ជំរុញទំនាក់ទំនងភាពជាដៃគូយុទ្ធសាស្ត្រគ្រប់ជ្រុងជ្រោយវៀតណាម-ជប៉ុន ឲ្យកាន់តែស៊ីជម្រៅថែមទៀត

នៅក្នុងជំនួប លោក To Lam អគ្គលេខាបក្សបានស្វាគមន៍ដំណើរទស្សនកិច្ចលើកដំបូងរបស់លោកស្រី Obuchi នៅប្រទេសវៀតណាមក្នុងតួនាទីជាប្រធានសម្ព័ន្ធសមាជិកសភាមិត្តភាពជប៉ុន-វៀតណាម។ លោក To Lam អគ្គលេខាបក្ស បានអះអាងថា ដំណើរទស្សនកិច្ចនេះមានអត្ថន័យដ៏សំខាន់ រួមចំណែកជាវិជ្ជមានក្នុងការជំរុញទំនាក់ទំនងភាពជាដៃគូយុទ្ធសាស្ត្រគ្រប់ជ្រុងជ្រោយវៀតណាម-ជប៉ុន ឲ្យកាន់តែស៊ីជម្រៅថែមទៀត។

លោក To Lam អគ្គលេខាបក្ស ទទួលជួបលោកស្រី Obuchi Yuko ប្រធានសម្ព័ន្ធសមាជិកសភាមិត្តភាពជប៉ុន-វៀតណាម

លោកស្រី Obuchi បានសង្កត់ធ្ងន់លើសារៈសំខាន់នៃការពង្រឹងបន្ថែមទៀតនូវទំនាក់ទំនងសហប្រតិបត្តិការរវាងវៀតណាម និងជប៉ុនលើវិស័យជាច្រើន មិនត្រឹមតែវិស័យនយោបាយ-សេដ្ឋកិច្ច-ពាណិជ្ជកម្ម-វិនិយោគប៉ុណ្ណោះទេ ថែមទាំងវិស័យការពារជាតិ សន្តិសុខ ការជួបប្រាស្រ័យរវាងប្រជាជននិងប្រជាជន ជាពិសេសក្នុងបរិបទនៃស្ថានភាពពិភពលោកថ្មី។ លោកស្រី Obuchi បានអះអាងថា នឹងសម្របសម្រួលយ៉ាងជិតស្និទ្ធ និងជំរុញទំនាក់ទំនងភាពជាដៃគូយុទ្ធសាស្ត្រគ្រប់ជ្រុងជ្រោយ វៀតណាម-ជប៉ុន ឈានចូលដំណាក់កាលថ្មីនៃការអភិវឌ្ឍ។

លោក To Lam អគ្គលេខាបក្ស ទទួលជួបលោកស្រី Obuchi Yuko ប្រធានសម្ព័ន្ធសមាជិកសភាមិត្តភាពជប៉ុន-វៀតណាម

លោក To Lam អគ្គលេខាបក្ស បានអះអាងថា វៀតណាមបន្តអនុវត្តគោលនយោបាយការបរទេសឯករាជ្យ ម្ចាស់ការ សន្តិភាព កិច្ចសហប្រតិបត្តិការ និងការអភិវឌ្ឍ ពហុភាគីភាវូបនីយកម្ម ពិពិធកម្ម និងជំរុញទំនាក់ទំនងជាមួយដៃគូនានាឲ្យកាន់តែស៊ីជម្រៅ និងប្រកបដោយប្រសិទ្ធភាពថែមទៀត ដោយចាត់ទុកជប៉ុនជាដៃគូយុទ្ធសាស្ត្រមួយ និងរួមដំណើរជាមួយគ្នាក្នុងយុគសម័យថ្មី។

