លោក Pham Minh Chinh នាយករដ្ឋមន្ត្រីវៀតណាម បញ្ចប់ដំណើរទស្សនកិច្ចនៅសាធារណរដ្ឋអេស្តូនីដោយជោគជ័យ

នារសៀលថ្ងៃទី ៧ មិថុនា (ម៉ោងក្នុងតំបន់) លោក Pham Minh Chinh នាយករដ្ឋមន្ត្រី និងភរិយា រួមជាមួយគណៈប្រតិភូជាន់ខ្ពស់វៀតណាមបានចាកចេញពីរដ្ឋធានី Tallinn បញ្ចប់ដំណើរទស្សនកិច្ចនៅសាធារណរដ្ឋ Estonia តបតាមការអញ្ជើញរបស់ លោក Kristen Michal នាយករដ្ឋមន្ត្រីនៃសាធារណរដ្ឋ អេស្តូនី ។ ក្នុងអំឡុងបំពេញទស្សនកិច្ចនៅប្រទេសអេស្តូនីរយៈពេល ៣ ថ្ងៃ លោក Pham Minh Chinh នាយករដ្ឋមន្រ្តី  បានជួបពិភាក្សាជាមួយ លោក Kristen Michal នាយករដ្ឋមន្ត្រីនៃសាធារណរដ្ឋអេស្តូនី ។ លោក Kristen Michal នាយករដ្ឋមន្ត្រីអេស្តូនីបានអះអាងថា អេស្តូនីមានបំណងចង់ពង្រឹងកិច្ចសហប្រតិបត្តិការលើគ្រប់វិស័យជាមួយវៀតណាម ត្រៀមខ្លួនជាស្រេចដើម្បីប្រកៀស្មាជាមួយវៀតណាមក្នុងដំណើរការធ្វើបិរវត្តកម្មឌីជីថល ការច្នៃប្រឌិត និងបង្កើនកិច្ចសហប្រតិបត្តិការលើវិស័យវិទ្យាសាស្ត្រ-បច្ចេកវិទ្យា បញ្ញាសិប្បនិម្មិត សន្តិសុខតាមអ៊ីនធឺណិត ការអប់រំ និងបណ្តុះបណ្តាល។ មេដឹកនាំទាំងពីរបានអះអាងថា ប្រទេសទាំងពីរត្រូវតែគាំទ្រ និងជួយគ្នាទៅវិញទៅមក ដើម្បីអភិវឌ្ឍជាមួយគ្នា តាមរយៈការរឹតបន្តឹងថែមទៀតនូវទំនាក់ទំនងមិត្តភាពប្រពៃណី និងកិច្ចសហប្រតិបត្តិការពហុភាគី។

លោក Pham Minh Chinh នាយករដ្ឋមន្ត្រី  និងភរិយា រួមជាមួយនឹងគណៈប្រតិភូជាន់ខ្ពស់វៀតណាម បានចាកចេញពីរដ្ឋធានី Tallinn បញ្ចប់ដំណើរទស្សនកិច្ចនៅសាធារណរដ្ឋអេស្តូនី។ រូបថត៖ Lai Hoa/VOV

លទ្ធផលសំខាន់នៃដំណើរទស្សនកិច្ចការងារនេះគឺភាគីទាំងពីរបានចុះហត្ថលេខាលើអនុស្សរណៈនៃការយោគយល់គ្នា ជាពិសេសអនុស្សរណៈនៃការយោគយល់គ្នាស្តីពីកិច្ចសហប្រតិបត្តិការក្នុងការធ្វើបរិវត្តកម្មឌីជីថល និងសេដ្ឋកិច្ចឌីជីថល។ អេស្តូនី គឺជាសក្ខីភាពមួយអំពីដំណើរការធ្វើបរិវត្តកម្មឌីជីថលដ៏ជោគជ័យ ដែលបានផ្លាស់ប្តូរ និងកែលម្អជីវិតរបស់មនុស្ស ក៏ដូចជាជំរុញសេដ្ឋកិច្ច និងបង្កើតការងារធ្វើ។ អេស្តូនីក៏ចែករំលែកបទពិសោធន៍របស់ខ្លួនយ៉ាងទូលំទូលាយនៅក្នុង ១៥០ ប្រទេស ដោយគាំទ្រគម្រោងឌីជីថល និងសន្តិសុខតាមអ៊ីនធឺណិតក្នុងវិស័យដំណោះស្រាយឌីជីថល បច្ចេកវិទ្យាបៃតង និងការចាប់ផ្តើមអាជីវកម្មប្រកបដោយភាពច្នៃប្រឌិត។ លោក Pham Minh Chinh នាយករដ្ឋមន្ត្រី សង្ឃឹមថា បន្ទាប់ពីបានចុះហត្ថលេខាលើកិច្ចព្រមព្រៀងសហប្រតិបត្តិការលើវិស័យវិទ្យាសាស្ត្រ និងបច្ចេកវិទ្យា នវានុវត្តន៍ និងការធ្វើបរិវត្តកម្មឌីជីថលនោះ នាពេលខាងមុខ អេស្តូនីនឹងបញ្ជូនអ្នកជំនាញទៅជួយវៀតណាម បំផុសគំនិត និងលើកទឹកចិត្តវៀតណាមក្នុងការអភិវឌ្ឍការធ្វើបរិវត្តកម្ម ឌីជីថល នវានុវត្តន៍ និងវិទ្យាសាស្ត្រ និងបច្ចេកវិទ្យា។

លោក Pham Minh Chinh នាយករដ្ឋមន្ត្រី និងភរិយា អញ្ជើញទស្សនាមជ្ឈមណ្ឌល Arvo Pärt។ រូបថត៖ Lai Hoa/VOV

ក្នុងអំឡុងបំពេញទស្សនកិច្ចនៅប្រទេសអេស្តូនី លោកនាយករដ្ឋមន្ត្រីវៀតណាមបានជួបជាមួយប្រធានសភាអេស្តូនី ចូលរួមវេទិកាធុរកិច្ចវៀតណាម-អេស្តូនី ទស្សនាទីក្រុងបុរាណ Tallinn កំពង់ផែ Tallinn Sadam ទស្សនាមជ្ឈមណ្ឌល e-Estonia ដែលជានិមិត្តរូបនៃរដ្ឋាភិបាលឌីជីថលឈានមុខគេរបស់ពិភពលោក និងមជ្ឈមណ្ឌល Arvo Pärt ដែលជានិមិត្តសញ្ញាវប្បធម៌ដ៏លេចធ្លោរបស់ប្រទេសអេស្តូនី។

បកប្រែដោយ Duy Hoan