ការអភិវឌ្ឍទំនាក់ទំនងវៀតណាម-ហ្វីលីពីន ឲ្យកាន់តែស៊ីជម្រៅ និងទូលំទូលាយថែមទៀត

លោក Nguyen Manh Cuong អនុរដ្ឋមន្ត្រីបានបញ្ជាក់ថា វៀតណាមតែងតែឱ្យតម្លៃ និងមានគោលបំណងចង់អភិវឌ្ឍទំនាក់ទំនងភាពជាដៃគូយុទ្ធសាស្ត្រជាមួយហ្វីលីពីនឡើងកម្រិតកម្ពស់ថ្មីមួយឲ្យកាន់តែស៊ីជម្រៅ និងទូលំទូលាយថែមទៀត។ លោក Leo Herrera-Lim អនុរដ្ឋមន្ត្រី បានបង្ហាញទំនុកចិត្តថា ជាមួយនឹងចក្ខុវិស័យ និងការប្តេជ្ញាចិត្តរបស់បក្ស និងរដ្ឋ វៀតណាមនឹងសម្រេចបាននូវគោលដៅអភិវឌ្ឍន៍សេដ្ឋកិច្ចសង្គមប្រកបដោយជោគជ័យ និងរួមចំណែកជាវិជ្ជមានដល់សន្តិភាព កិច្ចសហប្រតិបត្តិការ និងការអភិវឌ្ឍនៅអាស៊ីអាគ្នេយ៍។

លោក Nguyen Manh Cuong អនុរដ្ឋមន្ត្រីក្រសួងការបរទេសវៀតណាម ជួបសន្ទនាតាមទូរស័ព្ទជាមួយលោក Leo Herrera-Lim អនុរដ្ឋមន្ត្រីទទួលបន្ទុកគោលនយោបាយនៃក្រសួងការបរទេសហ្វីលីពីន (រូបថត៖ baoquocte.vn)

ភាគីទាំងពីរបានវាយតម្លៃថា កិច្ចសហប្រតិបត្តិការរវាងវៀតណាម និងហ្វីលីពីនត្រូវបានពង្រឹងយ៉ាងទូលំទូលាយ ស៊ីជម្រៅ ជាក់ស្តែង និងមានប្រសិទ្ធភាពពីមួយថ្ងៃទៅមួយថ្ងៃ។ ភាគីទាំងពីរបានឯកភាពគ្នាបន្តពង្រឹងទំនុកចិត្តខាងនយោបាយ ពង្រឹងការផ្លាស់ប្តូរគណៈប្រតិភូជាន់ខ្ពស់ និងគ្រប់លំដាប់ថ្នាក់ លើកកម្ពស់យ៉ាងខ្លាំងនូវយន្តការសហប្រតិបត្តិការទ្វេភាគី និងបង្កើតសមិទ្ធផលថ្មីៗក្នុងកិច្ចសហប្រតិបត្តិការលើវិស័យអាទិភាពជាច្រើន។ ក្នុងឱកាសនេះ ភាគីទាំងពីរក៏បានផ្លាស់ប្តូរអំពីបញ្ហាតំបន់ និងអន្តរជាតិមួយចំនួនដែលភាគីទាំងពីរមានការយកចិត្តទុកដាក់ដូចគ្នា។ ភាគីទាំងពីរបានឯកភាពគ្នាបន្តសម្របសម្រួល និងគាំទ្រគ្នាទៅវិញទៅមកនៅក្នុងវេទិកាតំបន់ និងអន្តរជាតិ ពង្រឹងសាមគ្គីភាព និងតួនាទីជាមជ្ឈភាពរបស់អាស៊ាននៅក្នុងនិម្មាបនកម្មតំបន់ រួមគ្នាខិតខំប្រឹងប្រែងរក្សាបរិយាកាសសន្តិភាព និងស្ថិរភាពសម្រាប់ការអភិវឌ្ឍនៅអាស៊ីអាគ្នេយ៍ និងអាស៊ីប៉ាស៊ីហ្វិក៕

បកប្រែដោយ Huyen Trang