ្នះលើភាពខុសគ្នា និងត្រៀមខ្លួនជាស្រេចទទួលខុសត្រូវរួមគ្នាដើម្បីផលប្រយោជន៍រួមស្តីពីសន្តិភាព សន្តិសុខ ស្ថិរភាព និងការអភិវឌ្ឍ។

ទិដ្ឋភាពនៃពិធីចុះហត្ថលេខាលើអនុសញ្ញាហាណូយ

លោក Luong Cuong ប្រធានរដ្ឋ បានសង្កត់ធ្ងន់ថា ក្រោមប្រធានបទ "ប្រឆាំងនឹងឧក្រិដ្ឋកម្មតាមអ៊ីនធឺណិត ចែករំលែកការទទួលខុសត្រូវ ឆ្ពោះទៅអនាគត" ពិធីចុះហត្ថលេខានេះបង្ហាញពីស្មារតីនៃសាមគ្គីភាពអន្តរជាតិ និងកិច្ចសន្យារួមរបស់ប្រទេសនានាក្នុងការកសាងលំហអ៊ីនធឺណិតដែលមានសុវត្ថិភាព និងចីរភាព។

លោក Luong Cuong ប្រធានរដ្ឋវៀតណាម មានប្រសាសន៍ក្នុងពិធី

លោក Luong Cuong ប្រធានរដ្ឋ បានសង្កត់ធ្ងន់ថា ចំពោះមុខបញ្ហាប្រឈមនៃឧក្រិដ្ឋកម្មតាមអ៊ីនធឺណិត អនុសញ្ញាហាណូយគឺជាការបង្ហាញយ៉ាងរស់រវើកអំពីស្មារតីសាមគ្គីភាព និងការគោរពច្បាស់ ដែលឆ្លុះបញ្ចាំងពីស្មារតីនៃការឯកភាពគ្នា ភាពរស់រវើកនៃពហុភាគីនិយម និងតួនាទីជាមជ្ឈភាពរបស់អង្គការសហប្រជាជាតិ។ អនុសញ្ញាហាណូយផ្ញើសារច្បាស់លាស់ចំនួនបី ដែលមានសារៈសំខាន់យ៉ាងជ្រាលជ្រៅ និងយូរអង្វែងដល់ពិភពលោក ដែលរួមមាន៖ បញ្ជាក់ពីកិច្ចសន្យាក្នុងការកំណត់សណ្តាប់ធ្នាប់ ធានាសុវត្ថិភាព និងសន្តិសុខក្នុងលំហអ៊ីនធឺណិតដោយផ្អែកលើច្បាប់អន្តរជាតិ; លើកកម្ពស់ស្មារតីនៃការចែករំលែក ការរួមដំណើរ និងការគាំទ្រគ្នាទៅវិញទៅមក; សង្កត់ធ្ងន់លើគោលដៅខ្ពស់បំផុតនៃកិច្ចខិតខំប្រឹងប្រែងទាំងអស់គឺដើម្បីប្រជាជន ដូច្នេះបច្ចេកវិទ្យាបម្រើជីវិត ការអភិវឌ្ឍនាំមកនូវឱកាសដល់មនុស្សគ្រប់គ្នា និងមិនទុកចោលនរណាម្នាក់នៅខាងក្រោយឡើយក្នុងដំណើរការធ្វើបរិវត្តកម្មឌីជីថលសកល។

លោក Luong Cuong ប្រធានរដ្ឋវៀតណាម មានប្រសាសន៍ក្នុងពិធី

លោក Luong Cuong ប្រធានរដ្ឋ បានបញ្ជាក់ថា ការធ្វើជាម្ចាស់ផ្ទះនៃពិធីចុះហត្ថលេខា និងការក្លាយជាប្រទេសដំបូងគេដែលបានចុះហត្ថលេខាលើអនុសញ្ញាហាណូយ បង្ហាញពីកិច្ចសន្យាយ៉ាងមុតមាំរបស់វៀតណាមចំពោះការគោរពច្បាប់ ការអនុវត្តកាតព្វកិច្ចអន្តរជាតិរបស់ខ្លួនយ៉ាងពេញលេញ និងរួមចំណែកដល់ការពង្រឹងសណ្តាប់ធ្នាប់ច្បាប់សកលក្នុងលំហអ៊ីនធឺណិត។

លោក Luong Cuong ប្រធានរដ្ឋ បានអំពាវនាវឱ្យប្រទេសជាសមាជិកផ្តល់សច្ចាប័នលើអនុសញ្ញានេះឱ្យបានឆាប់រហ័ស ដើម្បីឱ្យវាអាចចូលជាធរមានក្នុងពេលឆាប់ៗនេះ ដោយបង្កើតសណ្តាប់ធ្នាប់ឌីជីថលដ៏យុត្តិធម៌ បរិយាប័ន្ន និងផ្អែកលើច្បាប់។

លោក António Guterres អគ្គលេខាធិការអង្គការសហប្រជាជាតិ មានប្រសាសន៍ក្នុងពិធី

នៅក្នុងសុន្ទរកថារបស់ខ្លួន លោក António Guterres អគ្គលេខាធិការអង្គការសហប្រជាជាតិ បានថ្លែងអំណរគុណចំពោះប្រទេសម្ចាស់ផ្ទះវៀតណាមជាមួយតួនាទីជាអ្នកត្រួសត្រាយផ្លូវ ស្មារតីនៃការតភ្ជាប់ និងសមត្ថភាពរៀបចំរបស់ខ្លួន ព្រមទាំងបញ្ជាក់ថា ទីក្រុងហាណូយគឺជាទីក្រុងមួយដែលបង្ហាញពីស្មារតីនៃយុគសម័យឌីជីថល ប្រកបដោយភាពច្នៃប្រឌិត ស្វាហាប់ និងការតភ្ជាប់។

ដោយជឿជាក់ថាមនុស្សជាតិកំពុងរស់នៅក្នុងសម័យកាលនៃការធ្វើបរិវត្តកម្មបច្ចេកវិទ្យាដែលមិនធ្លាប់មានពីមុនមក ជាមួយនឹងការរីកចម្រើនដែលនាំពិភពលោកឱ្យកាន់តែជិតស្និទ្ធគ្នា ប៉ុន្តែក៏បង្កហានិភ័យកាន់តែខ្លាំងឡើងផងដែរ លោក António Guterres បានវាយតម្លៃថា អនុសញ្ញាហាណូយគឺជាសន្ធិសញ្ញាយុត្តិធម៌ព្រហ្មទណ្ឌសកលដំបូងគេក្នុងរយៈពេលជាងពីរទសវត្សរ៍ ដែលបង្កើតក្របខ័ណ្ឌច្បាប់រួមសម្រាប់ប្រទេសនានាសម្របសម្រួលក្នុងការប្រយុទ្ធប្រឆាំងនឹងឧក្រិដ្ឋកម្មតាមអ៊ីនធឺណិត។ លោក António Guterres បានអំពាវនាវឱ្យប្រទេសនានាផ្តល់សច្ចាប័ន និងអនុវត្តអនុសញ្ញានេះឱ្យបានឆាប់រហ័ស ដោយប្រែកិច្ចសន្យាក្លាយទៅជាសកម្មភាពជាក់ស្តែងដើម្បីធានាសន្តិសុខតាមអ៊ីនធឺណិតសកល ព្រមទាំងបញ្ជាក់ថា អង្គការសហប្រជាជាតិនឹងគាំទ្រការកសាងសមត្ថភាព និងកម្មវិធីសហប្រតិបត្តិការរវាងប្រទេសនានា៕

បកប្រែដោយ Huyen Trang