លោក To Lam អគ្គលេខាបក្ស បានស្នើឲ្យសម្ព័ន្ធសមាជិកសភាមិត្តភាពជប៉ុន-វៀតណាម គាំទ្រចំពោះការបង្កើនការផ្លាស់ប្តូរគណៈប្រតិភូជាន់ខ្ពស់ ជំរុញកិច្ចសហប្រតិបត្តិការលើវិស័យការពារជាតិ និងសន្តិសុខ ពង្រឹងការតភ្ជាប់រវាងខឿនសេដ្ឋកិច្ចទាំងពីរ កៀរគរសហគ្រាសជប៉ុនឱ្យចូលរួមយ៉ាងសកម្មក្នុងគម្រោងហេដ្ឋារចនាសម្ព័ន្ធយុទ្ធសាស្ត្រ និងសំខាន់ៗ គម្រោងថាមពលថ្មីដែលជានិមិត្តរូបនៃកិច្ចសហប្រតិបត្តិការរវាងប្រទេសទាំងពីរ លើកកំពស់សសរស្តម្ភនៃកិច្ចសហប្រតិបត្តិការ វិទ្យាសាស្ត្រ-បច្ចេកវិជ្ជាខ្ពស់ នវានុវត្តន៍ ការបណ្តុះបណ្តាលធនធានមនុស្សប្រកបដោយគុណភាពខ្ពស់ ពង្រឹងកិច្ចសហប្រតិបត្តិការរវាងបណ្ដាមូលដ្ឋាន ការផ្លាស់ប្តូរវប្បធម៌... និងយកចិត្តទុកដាក់ដល់ការជួយឧបត្ថម្ភ និងបង្កើតលក្ខខណ្ឌអំណោយផលសម្រាប់សហគមន៍អាណិកជនវៀតណាមជាង ៦០០,០០០ នាក់នៅជប៉ុន។ លោក To Lam អគ្គលេខាបក្ស បានស្នើឲ្យភាគីទាំងពីរពង្រឹងការសម្របសម្រួល ចែករំលែកគោលជំហរ និងគាំទ្រគ្នាទៅវិញទៅមកនៅវេទិកាអន្តរជាតិ និងតំបន់ ជាពិសេសក្នុងបរិបទដែលស្ថានភាពពិភពលោក និងតំបន់មានការវិវឌ្ឍជាច្រើន។

នៅក្នុងជំនួប សមាជិកសភា និងសមាជិកគណៈកម្មការដឹកនាំសម្ព័ន្ធសមាជិកសភាមិត្តភាពជប៉ុន-វៀតណាម បានសម្តែងនូវការលើកសរសើរចំពោះបុព្វហេតុផ្លាស់ថ្មីនៅវៀតណាម ក្រោមការដឹកនាំរបស់លោក To Lam អគ្គលេខាបក្ស ព្រមទាំងបង្ហាញនូវការគាំទ្រចំពោះការពង្រឹងទំនាក់ទំនងជប៉ុន-វៀតណាម ក៏ដូចជាបំណងចង់ជំរុញទំនាក់ទំនងរវាងប្រទេសទាំងពីរលើគ្រប់វិស័យ អនុវត្តកិច្ចសន្ទនា 2+2 ឆ្នាំ ២០២៥ សម្របសម្រួលជំរុញគម្រោងសហប្រតិបត្តិការដែលជានិមិត្តរូបនៃទំនាក់ទំនងរវាងប្រទេសទាំងពីរ។

* នារសៀលថ្ងៃដដែល នៅវិមានរដ្ឋសភា លោក Tran Thanh Man ប្រធានរដ្ឋសភាវៀតណាម បានទទួលជួបលោកស្រី Obuchi Yuko និងគណៈប្រតិភូសម្ព័ន្ធសមាជិកសភាមិត្តភាពជប៉ុន-វៀតណាម។

