លោកនាយករដ្ឋមន្រ្តី៖ ខេត្ត Dien Bien ត្រូវតែខិតខំក្លាយជាខេត្តមួយដែលមានភាពរីកចម្រើនជាមួយនឹងប្រជាជនដែលមានសុភមង្គល

ដោយសង្កត់ធ្ងន់លើគោលដៅអភិវឌ្ឍយ៉ាងឆាប់រហ័ស និងប្រកបដោយចីរភាព ជាមួយនឹងកំណើន ១០% ឡើងទៅ លោកនាយករដ្ឋមន្ត្រីបានស្នើឱ្យខេត្តអនុវត្តយ៉ាងជាក់ស្តែងនូវរាល់សេចក្តីសម្រេចនៃមហាសន្និបាតលើកទី ១៤ របស់បក្ស សេចក្តីសម្រេចចិត្ត និងសេចក្តីសន្និដ្ឋានរបស់ការិយាល័យនយោបាយស្តីពីការអភិវឌ្ឍតំបន់ សេចក្តីសម្រេចចិត្តនៃមហាសន្និបាតបក្សខេត្ត អាណត្តិ ២០២៦-២០៣១ និងសេចក្តីសន្និដ្ឋានរបស់លោកអគ្គលេខាបក្ស និងលោកនាយករដ្ឋមន្ត្រីរដ្ឋាភិបាល នៅក្នុងជំនួបធ្វើការជាមួយខេត្ត Dien Bien នាពេលថ្មីៗនេះ។

លោក Pham Minh Chinh នាយករដ្ឋមន្ត្រី មានប្រសាសន៍នៅក្នុងជំនួបធ្វើការ​ (រូបថត៖​ vnanet.vn)

លោកនាយករដ្ឋមន្ត្រីបន្ថែមថាខេត្ត Dien Bien គួរតែផ្តោតលើការអភិវឌ្ឍផ្នែក និងវិស័យសេដ្ឋកិច្ចសំខាន់ៗ ជាពិសេស ការអភិវឌ្ឍឧស្សាហកម្មដោយប្រើប្រាស់រោងចក្រវារីអគ្គិសនីប្រកបដោយប្រសិទ្ធភាព លើកកម្ពស់ការអភិវឌ្ឍឧស្សាហកម្មកែច្នៃ និងថាមពលកកើតឡើងវិញ អភិវឌ្ឍ និងផ្លាស់ប្តូររចនាសម្ព័ន្ធកសិកម្មឆ្ពោះទៅរកការផលិតទំនិញ បង្កើនតម្លៃបន្ថែម និងការអភិវឌ្ឍប្រកបដោយចីរភាព ជាមួយនឹងដំណាំសំខាន់ៗដូចជាកាហ្វេ និងម៉ាកាដាមៀ លើកកម្ពស់គុណភាពសេវាកម្ម និងអភិវឌ្ឍទេសចរណ៍។ល។ លោកនាយករដ្ឋមន្ត្រី ស្នើឲ្យខេត្តត្រូវតែពន្លឿនការចំណាយដើមទុនវិនិយោគសាធារណៈចាប់ពីដើមឆ្នាំ ២០២៦ ជាពិសេសសម្រាប់គម្រោងជាតិសំខាន់ៗ ពង្រីកលំហរអភិវឌ្ឍន៍ថ្មីៗ ពង្រឹងការតភ្ជាប់ ទាក់ទាញអាជីវកម្ម និងវិនិយោគិន ដើម្បីបង្កើតសន្ទុះសម្រាប់ការអភិវឌ្ឍ។

ទិដ្ឋភាពនៃជំនួបធ្វើការ (រូបថត៖​ vnanet.vn)

ខេត្ត Dien Bien នឹងបន្តពង្រឹងការកសាងបក្ស និងប្រព័ន្ធនយោបាយឱ្យស្អាតស្អំ រឹងមាំ និងទូលំទូលាយ បង្កើនសមត្ថភាពដឹកនាំ និងកម្លាំងប្រយុទ្ធរបស់អង្គការបក្ស និងបក្ខជននិងរៀបចំការបោះឆ្នោតជ្រើសរើសសមាជិកសមាជិកាសភានីតិកាលទី ១៦ និងសមាជិកក្រុមប្រឹក្សាប្រជាជនគ្រប់លំដាប់ថ្នាក់ អាណត្តិ ២០២៦-២០៣១ ដោយជោគជ័យ៕

បកប្រែដោយ Thanh Cong