ពង្រឹងកិច្ចសហប្រតិបត្តិការក្នុងវិស័យតុលាការរវាងវៀតណាម និងចិន

ក្នុងដំណើរទស្សនកិច្ចការងារនៅទីក្រុងប៉េកាំង លោក Le Minh Tri ប្រធានតុលាការប្រជាជនកំពូលវៀតណាម និងគណៈប្រតិភូបានចូលជួបសម្តែងការគួរសមជាមួយ លោក Chen Wenqing សមាជិកការិយាល័យនយោបាយ លេខាគណៈកម្មាធិការមជ្ឈិមបក្ស លេខាគណៈកម្មាធិការនយោបាយនិងច្បាប់មជ្ឈិមបក្សកុម្មុយនិស្តចិន; ជួបពិភាក្សាការងារជាមួយលោក Zhang Jun ប្រធានតុលាការប្រជាជនកំពូលចិន  និងផ្លាស់ប្ដូរជំនាញជាមួយលោក Ying  Yong ប្រធានអយ្យការប្រជាជនកំពូលចិន។

លោក Le Minh Tri ប្រធានតុលាការប្រជាជនកំពូលវៀតណាម និងលោក Chen Wenqing (រូបថត៖ vnanet.vn)

ក្នុងជំនួបជាមួយលោក  Chen Wenqing លោក Le Minh Tri ប្រធានតុលាការប្រជាជនកំពូលវៀតណាម បានអះអាងថា ដំណើរទស្សនកិច្ចការងារនេះ មានអត្ថន័យយ៉ាងសំខាន់ រួមចំណែកអនុវត្ដប្រកបដោយប្រសិទ្ធភាពនូវទស្សនៈរួមរវាងថ្នាក់ដឹកនាំជាន់ខ្ពស់នៃបក្សទាំងពីរ និងរដ្ឋទាំងពីរ ដែលលើកឡើងក្នុងសេចក្តីថ្លែងការណ៍រួមវៀតណាម-ចិន ក្នុងដំណើរបំពេញទស្សនកិច្ចផ្លូវរដ្ឋរបស់លោក Xi Jinping អគ្គលេខាបក្ស និងជាប្រធានរដ្ឋចិនទៅកាន់វៀតណាមកាលពីខែមេសា ឆ្នាំ២០២៥ ស្តីពីការបន្តធ្វើឱ្យស៊ីជម្រៅថែមទៀតនូវទំនាក់ទំនងភាពជាដៃគូយុទ្ធសាស្ត្រគ្រប់ជ្រុងជ្រោយ និងជំរុញការកសាងសហគមន៍ចែករំលែកអនាគតវៀតណាម-ចិន ដែលក្នុងនោះ កំណត់ថា វិស័យយុត្ដិធម៌គឺជាសសរស្តម្ភសំខាន់មួយនៃកិច្ចសហប្រតិបត្តិការ។

លោក Le Minh Tri ប្រធានតុលាការប្រជាជនកំពូលវៀតណាមបានចែករំលែកព័ត៌មានមួយចំនួនជាមួយលោក Chen Wenqing   អំពីកំណែទម្រង់នៅវៀតណាមលើវិស័យជាច្រើន  និងលទ្ធផលនៃកិច្ចសហប្រតិបត្តិការរវាងតុលាការប្រជាជនវៀតណាម និងចិននាពេលថ្មីៗនេះ។

លោក Chen Wenqing បានស្វាគមន៍យ៉ាងកក់ក្តៅចំពោះលោក Le Minh Tri ដែលដឹកនាំគណៈប្រតិភូជាន់ខ្ពស់នៃតុលាការប្រជាជនកំពូល​វៀតណាមមកបំពេញទស្សនកិច្ចការងារនៅប្រទេសចិន។ លោក  Chen Wenqing បានសង្កត់ធ្ងន់ថា វៀតណាមនិងចិន គឺជាប្រទេសជិតខាងសង្គមនិយមទាំងពីរ ដែលដឹកនាំដោយបក្សកុម្មុយនិស្ត ដោយមានទំនាក់ទំនងសហប្រតិបត្តិការជិតស្និទ្ធ និងឥតឈប់ឈរលើគ្រប់វិស័យ។ ក្នុងបរិបទនោះ ការពង្រឹងកិច្ចសហប្រតិបត្តិការរវាងតុលាការនៃប្រទេសទាំងពីរមានសារសំខាន់ណាស់។

លោក Le Minh Tri ប្រធានតុលាការប្រជាជនកំពូលវៀតណាម និងលោក Zhang Jun ប្រធានតុលាការប្រជាជនកំពូលចិន

គួររំលឹកថាមុននោះ លោក Le Minh Tri ប្រធានតុលាការប្រជាជនកំពូលវៀតណាម និងលោក Zhang Jun ប្រធានតុលាការប្រជាជនកំពូលចិនបានជួបពិភាក្សាគ្នា។

ក្នុងបរិយាកាសស្និទ្ធស្នាល និងមិត្ដភាព ប្រធានតុលាការប្រជាជនកំពូលនៃប្រទេសទាំងពីរបានឯកភាពគ្នាបន្តពង្រឹងកិច្ចសហប្រតិបត្តិការក្នុងវិស័យវិជ្ជាជីវៈ ដោយផ្តោតលើការចែករំលែកព័ត៌មាន និងផ្លាស់ប្តូរបទពិសោធន៍ក្នុងការបង្កើតតុលាការឯកទេសក្រោមឱវាទរបស់មជ្ឈមណ្ឌលហិរញ្ញវត្ថុអន្តរជាតិ ដើម្បីដោះស្រាយវិវាទលើវិស័យកម្មសិទ្ធិបញ្ញា ពាណិជ្ជកម្ម ក្ស័យធន និងការប្រើប្រាស់បញ្ញាសិប្បនិម្មិតក្នុងនីតិវិធី ការធ្វើបរិវត្ដកម្មឌីជីថល និងកសាងតុលាកាអេឡិចត្រូនិចជាដើម។ ភាគីទាំងពីរក៏បានឯកភាពគ្នានឹងសហការរៀបចំសន្និសីទតុលាការខេត្តជាប់ព្រំដែនវៀតណាម-ចិន នាខែវិច្ឆិកា ឆ្នាំ ២០២៥ ខាងមុខ៕

បកប្រែដោយ Thanh Cong