នៅក្នុងជំនួប លោក Tran Thanh Man ប្រធានរដ្ឋសភា បានសង្កត់ធ្ងន់ថា កិច្ចសហប្រតិបត្តិការប្រកបដោយប្រសិទ្ធភាពរវាងរដ្ឋសភាវៀតណាម និងសភាជប៉ុន ក៏ដូចជាការជួបប្រាស្រ័យ និងកិច្ចសហប្រតិបត្តិការយ៉ាងជិតស្និទ្ធរវាងក្រុមសមាជិកសភាមិត្តភាពនៃប្រទេសទាំងពីរក្នុងរយៈពេលកន្លងមក គឺជាចំណុចភ្លឺស្វាងក្នុងទំនាក់ទំនងរវាងប្រទេសទាំងពីរ រួមចំណែកជំរុញទំនាក់ទំនងភាពជាដៃគូយុទ្ធសាស្ត្រគ្រប់ជ្រុងជ្រោយវៀតណាម-ជប៉ុនឲ្យកាន់តែស៊ីជម្រៅថែមទៀត។

ទិដ្ឋភាពនៃជំនួប (រូបថត៖ vnanet.vn)

លោកប្រធានរដ្ឋសភាបានស្នើឱ្យលោកស្រី Obuchi បន្តយកចិត្តទុកដាក់ និងជំរុញឲ្យរដ្ឋាភិបាលជប៉ុន រួមដំណើរជាមួយវៀតណាមក្នុងការអនុវត្តគោលដៅអភិវឌ្ឍន៍ ឧស្សាហូបនីយកម្ម ទំនើបកម្ម លើកកំពស់សសរស្តម្ភថ្មីនៃវិទ្យាសាស្ត្រ និងបច្ចេកវិទ្យា… ជំរុញការជួបប្រាស្រ័យរវាងសមាជិកសភា ជាពិសេសរវាងក្រុមសមាជិកសភាមិត្តភាពទាំងពីរ សមាជិការសភា និងសមាជិកសភាវ័យក្មេង។ ទន្ទឹមនឹងនោះ បន្តលើកកម្ពស់តួនាទីរបស់ស្ថាប័ននីតិប្បញ្ញត្តិក្នុងការកសាងច្បាប់សមស្របមួយ ដើម្បីជំរុញកិច្ចសហប្រតិបត្តិការរវាងប្រទេសទាំងពីរលើគ្រប់វិស័យ បង្កើតលក្ខខណ្ឌអំណោយផលសម្រាប់ប្រជាពលរដ្ឋនៃប្រទេសទាំងពីរក្នុងការរស់នៅ និងធ្វើការ បន្តសហប្រតិបត្តិការយ៉ាងជិតស្និទ្ធ និងគាំទ្រគ្នាទៅវិញទៅមកក្នុងបញ្ហាតំបន់ និងអន្តរជាតិដែលភាគីទាំងពីរមានការយកចិត្តទុកដាក់ដូចគ្នា ក៏ដូចជាក្នុងយន្តការសហប្រតិបត្តិការ។

លោកស្រី Obuchi បានអះអាងថា នឹងជំរុញសកម្មភាពជួបប្រាស្រ័យរវាងសមាជិកសភានៃប្រទេសទាំងពីរ ក៏ដូចជាយកចិត្តទុកដាក់ចំពោះការជំរុញកិច្ចសហប្រតិបត្តិការសេដ្ឋកិច្ច ជាពិសេសលើវិស័យដែលថ្នាក់ដឹកនាំនៃប្រទេសទាំងពីរបានឯកភាពគ្នាដូចជា៖ បរិវត្តកម្មឌីជីថល បរិវត្តកម្មបៃតង ការអភិវឌ្ឍធនធានមនុស្សក្នុងវិស័យ semiconductor ការវិនិយោគហេដ្ឋារចនាសម្ព័ន្ធ ផ្លូវរថភ្លើងក្នុងទីក្រុង កិច្ចសហប្រតិបត្តិការរវាងបណ្ដាមូលដ្ឋាន និងការផ្លាស់ប្តូរវប្បធម៌៕

បកប្រែដោយ Huyen Trang